Insurance Policy | ఆరోగ్య, జీవిత బీమాల విషయంలో మీరు ఈ జాగ్రత్తలు తీసుకుంటున్నారా?

ఆరోగ్య, జీవిత బీమాలు ఈ రోజుల్లో తప్పనిసరైపోయాయి. ప్రస్తుత పరిస్థితుల్లో దాదాపు అందరూ వీటికే మొదటి ప్రాధాన్యతను ఇస్తున్నారు. అయినప్పటికీ దేశంలో ఇన్సూరెన్స్‌ తీసుకునేవాళ్ల సంఖ్య ఇప్పటికీ 1 శాతానికి లోపే ఉందంటే ఎంతమాత్రం అతిశయోక్తి కాదు.

• అవసరాలకు తగ్గ ప్లాన్లతోనే రక్ష

Insurance Policy | ఆరోగ్య, జీవిత బీమాలు ఈ రోజుల్లో తప్పనిసరైపోయాయి. ప్రస్తుత పరిస్థితుల్లో దాదాపు అందరూ వీటికే మొదటి ప్రాధాన్యతను ఇస్తున్నారు. అయినప్పటికీ దేశంలో ఇన్సూరెన్స్‌ తీసుకునేవాళ్ల సంఖ్య ఇప్పటికీ 1 శాతానికి లోపే ఉందంటే ఎంతమాత్రం అతిశయోక్తి కాదు. ప్రపంచవ్యాప్తంగా ఉన్న 4 శాతం సగటుతో పోల్చినా మనం ఎక్కడో ఉన్నాం. అయితే వార్షికంగా 15 శాతం వరకూ వృద్ధిని సాధిస్తున్నామనే చెప్పాలి. అయినా ఇంకా లక్ష్యాలు చాలా దూరంలోనే ఉన్నాయనడంలో ఎటువంటి సందేహం లేదు.

అర్థవంతమైన పాలసీల కోసం..

సాధారణంగా ప్రతీ 2-3 నెలలకోసారి మనం మన ఈక్విటీ పోర్ట్‌ఫోలియోను సమీక్షించుకుంటూ ఉంటాం. స్టాక్స్‌ అయితే నిత్యం వాటిని ఓ కంట కనిపెడ్తూనే ఉంటాం. నెట్‌వర్త్‌ను కూడా ఏడాదికోసారైనా సరిచూసుకుని మన ఆస్తులు-అప్పుల స్థితిగతులేంటో ఓ అంచనాకు వస్తాం. కానీ హెల్త్‌, లైఫ్‌ పాలసీల విషయంలో అలాంటి జాగ్రత్తలు, సమీక్షలు చేసుకుంటున్నామా? లేదా? అనేది ప్రధానంగా మనం గమనించాల్సిన అంశం. ఒకసారి ఏదో పాలసీ తీసుకున్నాక, ఇక అవసరాలు పెరిగినా.. తగ్గినా.. వాటితో సంబంధం లేకుండా పాతవాటినే కొనసాగించడం వల్ల అర్థం లేదు. ఏదైనా అవసరం వచ్చినప్పుడు అవి అక్కరకు కూడా రావు. పెరుగుతున్న వయస్సు, బాధ్యతలు, అప్పులు.. ఇలా చాలా అంశాలను మనం ప్రధానంగా పరిగణనలోకి తీసుకోవాల్సి ఉంటుంది. ఈ రకంగా సమీక్షలు జరిపితేనే అర్థవంతమైన పాలసీలను అందుకోగలం.

హెల్త్‌ ఇన్సూరెన్స్‌ కవరేజీపై..

ఉద్యోగంలో చేరిన కొత్తలో ఏ రూ.2 లక్షలకో, రూ.3 లక్షలకో పాలసీని తీసుకుని ఉంటాం. కానీ మున్ముందు కుటుంబం పెరుగుతుంది. పిల్లలు వచ్చి చేరతారు, వాళ్లు పెద్దవారవుతారు. మీకూ వయస్సు పెరుగుతూ ఉంటుంది. అనారోగ్యాలు ఏవైనా కొత్తగా చుట్టుముట్టొచ్చు. కాబట్టి మనం మొదట్లో తీసుకున్న హెల్త్‌ కవరేజీ ఇప్పుడున్న పరిస్థితుల్లో సరిపోతుందా? అనేది ముఖ్యం. మెట్రో నగరాల్లో ఉన్నవాళ్లకు ఈ రోజుల్లో కనీసం రూ.10 లక్షలకు తక్కువగా కవరేజీ ఉన్నా ఉపయోగం లేదనిపిస్తోంది. 35 ఏండ్లు దాటి, నగరాల్లో ఉంటూ, ఇద్దరు పిల్లలుండి.. ఒకే ఆదాయంపై కుటుంబాన్ని పోషిస్తున్న పెద్దకు రూ.12-15 లక్షల వరకూ హెల్త్‌ కవరేజీ తప్పనిసరి. ఎందుకంటే వయస్సు పైబడుతున్నప్పుడు, ఏదైనా అనారోగ్యం వచ్చినప్పుడు, పదేపదే క్లెయిమ్స్‌ తీసుకుంటున్నప్పుడు కంపెనీలు మన కవరేజీని పెంచుకోవడానికి నిరాకరించే అవకాశాలు చాలా ఎక్కువగా ఉంటాయి. అందుకే మన అవసరాన్ని ముందే గుర్తుంచి వయస్సు, అనారోగ్యాల విషయంలో పాలసీ కవరేజీని పెంచుకోవడం ఉత్తమం.

ఫ్యామిలీ ఫ్లోటర్‌ పాలసీలు తీసుకోండి. ఇక నో క్లెయిం బోనస్‌లు (ఎన్‌సీబీ) వస్తున్నాయి కదా అని పాలసీ కవరేజీ పెంచుకోకపోతే ఏమవుతుంది అనుకోవద్దు. ఒకసారి ఎప్పుడైనా క్లెయిమ్‌ ఉపయోగిస్తే.. అంతవరకూ అక్యుములేట్‌ అయిన బోనస్‌ మొత్తం పోయి మీ బేస్‌ కవరేజీ మాత్రమే మిగులుతుంది. అయితే ఎన్‌సీబీ విషయంలో కొన్ని కంపెనీల విధానాలు వేరుగా ఉన్నాయి. క్లెయిం పెటు్టుకున్నాసరే అంతదాకా ఉన్న బేస్‌ కవరేజీ, బోనస్‌లను కొనసాగిస్తున్నాయి. అయితే ఇప్పుడున్న కంపెనీ వివిధ ఇతర కారణాలతో బేస్‌ కవరేజీని పెంచడానికి సిద్ధంగా లేకపోతే టాప్‌అప్‌ పాలసీలు, సూపర్‌ టాప్‌అప్‌లు తీసుకోవచ్చు. వీటి ధర కూడా కాస్త తక్కువే ఉంటుంది.

టర్మ్‌ ఇన్సూరెన్స్‌ తగ్గించుకోవచ్చా?

మీరు వయస్సులో ఉన్నప్పుడు, బాధ్యతలు ఎక్కువగా ఉన్నప్పుడు మీ రిస్క్‌ ప్రొఫైల్‌ కూడా ఎక్కువే ఉంటుంది. ఆ సమయంలో తప్పకుండా టర్మ్‌ ఇన్సూరెన్స్‌ ఎక్కువే ఉండాలి. దాన్ని కూడా పెంచుకుంటూ పోవాలి. పెండ్లి, పిల్లలు, గృహ రుణం, కార్‌ లోన్‌, పర్సనల్‌ లోన్స్‌.. ఇలా వీటి సంఖ్య పెరిగేకొద్దీ, మీపై బరువు బాధ్యతలు పెరుగుతూపోతాయి. కాబట్టి టర్మ్‌ ఇన్సూరెన్స్‌ కవరేజీని కూడా తప్పక పెంచుకోవాల్సిందే. ఏదో రూ.4-5 లక్షలకు ఎల్‌ఐసీ పాలసీ తీసుకున్నాం కదా చాల్లే అనుకుంటే ఏదైనా అనుకోని ఘటన జరిగినప్పుడు కుటుంబం ఇరుకున పడుతుంది. కావున టర్మ్‌ ఇన్సూరెన్స్‌ను తగ్గించుకోవాలన్న ఆలోచననే మదిలోకి రానివ్వకండి. పాలసీ ఎంత ఎక్కువగా ఉంటే మనం దూరమైనప్పుడు మన కుటుంబాలకు అంతగా కష్టాల్ని తగ్గించినవారమవుతాం.

-నాగేంద్రసాయి కుందవరం