టాటాలకు ఊరట

టాటా గ్రూప్‌ కంపెనీల మాతృసంస్థ టాటా సన్స్‌ ఆధిపత్యానికి కొనసాగుతున్న పోరులో సుప్రీం కోర్టులో టాటాలకు ఊరట లభించింది. టాటా సన్స్‌ ఎగ్జిక్యూటివ్‌ చైర్మన్‌ పదవి నుంచి సైరస్‌ మిస్త్రీని తొలగించాలన్న టాటా గ్రూప్‌ నిర్ణయాన్ని సమర్థిస్తూ 2021లో వెలువడిన తీర్పును రివ్యూ చేయాలంటూ శాపూర్జి పల్లోంజీ

సైరస్‌ మిస్త్రీ తొలగింపుపై రివ్యూ పిటిషన్‌ కొట్టివేత

న్యూఢిల్లీ, మే 19: టాటా గ్రూప్‌ కంపెనీల మాతృసంస్థ టాటా సన్స్‌ ఆధిపత్యానికి కొనసాగుతున్న పోరులో సుప్రీం కోర్టులో టాటాలకు ఊరట లభించింది. టాటా సన్స్‌ ఎగ్జిక్యూటివ్‌ చైర్మన్‌ పదవి నుంచి సైరస్‌ మిస్త్రీని తొలగించాలన్న టాటా గ్రూప్‌ నిర్ణయాన్ని సమర్థిస్తూ 2021లో వెలువడిన తీర్పును రివ్యూ చేయాలంటూ శాపూర్జి పల్లోంజీ (ఎస్‌పీ) గ్రూప్‌ వేసిన పిటిషన్‌ను గురువారం సుప్రీంకోర్టు తోసిపుచ్చింది. అయితే 2021 మార్చిలో వెలువడిన తీర్పులో సైరస్‌ మిస్త్రీకి వ్యతిరేకంగా ఉన్న కొన్ని వ్యాఖ్యలను తొలగించాలని ప్రధాన న్యాయమూర్తి ఎన్‌వీ రమణ నేతృత్వంలోని బెంచ్‌ ఉత్తర్వులు జారీచేసింది.

టాటా సన్స్‌లో 18 శాతం వాటా వివరాలివి…

• 100 బిలియన్‌ డాలర్ల గ్రూపునకు నేతృత్వం వహిస్తున్న టాటా సన్స్‌ ప్రైవేట్‌ లిమిటెడ్‌ (టీఎస్‌పీఎల్‌) చైర్మన్‌గా 2012లో రతన్‌ టాటా స్థానంలో సైరస్‌ మిస్త్రీ నియమితులయ్యారు.
• నాలుగేండ్ల తర్వాత చైర్మన్‌ పదవి నుంచి మిస్త్రీని టాటా సన్స్‌ డైరెక్టర్ల బోర్డు తొలగించింది.
• అటుతర్వాత మిస్త్రీ నేషనల్‌ కంపెనీ లా అప్పిలేట్‌ ట్రిబ్యునల్‌ (ఎన్‌సీఎల్‌ఏటీ)ని ఆశ్రయించగా, మిస్త్రీని ఎగ్జిక్యూటివ్‌ చైర్మన్‌గా పునర్నియామకానికి ట్రిబ్యునల్‌ ఉత్తర్వులు జారీచేసింది.
• ఎన్సీఎల్టీ ఉత్తర్వుల్ని 2021 మార్చి 26న సుప్రీంకోర్టు రద్దుచేసింది.
• ఆ రద్దుపై రివ్యూ పిటిషన్‌ను తాజాగా సర్వోన్నత న్యాయస్థానం కొట్టివేసింది.
• టీఎస్‌పీఎల్‌ నుంచి గ్రూప్‌ యాజమాన్య ప్రయోజనాల్ని వేరుపర్చాలంటూ షాపూర్జి పల్లోంజి గ్రూప్‌ చేసిన విజాపనను కూడా కోర్టు తిరస్కరించింది.

రతన్‌ టాటా హర్షం
సైరస్‌ రివ్యూ పిటిషన్‌ కొట్టివేస్తూ వెలువడిన సుప్రీంకోర్టు ఉత్తర్వులపై టాటా ట్రస్ట్‌ల చైర్మన్‌ రతన్‌ టాటా హర్షం వ్యక్తం చేశారు. దీంతో మన న్యాయవ్యవస్థ విలువల పట్ల విశ్వాసం పెంపొందుతుందని టాటా విడుదల చేసిన ప్రకటనలో పేర్కొన్నారు. సుప్రీం ఉత్తర్వుల్ని తాము ఆహ్వానిస్తున్నామని టాటా సన్స్‌ వేరొక ప్రకటనలో తెలిపింది. టాటా సన్స్‌లో మెజారిటీ వాటా టాటా ట్రస్ట్‌ల వద్ద ఉండగా, 15 శాతంపైగా వాటా ఎస్‌పీ గ్రూప్‌ చేతిలో ఉంది. షాంపూర్జి పల్లోంజి అండ్‌ కంపెనీకి మిస్త్రీ మేనేజింగ్‌ డైరెక్టర్‌గా వ్యవహరిస్తున్నారు.