క్యూ4లో నిరాశపరిచిన ఇన్ఫీ

దేశంలో ద్వితీయ ఐటి దిగ్గజం ఇన్ఫోసిస్‌ నిరుత్సాహకరమైన ఆర్థిక ఫలితాల్ని వెల్లడించింది. 2022-23 నాలుగో త్రైమాసికంలో ఆదాయ, లాభాల వృద్ధిపై విశ్లేషకులు అంచనాలను ఇన్ఫోసిస్‌ చేరలేకపోయింది.

• విశ్లేషకుల అంచనాలు మిస్‌
• ఆదాయం రూ.37,441 కోట్లు, నికరలాభం రూ.6,128 కోట్లు

‘మధ్యకాలికంగా అధిక మార్జిన్లు ఆర్జించేందుకు మేము బాట వేసుకుంటున్నాం. మా సిబ్బందిపై పెట్టుబడి చేస్తూనే ఉంటాం. మా క్లయింట్లకు మద్దతుగా నిలుస్తాం. మా సమర్థత, వ్యయ నియంత్రణ పట్ల క్లయింట్లకు ఉన్న ఆసక్తి కారణంగా పెద్ద డీల్స్‌ సాధించాం’

-సలీల్‌ పరేఖ్‌, సీఈవో, ఇన్ఫోసిస్‌

ముంబై, ఏప్రిల్‌ 13: దేశంలో ద్వితీయ ఐటి దిగ్గజం ఇన్ఫోసిస్‌ నిరుత్సాహకరమైన ఆర్థిక ఫలితాల్ని వెల్లడించింది. 2022-23 నాలుగో త్రైమాసికంలో ఆదాయ, లాభాల వృద్ధిపై విశ్లేషకులు అంచనాలను ఇన్ఫోసిస్‌ చేరలేకపోయింది. ముగిసిన క్యూ4లో కంపెనీ కన్సాలిడేటెడ్‌ నికరలాభం గత ఏడాది ఇదేకాలంతో పోలిస్తే 8 శాతం వృద్ధితో రూ.6,128 కోట్లకు చేరింది. కన్సాలిడేటెడ్‌ ఆదాయం రూ.37,441 కోట్లుగా నమోదయ్యింది. ఆదాయం రూ.38,800 కోట్లు, నికరలాభం రూ. 6,550 కోట్లు ఉండవచ్చని మెజారిటీ విశ్లేషకులు అంచనా వేశారు. ఇక క్యూ3 (అక్టోబర్‌-డిసెంబర్‌)తో పోలిస్తే కంపెనీ నికరలాభం 7 శాతం క్షీణించగా, ఆదాయం 2.3 శాతం తగ్గింది. ఇన్వెస్టర్లు ఆసక్తిగా వేచిచూసే గైడెన్స్‌లో సైతం ఇన్ఫీ నిరుత్సాహపర్చింది. 2023-24 ఆర్థిక సంవత్సరంలో ఆదాయం కేవలం 4-7 శాతం మధ్య వృద్ధిచెందవచ్చన్న గైడెన్స్‌ను వెల్లడించింది. ఐటీ కంపెనీలకు ప్రధాన వ్యాపార ప్రాంతాలైన పశ్చిమ దేశాల్లో అనిశ్చిత పరిస్థితుల్ని ఈ గైడెన్స్‌ ప్రతిబింబిస్తున్నదని విశ్లేషకులు వ్యాఖ్యానించారు. గురువారం సమావేశమైన కంపెనీ డైరెక్టర్ల బోర్డు ఒక్కో షేరుకు రూ.17.50 చొప్పున డివిడెండ్‌ను సిఫార్సు చేసింది. డివిడెండ్‌ చెల్లింపునకు జూన్‌ 2 రికార్డు తేదీగా నిర్ణయించారు.

తగ్గిన ఉద్యోగుల సంఖ్య

ముగిసిన ఆర్థిక సంవత్సరం డిసెంబర్‌ 31తో పోలిస్తే ఇన్ఫోసిస్‌ మొత్తం ఉద్యోగుల సంఖ్య 3,46,845 నుంచి 3,43,234కు తగ్గింది. అలాగే వలసల రేటు 20.9 శాతానికి తగ్గినట్టు కంపెనీ తెలిపింది.

ప్రధానాంశాలు..

• 2022-23లో 16-16.50 శాతం గైడెన్స్‌ను వెల్లడించగా దీంట్లో 15.4 శాతం వృద్ధిని మాత్రమే సాధించింది.
• ఆపరేటింగ్‌ లాభాల మార్జిన్ల గైడెన్స్‌ 21 శాతం కనపర్చింది. ఈ జనవరి-మార్చి త్రైమాసికంలో ఆపరేటింగ్‌ మార్జిన్‌ 50 బేసిస్‌ పాయింట్ల మేర తగ్గింది.
• ముగిసిన క్వార్టర్లో 2.1 బిలియన్‌ డాలర్ల డీల్స్‌ను సంపాదించింది. దీంతో పూర్తి ఏడాదిలో ఆర్డర్ల విలువ 9.8 బిలియన్‌ డాలర్లకు చేరింది.
• ఇన్ఫోసిస్‌కు ప్రధాన ఆదాయ వనరు బీఎఫ్‌ఎస్‌ఐ వ్యాపారం దెబ్బతిన్నది. మార్చి త్రైమాసికంలో ఈ వెర్టికల్‌ ఆదాయం 1.7 శాతం క్షీణించింది.
• మార్చి త్రైమాసికంలో కంపెనీ 100 మిలియన్‌ డాలర్ల బాస్కెట్‌లో ఇద్దరు క్లయింట్లను సంపాదించింది. దీంతో ఈ విభాగంలో మొత్తం క్లయింట్ల సంఖ్య 40కి చేరింది.