RIL | భారత్‌లో అత్యంత విలువైన కంపెనీగా ఆర్‌ఐఎల్‌.. ప్రపంచంలో 44వ స్థానం

భారత్‌లో అత్యంత విలువైన కంపెనీగా ముకేశ్‌ అంబానీ నేతృత్వంలోని రిలయన్స్‌ ఇండస్ట్రీస్‌ (ఆర్‌ఐఎల్‌) నిలిచింది. బుధవారం విడుదలైన 2023 హురున్‌ గ్లోబల్‌-500 జాబితా ప్రకారం ప్రపంచ కార్పొరేట్‌ దిగ్గజాల్లో ఆర్‌ఐఎల్‌ 198 బిలియన్‌ డాలర్ల విలువతో 44వ స్థానాన్ని సంపాదించింది. అయితే 2022తో పోలిస్తే ఈ కంపెనీ విలువ గత ఏడాది 2023లో 2 శాతం తగ్గినందున పది స్థానాల్ని కోల్పోయింది.

• 2023 హురున్‌ గ్లోబల్‌-500 జాబితా

RIL | న్యూఢిల్లీ, జనవరి 31: భారత్‌లో అత్యంత విలువైన కంపెనీగా ముకేశ్‌ అంబానీ నేతృత్వంలోని రిలయన్స్‌ ఇండస్ట్రీస్‌ (ఆర్‌ఐఎల్‌) నిలిచింది. బుధవారం విడుదలైన 2023 హురున్‌ గ్లోబల్‌-500 జాబితా ప్రకారం ప్రపంచ కార్పొరేట్‌ దిగ్గజాల్లో ఆర్‌ఐఎల్‌ 198 బిలియన్‌ డాలర్ల విలువతో 44వ స్థానాన్ని సంపాదించింది. అయితే 2022తో పోలిస్తే ఈ కంపెనీ విలువ గత ఏడాది 2023లో 2 శాతం తగ్గినందున పది స్థానాల్ని కోల్పోయింది. టాప్‌-100లో మొత్తం మూడు భారతీయ కంపెనీలు ఉన్నాయి. వివరాలు&

• ఆర్‌ఐఎల్‌ తర్వాత టాటా కన్సల్టెన్సీ సర్వీసెస్‌ (టీసీఎస్‌) 60వ స్థానంలోనూ, హెచ్‌డీఎఫ్‌సీ బ్యాంక్‌ 68వ స్థానంలోనూ ఉన్నాయి.
• 2023లో టీసీఎస్‌ షేరు 14 శాతం పెరగడంతో 158 బిలియన్‌ డాలర్ల విలువతో 5 స్థానాల్ని మెరుగుపర్చుకుంది.
• మాతృసంస్థ హెచ్‌డీఎఫ్‌సీ విలీనం కావడంతో హెచ్‌డీఎఫ్‌సీ బ్యాంక్‌ ఏకంగా 43 మెట్లు ఎక్కి 68వ స్థానాన్ని అందుకుంది.
• హురున్‌ గ్లోబల్‌ టాప్‌ 500 ర్యాంకింగ్స్‌లో కొత్తగా చేరిన భారతీయ కంపెనీల్లో టైటాన్‌, సన్‌ఫార్మాలు ఉన్నాయి.
• అయితే విలువలు క్షీణించిన కారణంగా జాబితా నుంచి 48 భారతీయ కంపెనీలు వైదొలిగాయి. ఇందులో అదానీ గ్రూప్‌ కంపెనీలు అదానీ ట్రాన్స్‌మిషన్‌, అదానీ గ్రీన్‌ ఎనర్జీ, అదానీ టోటల్‌ గ్యాస్‌లు ఉన్నాయి.
• మొత్తం టాప్‌ 500 కంపెనీల్లో భారత్‌ కంపెనీలు 18 మాత్రమే ఉన్నాయి. అధిక విలువకలిగిన కంపెనీలు ఉన్న దేశాల జాబితాలో భారత్‌ ఒక ర్యాంక్‌ కోల్పోయి ఆరవ స్థానంలో నిలిచింది.
• ప్రపంచ చరిత్రలో తొలిసారిగా 1 ట్రిలియన్‌ డాలర్ల విలువను ఐదు కంపెనీలు అందుకున్నాయని హురున్‌ తెలిపింది. అవి..యాపిల్‌, మైక్రోసాఫ్ట్‌, అల్ఫాబెట్‌ (గూగుల్‌ మాతృసంస్థ), అమెజాన్‌, సెమికండక్టర్స్‌ కంపెనీ ఎన్విడియాలు. జాబితాలో ఇవి వరుసగా తొలి ఐదు ర్యాంకుల్లో ఉన్నాయి.
• సంచలనం సృష్టిస్తున్న ఆర్టిఫీషియల్‌ ఇంటిలిజెన్స్‌ (ఏఐ) సాఫ్ట్‌వేర్‌ చాట్‌జీపీటీ కారణంగానే మైక్రోసాఫ్ట్‌, ఎన్విడియాల విలువ గణనీయంగా పెరిగింది. చాట్‌జీపీటీ సృష్టికర్త ఓపెన్‌ఏఐలో మైక్రోసాఫ్ట్‌ భారీ పెట్టుబడులు చేయడం, ఏఐకి అవసరమైన సెమీకండక్టర్స్‌ను ఎన్విడియా సరఫరా చేస్తుండటం ఇందుకు కారణం.
• తైవాన్‌కు చెందిన మరో సెమీకండక్టర్‌ కంపెనీ టీఎస్‌ఎంసీ 512 బిలియన్‌ డాలర్ల విలువతో టాప్‌-10లో చోటు సంపాదించింది.
• కొత్తగా వెయిట్‌టాస్‌ ఔషధం జెప్‌బౌండ్‌ను ప్రవేశపెట్టిన ఫార్మా దిగ్గజం ఎలి లిల్లీ సైతం 526 బిలియన్‌ డాలర్ల విలువతో తొలిసారిగా టాప్‌-10లోకి అడుగుపెట్టింది.