ఎస్బీఐ లాభం 17 వేల కోట్లు

దేశీయ బ్యాంకింగ్‌ దిగ్గజం స్టేట్‌ బ్యాంక్‌ ఆఫ్‌ ఇండియా(ఎస్బీఐ) నిరాశాజనక ఆర్థిక ఫలితాలు ప్రకటించింది. ప్రస్తుత ఆర్థిక సంవత్సరం తొలి త్రైమాసికానిగాను బ్యాంక్‌ రూ.17,035 కోట్ల ఏకీకృత నికర లాభాన్ని గడించింది. అంతక్రితం ఏడాది ఇదే త్రైమాసికంలో నమోదైన రూ.16,884 కోట్ల లాభంతో పోలిస్తే కేవలం ఒక్క శాతం లోపు పెరుగుదల నమోదైంది.

• రూ.1.22 లక్షల కోట్లకు ఆదాయం

న్యూఢిల్లీ, ఆగస్టు 3: దేశీయ బ్యాంకింగ్‌ దిగ్గజం స్టేట్‌ బ్యాంక్‌ ఆఫ్‌ ఇండియా(ఎస్బీఐ) నిరాశాజనక ఆర్థిక ఫలితాలు ప్రకటించింది. ప్రస్తుత ఆర్థిక సంవత్సరం తొలి త్రైమాసికానిగాను బ్యాంక్‌ రూ.17,035 కోట్ల ఏకీకృత నికర లాభాన్ని గడించింది. అంతక్రితం ఏడాది ఇదే త్రైమాసికంలో నమోదైన రూ.16,884 కోట్ల లాభంతో పోలిస్తే కేవలం ఒక్క శాతం లోపు పెరుగుదల నమోదైంది. మొండి బకాయిలను పూడ్చుకోవడానికి అధికంగా నిధుల కేటాయించడం వల్లనే లాభాల్లో గండిపడిందని పేర్కొంది. వరుస త్రైమాసికాలతో పోలిస్తే 17.7 శాతం తగ్గింది. సమీక్షకాలంలో బ్యాంక్‌ ఆదాయం రూ.1,08,039 కోట్ల నుంచి రూ.1,22,688 కోట్లకు చేరుకున్నట్లు బీఎస్‌ఈకి సమాచారం అందించింది. దీంట్లో వడ్డీల ద్వారా వచ్చే ఆదాయం రూ.95,975 కోట్ల నుంచి రూ.1,11,526 కోట్లకు పెరిగినట్లు తెలిపింది.

• బ్యాంక్‌ స్థూల నిరర్థక ఆస్తుల విలువ 2.76 శాతం(రూ.91,327.84 కోట్లు) నుంచి 2.21 శాతానికి(రూ.84,226 కోట్లు) తగ్గాయి.
• నికర ఎన్‌పీఏ కూడా 0.71 శాతం (రూ.21,051.08 కోట్లు) నుంచి 0.57 శాతానికి (రూ.21,554.69 కోట్లు) దిగొచ్చాయి.
• కన్సాలిడేటెడ్‌ విషయానికి వస్తే రూ.1,52,125 కోట్ల ఆదాయంపై రూ.19,325 కోట్ల నికర లాభాన్ని గడించింది. అంతక్రితం ఏడాది రూ. 1,32,333 కోట్ల ఆదాయంపై రూ. 18,537 కోట్ల లాభాన్ని నమోదు చేసుకున్నది.
• బాసెల్‌-3 నిబంధనలకు లోబడి టైర్‌-1, టైర్‌-2 బాండ్లను జారీ చేయడం ద్వారా గరిష్ఠంగా రూ.25 వేల కోట్ల నిధుల సేకరణకు బ్యాంక్‌ బోర్డు గ్రీన్‌సిగ్నల్‌ ఇచ్చింది.
• ప్రొవిజన్‌ కవరేజ్‌ రేషియో(పీసీఆర్‌) 74.41 శాతంగా నమోదయ్యాయి.
• బ్యాంక్‌ డిపాజిట్లు 8.18 శాతం ఎగబాకి రూ.49.02 లక్షల కోట్లకు చేరుకున్నాయి. గతేడాది రూ.45.31 లక్షల కోట్లుగా ఉన్నాయి.
• అడ్వాన్స్‌లు ఏడాది ప్రాతిపదికన 15.39 శాతం ఎగబాకి రూ.38.12 లక్షల కోట్లకు చేరాయి.
• దేశీయంగా రిటైల్‌ పర్సనల్‌ అడ్వాన్స్‌లు 13.60 శాతం పెరిగి రూ.13.68 లక్షల కోట్లుగా నమోదయ్యాయి.
• నికర వడ్డీ ఆదాయం 5.71 శాతం అధికమై రూ.38,905 కోట్ల నుంచి రూ.41,125 కోట్లకు చేరాయి.