Stock Markets | కోలుకున్న స్టాక్‌ మార్కెట్లు.. 7.5 లక్షల కోట్లు పెరిగిన మదుపరుల సంపద

దేశీయ స్టాక్‌ మార్కెట్ల వరుస నష్టాలకు బ్రేక్‌పడింది. వరుసగా ఆరు రోజులుగా భారీగా నష్టపోయిన సూచీలు తిరిగి కోలుకున్నాయి. బ్లూచిప్‌ సంస్థల షేర్లకు లభించిన మద్దతుకు తోడు అంతర్జాతీయ మార్కెట్ల నుంచి వచ్చిన సానుకూల అంశాలు సూచీలను ముందువైపుకు నడిపించాయి.

Stock Markets | ముంబై, అక్టోబర్‌ 8: దేశీయ స్టాక్‌ మార్కెట్ల వరుస నష్టాలకు బ్రేక్‌పడింది. వరుసగా ఆరు రోజులుగా భారీగా నష్టపోయిన సూచీలు తిరిగి కోలుకున్నాయి. బ్లూచిప్‌ సంస్థల షేర్లకు లభించిన మద్దతుకు తోడు అంతర్జాతీయ మార్కెట్ల నుంచి వచ్చిన సానుకూల అంశాలు సూచీలను ముందువైపుకు నడిపించాయి. ఇంట్రాడేలో 700 పాయింట్లకు పైగా పెరిగిన 30 షేర్ల ఇండెక్స్‌ సూచీ సెన్సెక్స్‌ చివరకు 585 పాయింట్లు అందుకొని 81,635 పాయింట్ల వద్ద ముగిసింది. మరో సూచీ నిఫ్టీ సైతం 217.40 పాయింట్లు ఎగబాకి తిరిగి 25 వేల మార్క్‌ను అధిగమించింది. చివరకు 25,013.15 పాయింట్ల వద్ద స్థిరపడింది. మార్కెట్లు ఉవ్వెత్తున ఎగిసిపడటంతో మదుపరుల సంపద భారీ స్థాయిలో పెరిగింది.

గత ఆరు సెషన్లలో రూ.9 లక్షల కోట్లకు పైగా సంపదను కోల్పోయిన మదుపరులు ఒక మంగళవారం నాడే రూ.7 లక్షల కోట్లకు పైగా పెరగడం విశేషం. దీంతో బీఎస్‌ఈలో లిైస్టెన కంపెనీల మార్కెట్‌ విలువ రూ.7,51,481.51 కోట్లు పెరిగి రూ.4,59,50,926.21 కోట్లు(5.47 ట్రిలియన్‌ డాలర్లు)కు చేరుకున్నది. ఆసియా, యూరప్‌ మార్కెట్ల నుంచి వచ్చిన సానుకూల అంశాలకు తోడు ఆర్బీఐ తన పరపతి సమీక్షలో తీసుకునే నిర్ణయం కోసం మదుపరులు వేచి చూస్తుండటం, విదేశీ సంస్థాగత పెట్టుబడిదారులు నిధులను తరలించుకుపోయినప్పటికీ సూచీలు లాభాల్లో ముగిశాయని దలాల్‌స్ట్రీట్‌ వర్గాలు వెల్లడించాయి.

• అదానీపోర్ట్స్‌ 4.76 శాతం పెరిగి టాప్‌ గెయినర్‌గా నిలిచింది.
• దీంతోపాటు మహీంద్రా, రిలయన్స్‌, హెచ్‌డీఎఫ్‌సీ బ్యాంక్‌, ఎల్‌అండ్‌టీ, ఎస్బీఐ, ఎన్‌టీపీసీ, అల్ట్రాటెక్‌ సిమెంట్‌, కొటక్‌ బ్యాంక్‌, ఇన్ఫోసిస్‌, హెచ్‌సీఎల్‌ టెక్‌, సన్‌ ఫార్మా, టెక్‌ మహీంద్రా, యాక్సిస్‌ బ్యాంక్‌, ఐసీఐసీఐ బ్యాంక్‌లు లాభాల్లో ముగిశాయి.
• టాటా స్టీల్‌, టైటాన్‌, టాటా మోటర్స్‌, హెచ్‌యూఎల్‌, ఐటీసీ, టీసీఎస్‌, భారతీఎయిర్‌టెల్‌, మారుతి నష్టపోయాయి.
• బ్యాంకింగ్‌, టెలికం, వాహన, రియల్టీ రంగ షేర్లు కదంతొక్కాయి.
• రంగాలవారీగా సేవలు 3.25 శాతం, క్యాపిటల్‌ గూడ్స్‌ 2.82 శాతం, ఇండస్ట్రీయల్స్‌ 2.81 శాతం, పవర్‌ 2.44 శాతం, టెలికం 2.35 శాతం చొప్పున బలపడ్డాయి.
• ప్రారంభంలో భారీగా నష్టపోయిన ఓలా షేరు చివర్లో కోలుకున్నది. కొనుగోలుదారులను తప్పుదోవ పట్టించేలా ప్రకటనలు, వాణిజ్య ఉల్లంఘనలు పాల్పడినట్లు ఆరోపణలు రావడంతో గత మూడు రోజులు పతనమైన షేరు 5 శాతం లాభపడి రూ.95.46 వద్ద ముగిసింది.