Layoffs | ద్రవ్యోల్బణం, లేఆఫ్స్‌పై ఆందోళన.. 57 శాతంమంది పట్టణవాసుల బాధ ఇదే

ద్రవ్యోల్బణం పెరగడం, ఉద్యోగం భద్రంగా ఉంటుందో లేదో అన్న అందోళనలు పట్టణవాసుల్లో అధికమయ్యాయని అంతర్జాతీయ మార్కెటింగ్‌ డేటా, బిజినెస్‌ అనలిటిక్స్‌ సంస్థ కాంటర్‌ పేర్కొంది.

• కాంటర్‌ ఇండియా బడ్జెట్‌ సర్వే

Layoffs | ముంబై, జనవరి 24: ద్రవ్యోల్బణం పెరగడం, ఉద్యోగం భద్రంగా ఉంటుందో లేదో అన్న అందోళనలు పట్టణవాసుల్లో అధికమయ్యాయని అంతర్జాతీయ మార్కెటింగ్‌ డేటా, బిజినెస్‌ అనలిటిక్స్‌ సంస్థ కాంటర్‌ పేర్కొంది. 2024-25 సంవత్సరానికి మధ్యంతర బడ్జెట్‌ను ఫిబ్రవరి 1న లోక్‌సభలో ప్రవేశపెట్టనున్న నేపథ్యంలో కాంటర్‌ ఇండియా కేంద్ర బడ్జెట్‌ సర్వేను బుధవారం విడుదల చేసింది. ఎన్నికల సంవత్సరం అయినందున ప్రజల ఆకాంక్షలకు అనుగుణంగా ప్రభుత్వం స్పందిస్తుందన్న అంచనాలు సర్వేలో వ్యక్తమయ్యాయని, ద్రవ్యోల్బణం అదుపునకు కఠిన చర్యలు చేపడుతుందని, ఆదాయపు పన్నుల్లో ఊరట లభిస్తుందని పట్టణవాసులు భావిస్తున్నారని కాంటర్‌ దక్షిణాసియా డివిజన్‌ ఎగ్జిక్యూటివ్‌ మేనేజింగ్‌ డైరెక్టర్‌ దీపేందర్‌ రాణా చెప్పారు.

సర్వే వివరాలు&

• సర్వేలో పాల్గొన్నవారిలో 57 శాతంమంది పెరుగుతున్న ద్రవ్యోల్బణం పట్ల ఆందోళన చెందుతున్నామన్నారు. 2023లో 27 శాతం మందే ధరలపట్ల ఆందోళన వ్యక్తంచేశారు.
• గత ఏడాదితో పోలిస్తే ధరల పోటు అధికశాతం ప్రజల్ని బాధిస్తున్నదని సర్వే వెల్లడించింది. మరోవైపు ఉద్యోగ భద్రతపై కూడా భయాలు పెరిగిపోయాయి.
• ప్రతీ ముగ్గురిలో ఒకరు లేఆఫ్స్‌ జరుగుతాయన్న ఆందోళనలో ఉన్నారని సర్వే పేర్కొంది.
• ఇక అంతర్జాతీయ అంశాలైన ఆర్థిక మాంద్యం భయం 48 శాతం మందిని, రాజకీయ భౌగోళిక ఉద్రిక్తతలు 45 శాతం మందిని ఆందోళనపరుస్తున్నాయి.
• వివిధ రకాల భయాలున్నప్పటికీ, అధికశాతం భారత్‌ ఆర్థికాభివృద్ధి పట్ల ఆశాభావాన్ని వ్యక్తం చేశారు.
• దేశంలోని 16 ప్రధాన నగరాల్లో 21-55 వయసు మధ్యగల 2,500మంది వినియోగదారులతో ఈ సర్వే నిర్వహించారు. ఇందులో ఉద్యోగులు, స్వయం ఉపాధి పొందుతున్నవారు, వ్యాపారస్తులు ఉన్నారు.
• కేంద్ర బడ్జెట్‌ నుంచి ఆశిస్తున్న వరాలు, అంచనాలపై వినియోగదారుల అభిప్రాయాల్ని సేకరించే లక్ష్యంతో సర్వే కొనసాగింది.
• బేసిక్‌ ఆదాయపు పన్ను మిహాయింపు పరిమితిని పెంచుతారని, స్టాండర్డ్‌ డిడెక్షన్‌ను రూ. 50,000 నుంచి 1,00,000కు చేరుస్తారన్న అంచనాలు వ్యక్తమయ్యాయి.
• హయ్యర్‌ టాక్స్‌ శ్లాబ్‌ను రూ. 15 లక్షలకు సవరించాలని, ఆపైన ఆదాయం ఉన్నవారం పన్ను రేటును 30 శాతం నుంచి తగ్గించాలని వ్యాపారులు, స్వయం ఉపాధి పొందుతున్నవారు ఆశిస్తున్నారు.
• మెడికల్‌ ఇన్సూరెన్స్‌ ప్రీమియంలపై సెక్షన్‌ 80 కింద డిడెక్షన్‌ పరిమితులు పెంచుతారన్న అంచనాల్ని వ్యక్తం చేశారు.
• సెక్షన్‌ 80సీ కింద మదుపు సాధనాలపై టాక్స్‌ రిబేట్‌ పెంపుదలను 70 శాతం మంది వినియోగదారులు కోరుతున్నారు.