ఆర్బీఐ ద్రవ్యసమీక్షపై ఆధారం!.. ఆర్థిక ఫలితాలు, ట్రంప్‌ సుంకాలూ కీలకమే

దేశీయ స్టాక్‌ మార్కెట్లలో అమ్మకాల ఒత్తిడి కొనసాగుతున్నది. మదుపరులు లాభాల స్వీకరణకు పెద్దపీట వేస్తున్నారు. ఈ క్రమంలోనే అంతకుముందు వారం ముగింపుతో చూస్తే గత వారం బాంబే స్టాక్‌ ఎక్సేంజ్‌ (బీఎస్‌ఈ) ప్రధాన సూచీ సెన్సెక్స్‌ 863.18 పాయింట్లు లేదా 1.05 శాతం పతనమై 80,599.91 వద్ద ముగిసింది.

దేశీయ స్టాక్‌ మార్కెట్లలో అమ్మకాల ఒత్తిడి కొనసాగుతున్నది. మదుపరులు లాభాల స్వీకరణకు పెద్దపీట వేస్తున్నారు. ఈ క్రమంలోనే అంతకుముందు వారం ముగింపుతో చూస్తే గత వారం బాంబే స్టాక్‌ ఎక్సేంజ్‌ (బీఎస్‌ఈ) ప్రధాన సూచీ సెన్సెక్స్‌ 863.18 పాయింట్లు లేదా 1.05 శాతం పతనమై 80,599.91 వద్ద ముగిసింది. నేషనల్‌ స్టాక్‌ ఎక్సేంజ్‌ (ఎన్‌ఎస్‌ఈ) సూచీ నిఫ్టీ 271.65 పాయింట్లు లేదా 1.09 శాతం క్షీణించి 24,565.35 దగ్గర నిలిచింది. కాగా, ప్రస్తుత ఆర్థిక సంవత్సరం (2025-26) తొలి త్రైమాసికానికి (ఏప్రిల్‌-జూన్‌)గాను ఆయా కంపెనీలు ప్రకటించే ఆర్థిక ఫలితాలు ఈ వారం మార్కెట్‌ కదలికలకు దిక్సూచి అంటున్నారు.

మార్కెట్‌ అంచనాలను అందుకోవడంలో కార్పొరేట్‌ సంస్థలు నిరాశపరుస్తున్నాయి. ఇప్పటిదాకా వచ్చిన ఫలితాల్లో మెజారిటీ ఇలాగే ఉన్నాయి మరి. ఈ నేపథ్యంలో ఈ వారం కూడా ఇవి కీలకం కానున్నాయని మిక్కిలి మార్కెట్‌ విశ్లేషకుల మాట. అయితే రిజర్వ్‌ బ్యాంక్‌ ఆఫ్‌ ఇండియా (ఆర్బీఐ) ద్వైమాసిక ద్రవ్యపరపతి విధాన సమీక్ష నిర్ణయాలే ముఖ్యమని చెప్తున్నారు. ఈ ఏడాదిలో ఇప్పటిదాకా జరిగిన మూడు ద్రవ్యసమీక్షల్లో 1 శాతం రెపోరేటును ఆర్బీఐ కోత పెట్టిన విషయం తెలిసిందే. దీంతో ఈసారి (బుధవారం) ఏ నిర్ణయం తీసుకుంటుందోనన్న ఉత్కంఠ అంతటా నెలకొన్నది. వడ్డీరేట్లు తగ్గితే బ్యాంకింగ్‌, రియల్టీ, ఆటో షేర్లు ఆకర్షణీయంగా మారవచ్చు. అలాగే అమెరికా అధ్యక్షుడు డొనాల్డ్‌ ట్రంప్‌ విధించిన సుంకాల ప్రభావం కూడా మార్కెట్లపై ఉంటుంది.

ఇక ఎప్పట్లాగే డాలర్‌తో పోల్చితే రూపాయి మారకం విలువ, గ్లోబల్‌ స్టాక్‌ మార్కెట్ల తీరుతెన్నులు, విదేశీ మదుపరుల పెట్టుబడులు, ముడి చమురు ధరలు, అంతర్జాతీయ పరిణామాలూ ముఖ్యమేనని చెప్పవచ్చు. కాగా, అమ్మకాల ఒత్తిడి కనిపిస్తే నిఫ్టీకి 24,200 పాయింట్ల స్థాయి కీలకమైనదనుకోవచ్చు. దీనికి దిగువన ముగిస్తే 24,000 పాయింట్ల స్థాయిని మద్దతుగా చెప్పుకోవచ్చని అత్యధిక నిపుణుల మాట. అయితే సూచీలు పరుగందుకుం టే ఈ వారం నిఫ్టీ 24,800-25,100 స్థాయికి వెళ్లవచ్చని కూడా చెప్తున్నారు.

గమనిక..

స్టాక్‌ మార్కెట్‌ పెట్టుబడులు రిస్క్‌తో కూడుకున్నవి. వివిధ దేశ, విదేశీ పరిణామాలు ట్రేడింగ్‌ను ఎక్కువగా ప్రభావితం చేస్తుంటాయి. కాబట్టి ఇక్కడ ఒడుదొడుకులు చాలా సహజం. పెట్టుబడులు పెట్టే ముందు ఆర్థిక నిపుణుల సలహా తీసుకోవడం, ఆయా సాధనాల డాక్యుమెంట్లను క్షుణ్ణంగా చదువుకోవడం ఉత్తమం. అలాగే పైన పేర్కొన్న సూచనలు విశ్లేషకుల అభిప్రాయం మాత్రమే. దీనికి మా పత్రిక ఎటువంటి బాధ్యత వహించదు. ఎవరి పెట్టుబడులకు వారిదే పూర్తి బాధ్యత. అవగాహన కోసమే ఈ మార్కెట్‌ పల్స్‌.