Income Tax | ఓల్డ్‌ ఈజ్‌ గోల్డ్‌.. ఇప్పటికీ పాత పన్ను విధానమే లాభమా?

ఇటీవలి బడ్జెట్‌లో వ్యక్తిగత ఆదాయ పన్ను కొత్త విధానాన్ని కేంద్ర ప్రభుత్వం మరింత ఆకర్షణీయంగా మార్చిన విషయం తెలిసిందే. వచ్చే ఆర్థిక సంవత్సరానికి (2025-26)గాను ఈ నెల 1న పార్లమెంట్‌లో ప్రకటించిన పద్దులో ఏకంగా రూ.12 లక్షలదాకా వార్షిక ఆదాయం ఉన్నవారికి ఎలాంటి పన్నులు ఉండబోవని ఆర్థిక మంత్రి నిర్మలా సీతారామన్‌ స్పష్టం చేశారు.

Income Tax | ఇటీవలి బడ్జెట్‌లో వ్యక్తిగత ఆదాయ పన్ను కొత్త విధానాన్ని కేంద్ర ప్రభుత్వం మరింత ఆకర్షణీయంగా మార్చిన విషయం తెలిసిందే. వచ్చే ఆర్థిక సంవత్సరానికి (2025-26)గాను ఈ నెల 1న పార్లమెంట్‌లో ప్రకటించిన పద్దులో ఏకంగా రూ.12 లక్షలదాకా వార్షిక ఆదాయం ఉన్నవారికి ఎలాంటి పన్నులు ఉండబోవని ఆర్థిక మంత్రి నిర్మలా సీతారామన్‌ స్పష్టం చేశారు. మునుపు ఇది రూ.7 లక్షలుగానే ఉన్నది. ఇక స్టాండర్డ్‌ డిడక్షన్‌ రూ.75 వేలతో కలిపితే ఈ పన్ను మినహాయింపు ప్రయోజనం రూ. 12.75 లక్షలకు చేరుతున్నది. అయితే బడ్జెట్‌కు ముందున్న కొత్త పన్ను విధానంతో పోల్చితే ఇప్పుడు రూ.5 లక్షలకుపైగా పన్ను మినహాయింపు ప్రయోజనం పెరిగినా.. ఇంకా పాత పన్ను విధానంలోనే ట్యాక్స్‌పేయర్స్‌కు అధిక లాభాలు కనిపిస్తుండటం గమనార్హం. రూ.15 లక్షలు వార్షిక వేతనం ఉన్నవారు.. గరిష్ఠ పన్ను మినహాయింపులను కనుక ఉపయోగించుకున్నైట్టెతే కొత్త పన్ను విధానం కింద చెల్లించాల్సి వచ్చే పన్నుల్లో సగం చెల్లిస్తే సరిపోతున్నది మరి. 48వేల రూపాయలకుపైగా ప్రయోజనం చేకూరుతున్నది.

ఇదీ సంగతి..
దేశంలోని వ్యక్తిగత ఆదాయ పన్ను చెల్లింపుదారులందర్నీ కొత్త ఆదాయ పన్ను పరిధిలోకి తేవాలన్న లక్ష్యంతో మోదీ సర్కారు ముందుకెళ్తున్నది. అందుకే ఐదేండ్లుగా ప్రతీ బడ్జెట్‌లో ఈ కొత్త ఆదాయ పన్ను విధానంలోనే రకరకాల సవరణలు, మినహాయింపులు, ప్రయోజనాలను కల్పిస్తూ వస్తున్నది. 2020లో కొత్త ఆదాయ పన్ను విధానాన్ని తెరపైకి తీసుకొచ్చిన విషయం తెలిసిందే. అప్పట్నుంచి పాత ఆదాయ పన్ను విధానం జోలికే వెళ్లడం లేదు. అయినప్పటికీ ట్యాక్స్‌పేయర్స్‌కు ఇంకా పాత ఆదాయ పన్ను విధానమే ఉత్తమంగా నిలుస్తుండటం గమనార్హం. అయితే పొదుపు, పెట్టుబడులు, పెద్దగా ఖర్చులు లేని ఉద్యోగులు.. కొత్త ఆదాయ పన్ను విధానాన్ని ఎంచుకోవడమే లాభదాయకం అని చెప్పవచ్చు. కానీ ఏటా పీపీఎఫ్‌, ఈపీఎఫ్‌, ఈఎల్‌ఎస్‌ఎస్‌, ఎన్‌పీఎస్‌, గృహ రుణం, బీమా ప్రీమియంలు, గృహ రుణ అలవెన్స్‌ (హెచ్‌ఆర్‌ఏ), పిల్లల విద్య కోసం చేసే ఖర్చులు వంటివి క్లెయిం చేసుకునే వీలున్నవారు మాత్రం పాత ఆదాయ పన్ను విధానాన్ని అనుసరించడమే ఇప్పటికీ లాభదాయకమని చెప్పవచ్చు.

గుర్తుంచుకోండి

• కొత్త ఆదాయ పన్ను విధానంలో వార్షిక ఆదాయం రూ.12.75 లక్షలు దాటితే వయసుతో సంబంధం లేకుండా అందరికీ ఒకేలా ఆయా శ్లాబుల ప్రకారం పన్ను రేట్లు వర్తిస్తాయి.
• పాత పన్ను విధానంలో 60-80 ఏండ్ల వయసువారికి వార్షిక ఆదాయం రూ.3 లక్షలదాకా పన్ను లేదు. 80 ఏండ్లు దాటితే రూ.5 లక్షలదాకా పన్నుండదు. దీంతో వివిధ సెక్షన్ల కింద పన్ను మినహాయింపు గరిష్ఠంగా 60-80 వారికి ఏటా రూ.11.25 లక్షలదాకా, 80 ఏండ్లు దాటినవారికి రూ.13.25 లక్షలదాకా ఉంటున్నది.
• కొత్త పన్ను విధానంలో స్టాండర్డ్‌ డిడక్షన్‌ రూ.75 వేలతో కలిపి వార్షిక ఆదాయం రూ.12.75 లక్షలదాకా పన్ను మినహాయింపున్నది. నిజానికి స్టాండర్డ్‌ డిడక్షన్‌తో కలిపి రూ.4.75 లక్షలదాకా ఎవరికీ పన్నుండదు. అయితే రూ.12.75 లక్షల లోపున్నవారికి మిగతా రూ.8 లక్షలకు శ్లాబుల ప్రకారం వర్తించే రూ.60 వేల పన్నును సెక్షన్‌ 87ఏ కింద రిబేటుగా ఇస్తున్నారు. కానీ ఇది వార్షిక ఆదాయం రూ.12.75 లక్షలు మించకపోతేనే వర్తిస్తుంది.
• గరిష్ఠ పన్ను మినహాయింపుల్ని ఉపయోగించగలిగితే వార్షిక ఆదాయం రూ.20 లక్షలదాకా పాత విధానాన్ని ఎంచుకోవచ్చు. అయితే సాధారణ ట్యాక్స్‌పేయర్స్‌కు వార్షిక ఆదాయం రూ.22 లక్షలు దాటితే కొత్త విధానమే లాభం. సీనియర్‌ సిటిజన్లు మాత్రం తమకు ఏది లాభమో లెక్కించి నిర్ణయం తీసుకోవడం మంచిది.
• ఏదిఏమైనా పన్ను చెల్లింపుదారులు ఐటీ రిటర్న్స్‌ దాఖలు చేసేటప్పుడు ఏటా తమ పొదుపు, ఖర్చులు, పెట్టుబడులు, ఆదాయం అన్నింటినీ పరిశీలించుకున్నాకే పాత, కొత్త ఆదాయ పన్ను విధానాలను ఎంచుకోవడం తెలివైన నిర్ణయమని చెప్పవచ్చు.

పాత పన్నులో గరిష్ఠ మినహాయింపులివీ

• స్టాండర్డ్‌ డిడక్షన్‌ : రూ.50 వేలు
• సెక్షన్‌ 80సీ (పీపీఎఫ్‌, ఎన్‌ఎస్‌సీ, ఈఎల్‌ఎస్‌ఎస్‌ తదితర సేవింగ్స్‌, ఖర్చులు, పెట్టుబడుల కింద) : రూ.1.5 లక్షలు
• సెక్షన్‌ 10(13ఏ) (హౌజ్‌ రెంట్‌ అలవెన్స్‌) : రూ.3 లక్షలు (నెలవారీ బేసిక్‌ సాలరీ రూ.50 వేలపై రూ.25 వేలుగా లెక్కిస్తే)
• సెక్షన్‌ 24బీ (గృహ రుణంపై వడ్డీ చెల్లింపు కింద) : రూ.2 లక్షలు
• సెక్షన్‌ 80సీసీడీ(1బీ) (ఎన్‌పీఎస్‌కు విరాళాల కింద అదనపు పన్ను మినహాయింపు) : రూ.50 వేలు
• సెక్షన్‌ 80డీ (ఆరోగ్య బీమా కోసం ప్రీమియం కింద) : రూ.75 వేలు
• మొత్తం ఆదాయంలో ఇలా వివిధ సెక్షన్ల కింద గరిష్ఠంగా రూ.8.25 లక్షలదాకా పన్ను మినహాయింపు.
• శ్లాబు ప్రకారం వార్షిక ఆదాయం రూ.2.5 లక్షలదాకా ఎవరికీ పన్నుండదు. మొత్తంగా రూ.10.75 లక్షలదాకా పన్నులేదు.

కొత్త పన్ను విధానంలో గరిష్ఠ మినహాయింపులివీ

• వార్షిక ఆదాయం రూ.12 లక్షలు దాటకపోతే పన్నుండదు
• స్టాండర్డ్‌ డిడక్షన్‌: రూ.75 వేలు
• ఇలా ఏటా మొత్తం ఆదాయం రూ.12.75 లక్షలు మించకపోతే పూర్తిగా పన్ను మినహాయింపు
• వార్షిక ఆదాయం రూ.12.75 లక్షలు దాటితే (స్టాండర్డ్‌ డిడక్షన్‌ రూ.75 వేలు కలిపి) పన్ను మినహాయింపు
• రూ.4.75 లక్షలకు (స్టాండర్డ్‌ డిడక్షన్‌ రూ.75 వేలు కలిపి) పడిపోతుంది. శ్లాబుల ప్రకారం రూ.4 లక్షలదాకా ఎవరికీ పన్నులు పడవు. దానికి స్టాండర్డ్‌
• డిడక్షన్‌ రూ.75 వేలు కూడా కలిపితే రూ.4.75 లక్షలదాకా పన్ను ప్రసక్తే లేదన్నమాట.