పడకేసిన ఉడాన్‌ లక్ష్యం

ప్రతి ఒక్కరు జీవితంలో ఒక్కసారైనా విమానమెక్కాలనుకుంటారు. ఆకాశ మార్గాన విహరించాలని కోరుకుంటారు. అయితే ఈ సంకల్పంతో ప్రారంభించిన ఉడాన్‌ పథకం అమలు.. ఆశించిన స్థాయిలో లేదంటూ కేంద్ర ప్రభుత్వానికి కాగ్‌ అక్షింతలేసింది. ఆర్భాటంతో ప్రారంభించిన ఈ పథకం కింద అనుకున్న లక్ష్యం ప్రకారం సగం కంటే ఎక్కువ మార్గాలలో కూడా విమాన సర్వీసులు నడిపించలేకపోయారని తప్పుబట్టింది.

• 52 శాతం రూట్లలో ప్రారంభం కాని విమాన సేవలు
• పదిరెట్లు పెరిగిన ప్రయాణికులు నిరుపయోగంగా విమానాశ్రయాలు, హెలిప్యాడ్లు
• కేంద్రం తీరును తప్పుబట్టిన కాగ్‌
• పకడ్బందీగా అమలుకు 16 సిఫార్సులు

(స్పెషల్‌ టాస్క్‌ బ్యూరో) హైదరాబాద్‌, ఆగస్టు 16 (నమస్తే తెలంగాణ): ప్రతి ఒక్కరు జీవితంలో ఒక్కసారైనా విమానమెక్కాలనుకుంటారు. ఆకాశ మార్గాన విహరించాలని కోరుకుంటారు. అయితే ఈ సంకల్పంతో ప్రారంభించిన ఉడాన్‌ పథకం అమలు.. ఆశించిన స్థాయిలో లేదంటూ కేంద్ర ప్రభుత్వానికి కాగ్‌ అక్షింతలేసింది. ఆర్భాటంతో ప్రారంభించిన ఈ పథకం కింద అనుకున్న లక్ష్యం ప్రకారం సగం కంటే ఎక్కువ మార్గాలలో కూడా విమాన సర్వీసులు నడిపించలేకపోయారని తప్పుబట్టింది. 774 రూట్లలో విమాన సర్వీసులు నడిపించాలని కేంద్రం లక్ష్యంగా పెట్టుకున్నది. కానీ అందులో 48 శాతం రూట్లలో (371 రూట్లలో) మాత్రమే విమాన సేవలు అందించగలిగారని, 52 శాతం రూట్లలో (403 మార్గాలలో) విమాన సేవలు అందించలేకపోయినట్టు కాగ్‌ (కంట్రోలర్‌ ఆడిటర్‌ జనరల్‌) తన నివేదికలో పేర్కొంది. విమానాల్లో ప్రయాణించేవారి సంఖ్య 10రెట్లు పెరిగినా, ఆ స్థాయిలో విమాన సేవలు మాత్రం పెరగలేదని మొట్టికాయలేసింది. ప్రజల నుంచి ఈ పథకానికి సానుకూలంగా స్పందన వచ్చినప్పటికీ లక్ష్యాలను సాధించటంలో విఫలమయ్యారన్నది. ఈ పథకం మెరుగుపర్చడానికి, మరిన్ని విమాన సేవలు అందుబాటులోకి తీసుకురావడానికి కాగ్‌ ఈ సందర్భంగా 16 సిఫార్సులను కూడా చేసింది.

కాగ్‌ ఇంకా ఏం చెప్పిందంటే..

• పౌర విమానయాన మంత్రిత్వ శాఖతోపాటు ఎయిర్‌పోర్ట్‌ అథారిటీ ఆఫ్‌ ఇండియాలు అర్హతగల హెలిపోర్ట్‌లను గుర్తించటంలో విఫలం
• అభివృద్ధిపర్చిన కొన్ని హెలిపోర్ట్‌లను కనీసం ఉపయోగించని వైనం
• 116 విమానాశ్రయాలు, హెలిపోర్టులు, వాటర్‌ ఏరోడ్రమ్‌ల అభివృద్ధికి పెద్ద ఎత్తున ఖర్చు చేసినా.. వాటిలో 61 శాతం (71) మాత్రమే కార్యకలాపాల్లోకి
• ఇంకా 83 పోర్టుల్లో ప్రారంభం కాని ఎలాంటి కార్యకలాపాలు. మూడేైండ్లెనా 7 శాతం మాత్రమే మనుగడ
• ఎయిర్‌లైన్‌ ఆపరేటర్ల నుంచి బకాయిలు వసూలు చేయడంలో కూడా అశ్రద్ధ. జాప్యానికి జరిమానాలు విధించే విధానాన్ని చేపట్టాలని సూచన
• 2017లోనే ఆర్థిక వ్యవహారాల క్యాబినెట్‌ కమిటీ బడ్జెట్‌లో నిధులు మంజూరు చేసినా ప్రాంతీయ విమానాశ్రయాల పునరుధ్ధరణలో నిర్లక్ష్యం
• ఉడాన్‌ పథకం అమలుకు ఇకనైనా పటిష్ఠ చర్యలు చేపట్టాలని సలహా