రూ.10 లక్షలకు బీఎస్‌డీఏ పరిమితి పెంపు!

బేసిక్‌ సర్వీస్‌ డీమ్యాట్‌ ఖాతా (బీఎస్‌డీఏ) పరిమితిని రూ.10 లక్షలకు పెంచాలని క్యాపిటల్‌ మార్కెట్స్‌ రెగ్యులేటర్‌ సెబీ బుధవారం ప్రతిపాదించింది. ప్రస్తుతం ఇది రూ.2 లక్షలుగానే ఉన్నది. సెక్యూరిటీస్‌ మార్కెట్‌లో రిటైల్‌ మదుపరుల భాగస్వామ్యాన్ని ఇంకా పెంచాలన్న లక్ష్యంలో భాగంగానే ఈ ప్రతిపాదనను తీసుకొచ్చింది.

• ప్రతిపాదించిన సెబీ

న్యూఢిల్లీ, జూన్‌ 5: బేసిక్‌ సర్వీస్‌ డీమ్యాట్‌ ఖాతా (బీఎస్‌డీఏ) పరిమితిని రూ.10 లక్షలకు పెంచాలని క్యాపిటల్‌ మార్కెట్స్‌ రెగ్యులేటర్‌ సెబీ బుధవారం ప్రతిపాదించింది. ప్రస్తుతం ఇది రూ.2 లక్షలుగానే ఉన్నది. సెక్యూరిటీస్‌ మార్కెట్‌లో రిటైల్‌ మదుపరుల భాగస్వామ్యాన్ని ఇంకా పెంచాలన్న లక్ష్యంలో భాగంగానే ఈ ప్రతిపాదనను తీసుకొచ్చింది. ఈ మేరకు తమ కన్సల్టేషన్‌ పేపర్‌లో సెబీ పేర్కొన్నది.

కాగా, రెగ్యులర్‌ డీమ్యాట్‌ ఖాతాకు మరింత బేసిక్‌ వెర్షనే ఈ బీఎస్‌డీఏ. 2012లో దీన్ని సెబీ పరిచయం చేసింది. స్మాల్‌ పోర్ట్‌ఫోలియోలున్న మదుపరులపై డీమ్యాట్‌ చార్జీల భారాన్ని తగ్గించాలనే ఈ బేసిక్‌ సర్వీస్‌ డీమ్యాట్‌ ఖాతాలను సెబీ అందుబాటులోకి తెచ్చింది. ఒక మదుపరి బీఎస్‌డీఏలో రూ.2 లక్షలదాకా డెట్‌ సెక్యూరిటీలను ఉంచుకోవచ్చు. డెట్‌ సెక్యూరిటీలు కానివి కూడా రూ.2 లక్షలదాకా పెట్టుకోవచ్చు. ఈ ప్రతిపాదనలపై ఈ నెల 26దాకా మదుపరుల నుంచి అభిప్రాయాలను సెబీ కోరుతున్నది.

సెబీ ప్రతిపాదనల్లో ముఖ్యాంశాలు

• ఎప్పుడూ కూడా ఏ రకంగానూ డీమ్యాట్‌ ఖాతాలో ఉన్న రుణ/రుణేతర సెక్యూరిటీల విలువ రూ.10 లక్షలను దాటరాదు.
• అన్ని డిపాజిటరీల్లో మదుపరులందరికీ తమ పేరుపై ఒక బీఎస్‌డీఏ లేదా ఒక రెగ్యులర్‌ డీమ్యాట్‌ ఖాతానే ఉండాలి.
• బీఎస్‌డీఏ గరిష్ఠ వార్షిక నిర్వహణ చార్జీలపై సమీక్షలు చేయాలి.
• పోర్ట్‌ఫోలియోల విలువ రూ.4 లక్షలదాకా ఉంటే వార్షిక నిర్వహణ చార్జీలు ఉండవు. రూ.4 లక్షలు-10 లక్షల మధ్య ఉంటే చార్జీ రూ.100.
• బీఎస్‌డీఏలో పోర్ట్‌ఫోలియోల విలువ 10 లక్షలు దాటితే ఆటోమేటిగ్గా రెగ్యులర్‌ డీమ్యాట్‌ ఖాతాగా మారిపోతుంది.
• బీఎస్‌డీఏ ఉన్నవారికి ఎలక్ట్రానిక్‌ స్టేట్‌మెంట్లు ఉచితం. భౌతిక స్టేట్‌మెంట్లు కావాలంటే ఒక్కోదానికి చార్జీ రూ.25.