ఎల్‌ఐసీ జీవితకాల బీమా

ప్రభుత్వ రంగ బీమా దిగ్గజం లైఫ్‌ ఇన్సూరెన్స్‌ కార్పొరేషన్‌ (ఎల్‌ఐసీ).. బుధవారం ‘జీవన్‌ ఉత్సవ్‌' పేరిట ఓ గ్యారంటీడ్‌ రిటర్న్‌ ప్లాన్‌ను పరిచయం చేసింది. ఇదో నాన్‌-లింక్డ్‌, నాన్‌-పార్టిసిపేటింగ్‌, ఇండివిడ్యువల్‌ సేవింగ్స్‌, పూర్తి జీవిత బీమా ప్లాన్‌ అని ఎల్‌ఐసీ ఓ ప్రకటనలో తెలియజేసింది.

• గ్యారంటీడ్‌ రిటర్న్‌ ప్లాన్‌ జీవన్‌ ఉత్సవ్‌ పరిచయం

న్యూఢిల్లీ, నవంబర్‌ 29: ప్రభుత్వ రంగ బీమా దిగ్గజం లైఫ్‌ ఇన్సూరెన్స్‌ కార్పొరేషన్‌ (ఎల్‌ఐసీ).. బుధవారం ‘జీవన్‌ ఉత్సవ్‌’ పేరిట ఓ గ్యారంటీడ్‌ రిటర్న్‌ ప్లాన్‌ను పరిచయం చేసింది. ఇదో నాన్‌-లింక్డ్‌, నాన్‌-పార్టిసిపేటింగ్‌, ఇండివిడ్యువల్‌ సేవింగ్స్‌, పూర్తి జీవిత బీమా ప్లాన్‌ అని ఎల్‌ఐసీ ఓ ప్రకటనలో తెలియజేసింది. కంపెనీ చైర్మన్‌ సిద్ధార్థ ఇటీవల పీటీఐకిచ్చిన ఇంటర్వ్యూలో.. పాలసీదారులు తాము తీసుకున్న పాలసీ మెచ్యూర్‌ అయ్యాక కనీసం అందులో 10 శాతాన్ని జీవితాంత ప్రయోజనంగా ఉండాలని ఆశిస్తున్నట్టు చెప్పారు. ఈ నేపథ్యంలోనే ‘జీవన్‌ ఉత్సవ్‌’ రాగా, ఇందులో ప్రీమియం కాలపరిమితి, వెయిటింగ్‌ పీరియడ్‌ తర్వాత ఏటా ఆదాయాన్ని అందుకోవచ్చని సంస్థ చెప్తున్నది.

రెండు ఆప్షన్లు

• ఈ పాలసీలో రెండు ఆప్షన్లు కొనుగోలుదారులకు అందుబాటులో ఉంటాయి. ప్రీమియం చెల్లింపుల కాలం ముగిశాక వీటిలో ఏదో ఒకదాన్ని పాలసీదారులు ఎంచుకోవచ్చు.
  మొదటిది రెగ్యులర్‌ ఇన్‌కమ్‌ బెనిఫిట్‌. దీని ప్రకారం బేసిక్‌ సమ్‌ అష్యూర్డ్‌లో 10 శాతం ఆదాయంగా పొందవచ్చు. ప్రతీ పాలసీ సంవత్సరం ముగింపులో ఈ ఇన్‌కమ్‌ను చెల్లిస్తారు. అయితే 3 నుంచి 6 ఏండ్ల వాయిదా వ్యవధి తర్వాత ఈ చెల్లింపులు మొదలవుతాయి.
• రెండోది ఫ్లెక్సీ ఇన్‌కమ్‌ బెనిఫిట్‌. ఈ ఆప్షన్‌.. పాలసీకి సంబంధించి ఉన్న షరతులు, నియమ-నిబంధనలకు లోబడి ఉంటుంది. ఇక ఇందులో పాలసీ కాలంలో చెల్లించిన బేసిక్‌ సమ్‌ అష్యూర్డ్‌లో 10 శాతాన్ని పాలసీదారుడు అలాగే నిల్వ చేసుకుని ఆ తర్వాత దాన్ని విత్‌డ్రా చేసుకోవచ్చు. ఇందుకుగాను 5.5 శాతం వార్షిక చక్రవడ్డీ ప్రయోజనాన్నీ పొందవచ్చు.

పాలసీ విశేషాలు

• 90 రోజుల నుంచి 65 ఏండ్ల మధ్య వయసున్నవారు ఈ పాలసీ కొనుగోలుకు అర్హులు
• పాలసీ కనీస కాలవ్యవధి ఐదేండ్లు. గరిష్ఠ కాలవ్యవధి 16 ఏండ్లు
• గ్యారంటీగా జీవితకాల ఆదాయం, జీవితాంతం రిస్క్‌ కవరేజీ
• ప్రీమియంలు చెల్లిస్తున్నంతకాలం ఏటా మీరు తీసుకున్న బీమాలో ప్రతీ వెయ్యి రూపాయలకు రూ.40 చొప్పున గ్యారంటీడ్‌ అడిషన్స్‌
• పాలసీపై రుణ సదుపాయం కలదు. మెచ్యూర్‌ అవ్వకముందే విత్‌డ్రా చేసుకునే వెసులుబాటూ ఉంటుంది.
• పాలసీ మొదలైన ఏడాది తర్వాతి నుంచి జీవితాంతం బీమా ప్రయోజనం