ఫెడ్‌ ద్రవ్య సమీక్షపై ఆధారం

దేశీయ స్టాక్‌ మార్కెట్లు తీవ్ర ఆటుపోట్లకు లోనవుతున్నాయి. అమెరికా-ఇరాన్‌ దాడులు, ప్రతిదాడులతో పశ్చిమాసియాలో నెలకొన్న ఉద్రిక్తకర వాతావరణం, ఈ ఆర్థిక సంవత్సరం (2026-27) తొలి త్రైమాసికానికి (ఏప్రిల్‌-జూన్‌ లేదా క్యూ1)గాను ప్రభుత్వ, ప్రైవేట్‌ రంగ సంస్థలు ప్రకటిస్తున్న ఆర్థిక ఫలితాలు ఆశించిన స్థాయిలో లేకపోవడం.. మదుపర్లను అమ్మకాల ఒత్తిడికి గురిచేస్తున్నాయి.

• క్యూ1 ఫలితాలు, మిడిల్‌ ఈస్ట్‌ ఉద్రిక్తతలూ ప్రధానమే
• మార్కెట్‌ పల్స్‌

దేశీయ స్టాక్‌ మార్కెట్లు తీవ్ర ఆటుపోట్లకు లోనవుతున్నాయి. అమెరికా-ఇరాన్‌ దాడులు, ప్రతిదాడులతో పశ్చిమాసియాలో నెలకొన్న ఉద్రిక్తకర వాతావరణం, ఈ ఆర్థిక సంవత్సరం (2026-27) తొలి త్రైమాసికానికి (ఏప్రిల్‌-జూన్‌ లేదా క్యూ1)గాను ప్రభుత్వ, ప్రైవేట్‌ రంగ సంస్థలు ప్రకటిస్తున్న ఆర్థిక ఫలితాలు ఆశించిన స్థాయిలో లేకపోవడం.. మదుపర్లను అమ్మకాల ఒత్తిడికి గురిచేస్తున్నాయి. ఈ క్రమంలోనే అంతకుముందు వారంతో పోల్చితే గత వారం సెన్సెక్స్‌ 2,091.68 పాయింట్లు క్షీణించి 76,059.77 వద్ద నిలిచింది. నిఫ్టీ 566.85 పాయింట్లు పతనమై 23,767.45 దగ్గర స్థిరపడింది. ఇక ఈ వారం ముడి చమురు ధరలు, క్యూ1 ఆర్థిక ఫలితాలకుతోడు.. మంగళ, బుధవారాల్లో జరిగే అమెరికా ఫెడరల్‌ రిజర్వ్‌ బ్యాంక్‌ ద్రవ్య సమీక్షలో తీసుకొనే నిర్ణయాలు కూడా భారతీయ స్టాక్‌ మార్కెట్ల కదలికలకు కీలకం కానున్నాయి. అలాగే డాలర్‌తో పోల్చితే రూపాయి మారకం విలువ, అంతర్జాతీయ మార్కెట్ల తీరుతెన్నులు, ఎల్‌ నినో సంబంధిత సమాచారం సైతం ప్రధానమే. కాగా, బ్యాంకింగ్‌, ఆటో, ఆయిల్‌ షేర్లలో సెల్లింగ్‌ ప్రెషర్‌కు అవకాశాలున్నాయి. ఇక అమ్మకాల ఒత్తిడి కనిపిస్తే నిఫ్టీకి 23,500 పాయింట్ల స్థాయి కీలకమైనదనుకోవచ్చు. దీనికి దిగువన ముగిస్తే 23,300 పాయింట్ల స్థాయిని మద్దతుగా చెప్పుకోవచ్చని అత్యధిక నిపుణుల మాట. సూచీలు పరుగందుకుంటే ఈ వారం నిఫ్టీ 24,000-24,200 పాయింట్ల స్థాయికి వెళ్లవచ్చనీ చెప్తున్నారు.

గమనిక..
స్టాక్‌ మార్కెట్‌ పెట్టుబడులు రిస్క్‌తో కూడుకున్నవి. వివిధ దేశ, విదేశీ పరిణామాలు ట్రేడింగ్‌ను ఎక్కువగా ప్రభావితం చేస్తుంటాయి. కాబట్టి ఇక్కడ ఒడిదుడుకులు చాలా సహజం. పెట్టుబడులు పెట్టే ముందు ఆర్థిక నిపుణుల సలహా తీసుకోవడం, ఆయా సాధనాల డాక్యుమెంట్లను క్షుణ్ణంగా చదువుకోవడం ఉత్తమం. అలాగే పైన పేర్కొన్న వివరాలు విశ్లేషకుల అభిప్రాయం మాత్రమే. దీనికి మా పత్రిక ఎటువంటి బాధ్యత వహించదు.

ఇల్లు కొంటున్నారా?.. ఈ పత్రాలను సరిచూసుకోండి

• చట్టప్రకారం క్రయవిక్రయ లావాదేవీలు పూర్తయ్యాయనే సేల్‌ డీడ్‌
• ఆస్తి యాజమాన్య చరిత్రను తెలియజేసే మదర్‌ డీడ్‌
• ఆర్థిక, న్యాయపరమైన వివాదాల్లేవని ధ్రువీకరించే ఎన్‌క్యుంబ్రెన్స్‌ సర్టిఫికెట్‌ (ఈసీ)
• ప్రాపర్టీ నిర్మాణం పూర్తయినట్టు స్థానిక అధికారులిచ్చే కంప్లీషన్‌ సర్టిఫికెట్‌
• ప్లాన్‌ ప్రకారమే నిర్మించారని సంబంధిత అధికారులిచ్చే ఆక్యుపెన్సీ సర్టిఫికెట్‌
• బయ్యర్‌కు కేటాయించినట్టుగా హౌసింగ్‌ అథారిటీ నుంచి అలాట్‌మెంట్‌ లెటర్‌
• బిల్డర్‌/డెవలపర్‌ నుంచి ఆస్తి స్వాధీనాన్ని చూపించే పొసెషన్‌ లెటర్‌
• మున్సిపల్‌/రెవెన్యూ శాఖల నుంచి ఆస్తి బదిలీ అయ్యిందన్న మ్యుటేషన్‌ లెటర్‌
• జల, విద్యుత్తు, అగ్నిమాపక తదితర స్థానిక శాఖల నుంచి ఎన్‌వోసీలు
• రెరా నమోదు ధ్రువీకరణ పత్రం
  l పన్ను చెల్లింపు రశీదులు