ఐటీసీ రూ.9.50 డివిడెండ్‌

దేశంలో అతిపెద్ద ఎఫ్‌ఎంసీజీ సంస్థ ఐటీసీ ఆర్థిక ఫలితాల్లో రాణించింది. మార్చితో ముగిసిన మూడు నెలల కాలానికిగాను రూ.5,225.02 కోట్ల కన్సాలిడేటెడ్‌ నికర లాభాన్ని గడించింది. క్రితం ఏడాది ఇదే త్రైమాసికంలో నమోదైన రూ.4,259.68 కోట్లతో పోలిస్తే 22.66 శాతం అధికమని పేర్కొంది.

న్యూఢిల్లీ, మే 18: దేశంలో అతిపెద్ద ఎఫ్‌ఎంసీజీ సంస్థ ఐటీసీ ఆర్థిక ఫలితాల్లో రాణించింది. మార్చితో ముగిసిన మూడు నెలల కాలానికిగాను రూ.5,225.02 కోట్ల కన్సాలిడేటెడ్‌ నికర లాభాన్ని గడించింది. క్రితం ఏడాది ఇదే త్రైమాసికంలో నమోదైన రూ.4,259.68 కోట్లతో పోలిస్తే 22.66 శాతం అధికమని పేర్కొంది. సమీక్షకాలంలో కంపెనీ ఆదాయం రూ.17,754.02 కోట్ల నుంచి రూ.19,058.29 కోట్లకు చేరుకున్నట్టు వెల్లడించింది. నిర్వహణ ఖర్చులు రూ.12,632.29 కోట్ల నుంచి రూ.12,907.84 కోట్లకు పెరిగాయి. 2022-23 ఆర్థిక సంవత్సరం మొత్తానికి రూ.76,518.21 కోట్ల కన్సాలిడేటెడ్‌ ఆదాయంపై రూ.19,427.68 కోట్ల నికర లాభాన్ని గడించింది.

• గత త్రైమాసికంలో సిగరేట్లు, ఇతర ఎఫ్‌ఎంసీజీ విభాగం నుంచి రూ.13,033 కోట్ల ఆదాయాన్ని గడించింది.
• హోటల్‌ విభాగం నుంచి ఐటీసీకి రూ.808.72 కోట్ల ఆదాయం ఆర్జించింది.
• కానీ, వ్యవసాయ ఉత్పత్తులను విక్రయించడం ద్వారా వచ్చే ఆదాయం 17.55 శాతం తగ్గి రూ.3,607.30 కోట్లకు పడిపోయింది.
• రూపాయి ముఖ విలువ కలిగిన ప్రతిషేరుకు తుది డివిడెండ్‌ కింద రూ.6.75, ప్రత్యేక డివిడెండ్‌ కింద మరో రూ.2.75 ప్రకటించింది. మొత్తంగా రూ.9.50 డివిడెండ్‌ రూపంలో చెల్లించనున్నది.