Home Loan | రివర్స్‌ మార్ట్‌గేజ్‌.. ఈ గృహ రుణం ఎవరికి.. ఎలా వస్తుందో తెలుసా!

సంప్రదాయ గృహ రుణానికి భిన్నంగా ఇటీవలికాలంలో రివర్స్‌ మార్ట్‌గేజ్‌ లోన్లు స్థిరాస్తి మార్కెట్‌లో పాపులారిటీని సంతరించుకుంటున్నాయి. వృద్ధాప్యంలో  ఏ ఆదాయం లేని ఇంటి యజమానులకు నిజంగా ఇవి ఆర్థిక భరోసానే కల్పిస్తున్నాయి.

Home Loan | సంప్రదాయ గృహ రుణానికి భిన్నంగా ఇటీవలికాలంలో రివర్స్‌ మార్ట్‌గేజ్‌ లోన్లు స్థిరాస్తి మార్కెట్‌లో పాపులారిటీని సంతరించుకుంటున్నాయి. వృద్ధాప్యంలో  ఏ ఆదాయం లేని ఇంటి యజమానులకు నిజంగా ఇవి ఆర్థిక భరోసానే కల్పిస్తున్నాయి. నగదు అవసరాలు లేదా ఇతరత్రా జీవన వ్యయాల కోసం ఉన్న ఇంటిని అమ్ముకొని రోడ్డునపడకుండా ఉన్న ఇంట్లోనే సంతోషంగా ఉంటూ ఆర్థిక భద్రతను పొందేలా ఈ లోన్లు సీనియర్‌ సిటిజన్లకు కలిసొస్తున్నాయి.

ఏయే రకాలు?

హోం ఈక్విటీ కన్వర్షన్‌ మార్ట్‌గేజ్‌

ఈ హెచ్‌ఈసీఎం పథకం అత్యంత ఆదరణ కలిగినది. రివర్స్‌ మార్ట్‌గేజ్‌ వెసులుబాటు విస్తృతంగా అందుబాటులో ఉంటుంది. 62, ఆపై వయసు కలిగినవారి కోసం దీన్ని రూపొందించారు. ఇంటి ఈక్విటీలో కొంత భాగాన్ని నగదులోకి మార్చుకోవచ్చు.

ప్రొప్రైటరీ రివర్స్‌ మార్ట్‌గేజ్‌

ఈ సదుపాయాన్ని ప్రైవేట్‌ బ్యాంకులు, బ్యాంకింగేతర ఆర్థిక సంస్థలు అందిస్తున్నాయి. అధిక విలువ కలిగిన ఇంటి యజమానుల కోసం దీన్ని డిజైన్‌ చేశారు. అయితే హెచ్‌ఈసీఎంకు అర్హత లేకపోతేనే దీనికి అర్హులు.

సింగిల్‌-పర్పస్‌ రివర్స్‌ మార్ట్‌గేజ్‌

• ఓ నిర్ధిష్ట అవసరం కోసం నగదు కావాలనుకునే ఇంటి యజమానులను దృష్టిలో పెట్టుకొని తెచ్చినదే ఈ పథకం. ఇంటి అభివృద్ధికైనా లేదా వైద్య ఖర్చులైనా కావచ్చు. దీన్ని నాన్‌-ప్రాఫిట్‌ ఆర్గనైజేషన్స్‌, ప్రభుత్వ ఏజెన్సీలు వాడుకొంటాయి.
• ఏయే డాక్యుమెంట్లు అవసరం?
• రివర్స్‌ మార్ట్‌గేజ్‌ లోన్‌ పొందడానికి ఓటర్‌ ఐడీ, పాన్‌, ఆధార్‌, పాస్‌పోర్ట్‌, ఎంప్లాయీస్‌ ఐడీ కార్డ్‌ వంటి ఐడెంటిటీ ప్రూఫ్‌లు అవసరం.
• అడ్రస్‌ ప్రూఫ్‌లుగా ఓటర్‌ ఐడీ కార్డ్‌, కరెంట్‌ బిల్లు, పాస్‌పోర్ట్‌ వంటివి చూపించవచ్చు.
• ఇల్లు మీదే అని చెప్పడానికి టైటిల్‌ డీడ్‌, ప్రాపర్టీ ట్యాక్స్‌ రశీదులు, మీ పేరిట ఉన్న కరెంట్‌ లేదా గ్యాస్‌ ఇతరత్రా బిల్లులు కావాలి.
• పాస్‌పోర్ట్‌ సైజ్‌ ఫోటోలు అవసరం. కావాల్సిన మరికొన్ని పత్రాలనూ సమర్పించాల్సిందిగా రుణదాతలు కోరవచ్చు.

ఫీజులు-చార్జీలు

• ఈ రివర్స్‌ మార్ట్‌గేజ్‌ లోన్‌ కోసం ఫీజులు, చార్జీలు ఆయా బ్యాంకులు లేదా బ్యాంకింగేతర ఆర్థిక సంస్థలనుబట్టి మారుతూ ఉన్నాయి.
• ప్రాసెసింగ్‌ ఫీజు, స్టాంప్‌ డ్యూటీ, మార్ట్‌గేజ్‌ రిజిస్ట్రేషన్‌ చార్జీలు వంటివి ఉంటాయి.
• రుణం తీసుకున్నాక నిబంధనలకు విరుద్ధంగా ముందే చెల్లించినా, ఒక బ్యాంక్‌ నుంచి మరో బ్యాంక్‌ లేదా సంస్థలకు మారినా జరిమానాలు పడుతాయి.
• హోం ఇన్సూరెన్స్‌ పాలసీకి సంబంధించి అన్ని ప్రీమియంల చెల్లింపులు సకాలంలో ఉండాలి.
  గుర్తుంచుకోండి
• సాధారణ గృహ రుణాలతో పోల్చితే ఈ రివర్స్‌ మార్ట్‌గేజ్‌ లోన్లపై అధిక వడ్డీరేట్లు పడుతాయి.
• మార్కెట్‌ ట్రెండ్‌కు తగ్గట్టే ఫిక్స్‌డ్‌ లేదా ఫ్లోటింగ్‌ రేట్ల విధానాలను రుణగ్రహీతలు ఎంచుకోవచ్చు.
• ఆదాయ పన్ను (ఐటీ) చట్టంలోని సెక్షన్‌ 10(43) కింద ఈ రుణం ద్వారా అందుకునే లంప్సమ్‌ లేదా వాయిదా చెల్లింపుల ఆదాయంపై సీనియర్‌ సిటిజన్ల (రుణగ్రహీతలు)కు పన్ను మినహాయింపుంటుంది.
• ఈ లోన్‌ తీసుకునేటప్పుడు తెలియకపోతే ఏ డాక్యుమెంట్లపైనా సంతకాలు చేయవద్దు. గుర్తుతెలియని సంస్థలు ఆఫర్‌ చేసే రివర్స్‌ మార్ట్‌గేజ్‌ లోన్ల వైపు వెళ్లకపోవడమే మంచిది.
• మరింత సమాచారం, అవగాహన కోసం బ్యాంకులకు నేరుగా వెళ్లి, అక్కడి ప్రతినిధులను సంప్రదించడం ఉత్తమం.
• రుణం కావాలను కునేవారికి ఆన్‌లైన్‌ దరఖాస్తుతో 4 రోజుల్లోనే అప్రూవల్‌ ఇస్తున్న దేశంలోని పలు ప్రైవేట్‌ బ్యాంకులు.

అర్హత ఏంటి?

• రుణగ్రహీతకు 60 ఏండ్లు, ఆపైనే ఉండాలి. కో-బారోవర్‌గా భర్త లేదా భార్య ఉంటే వారి వయసూ 55 ఏండ్లు దాటాలి.
• ఏ ఇంటి ద్వారా మీరు రివర్స్‌ మార్ట్‌గేజ్‌ లోన్‌కు వెళ్లాలనుకుంటున్నారో.. ఆ ఇల్లు మీకు (రుణగ్రహీత) పూర్తిగా సొంతమైనదై ఉండాలి. అలాగే ఆ ఇల్లు మీ ప్రధాన నివాసమై ఉండాలి. అంతేగాక ఇంకా 20 ఏండ్లకుపైగా నివాసయోగ్యమైనదై ఉండాలి.
• రివర్స్‌ మార్ట్‌గేజ్‌ లోన్‌ తీసుకునే ఇంటికి ఎలాంటి న్యాయపరమైన సమస్యలు ఉండకూడదు. దానిపై ఏ అప్పులూ ఉండరాదు. ఇంటికి ఏ సమస్య లేకుండా ఎప్పటికప్పుడు రిపేర్‌ చేస్తూ చక్కగా కాపాడుకోవాలి.
• రుణగ్రహీత ఆదాయం, క్రెడిట్‌ స్కోర్‌, అప్పు చెల్లించే సామర్థ్యం ఇలాంటి వేటినీ రుణదాత (బ్యాంక్‌ లేదా బ్యాంకింగేతర ఆర్థిక సంస్థ)లు పరిశీలించారు. ఇంటి పరిస్థితి, దానికి సంబంధించిన అన్ని అంశాలనే క్షుణ్ణంగా చూస్తారు.

ఇదీ సంగతి..

• రివర్స్‌ మార్ట్‌గేజ్‌లో ఇంటి విలువలో 80 శాతందాకా రుణంగా లభిస్తుంది.
• ఒకేసారి లేదా నెల, త్రైమాసిక, అర్ధవార్షిక, వార్షిక వాయిదాల్లో ఇంటి యజమాని (రుణగ్రహీత)కి రుణం సొమ్ము అందుతుంది.
• రుణం తీసుకున్నాక ఆ ఇంట్లోనే రుణగ్రహీతలు ఉండవచ్చు. ఇంటిని అమ్ముకోవడమో, లేకుంటే ఖాళీ చేయడమో, లేదా రుణగ్రహీత(లు) చనిపోయాకే రుణం, వడ్డీ చెల్లింపులు మొదలవుతాయి. అప్పటిదాకా ఎలాంటి చెల్లింపులుండవు.
• తీసుకున్న రుణం పూర్తిగా చెల్లించాకే రుణగ్రహీత (యజమాని) లేదా వారసులకు ఇంటిపై మళ్లీ హక్కులు వస్తాయి.
• రుణం చెల్లించలేని పరిస్థితులు తలెత్తితే రుణం ఇచ్చినవారు ఇంటిని వేలం వేసి బకాయిలను వసూలు చేసుకుంటారు.