నాలుగు రోజులు..2,100 పాయింట్లు

దేశీయ స్టాక్‌ మార్కెట్లు కదంతొక్కాయి. ఇరాన్‌-ఇజ్రాయిల్‌ దేశాల మధ్య ఉద్రిక్త పరిస్థితులు తగ్గుముఖం పట్టడంతోపాటు క్రూడాయిల్‌ ధరలు పతనం చెందడం, విదేశీ సంస్థాగత పెట్టుబడిదారులు భారీగా నిధులను కుమ్మరించడంతో ఈవారం మొత్తం సూచీలు లాభాల్లో కదలాడాయి.

• భారీగా లాభపడిన సెన్సెక్స్‌
• రూ.12 లక్షల కోట్లు పెరిగిన సంపద

ముంబై, జూన్‌ 27: దేశీయ స్టాక్‌ మార్కెట్లు కదంతొక్కాయి. ఇరాన్‌-ఇజ్రాయిల్‌ దేశాల మధ్య ఉద్రిక్త పరిస్థితులు తగ్గుముఖం పట్టడంతోపాటు క్రూడాయిల్‌ ధరలు పతనం చెందడం, విదేశీ సంస్థాగత పెట్టుబడిదారులు భారీగా నిధులను కుమ్మరించడంతో ఈవారం మొత్తం సూచీలు లాభాల్లో కదలాడాయి. వరుసగా నాలుగో రోజూ శుక్రవారం సూచీలు అర శాతం వరకు లాభపడ్డాయి. 30 షేర్ల ఇండెక్స్‌ సూచీ సెన్సెక్స్‌ తిరిగి 84 వేల మార్క్‌ మైలురాయిని అధిగమించింది. ఇంట్రాడేలో 333 పాయింట్లు లాభపడిన సెన్సెక్స్‌ చివరకు 303.03 పాయింట్లు అందుకొని 84,058.90 వద్ద ముగిసింది. గత నాలుగు సెషన్లలో సూచీ 2,162.11 పాయింట్లు లేదా 2.64 శాతం ఎగబాకింది. దీంతో బీఎస్‌ఈలో లిైస్టెన కంపెనీల మార్కెట్‌ విలువ రూ.12,26,717.72 కోట్లు పెరిగి రూ.4,60,09,217.58 కోట్లు(5.38 ట్రిలియన్‌ డాలర్లు) చేరుకున్నది. మరో సూచీ నిఫ్టీ 88.80 పాయింట్లు అందుకొని 25,637.80 పాయింట్ల ముగిసింది. ఇరాన్‌-ఇజ్రాయిల్‌ సీజ్‌ఫైర్‌ ప్రకటించడం, అమెరికా-భారత్‌ దేశాల మధ్య వాణిజ్య ఒప్పందం త్వరలో కుదిరే అవకాశాలుండటంతో ఈవారంలో ఇరు సూచీలు రెండు శాతం వరకు లాభపడ్డాయని దలాల్‌స్ట్రీట్‌ వర్గాలు వెల్లడించాయి.

• ఏషియన్‌ పెయింట్స్‌ షేరు 3.06 శాతం లాభపడి టాప్‌గెయినర్‌గా నిలిచింది.
• దీంతోపాటు అల్ట్రటెక్‌ సిమెంట్‌, ఐసీఐసీఐ బ్యాంక్‌, రిలయన్స్‌, భెల్‌, హెచ్‌యూఎల్‌, సన్‌ఫార్మా, ఎస్బీఐ, భారతీ ఎయిర్‌టెల్‌, టాటా స్టీల్‌, టాటా మోటర్స్‌, ఎల్‌అండ్‌టీ, ఎన్‌టీపీసీ, కొటక్‌ బ్యాంక్‌, హెచ్‌సీఎల్‌ టెక్నాలజీ, టీసీఎస్‌ షేర్లు లాభాల్గో ముగిశాయి.
• కానీ, ట్రెంట్‌, ఎటర్నల్‌, టెక్‌ మహీంద్రా, టైటాన్‌, మారుతి, హెచ్‌డీఎఫ్‌సీ బ్యాంక్‌, ఇన్ఫోసిస్‌ షేర్లు నష్టపోయాయి.
• రంగాలవారీగా ఆయిల్‌ అండ్‌ గ్యాస్‌ 1. 21 శాతం, సర్వీసెస్‌ 1.17 శాతం, పవర్‌ 1.14 శాతం, కమోడిటీస్‌ 1.11 శాతం, ఎనర్జీ 1.10 శాతం, యుటిలిటీ, టెలికం రంగ సూచీలు లాభాల్లో ముగిశాయి.
• అక్జో నోబెల్‌ ఇండియాలో మెజార్టీ వాటాను కొనుగోలు చేయనున్నట్టు జేఎస్‌డబ్ల్యూ పెయింట్స్‌ లిమిటెడ్‌ ప్రకటించడంతో కంపెనీ షేరు 6.65 శాతం లాభపడి రూ.3,405 వద్ద నిలిచింది.