Hyderabad | రీ డెవలప్‌మెంట్‌.. ఓ నయా ట్రెండ్‌

రాష్ట్రంలో ఐటీ టవర్స్‌ అంటే టక్కున గుర్చుకొచ్చేది సైబర్‌ టవర్స్‌. ఆ తర్వాత గుర్తుకు వచ్చేది రహేజా మైండ్‌స్పేస్‌ ఐటీ సెజ్‌. సుమారు 108 ఎకరాల్లో విస్తరించివున్న ఈ సెజ్‌లో వందలాది ఐటీ కంపెనీలు తమ కార్యకలాపాలను కొనసాగిస్తున్నాయి.

• పాత భవనాలను కూల్చి కొత్తగా ఆకాశహర్మ్యాలు
• ఐటీ కారిడార్‌లో రెండు బిల్డింగ్‌లు నేలమట్టం
• 23 అంతస్థులతో రెండు భారీ భవంతుల నిర్మాణం

Hyderabad | హైదరాబాద్‌ సిటీబ్యూరో, సెప్టెంబర్‌ 23 (నమస్తే తెలంగాణ): రాష్ట్రంలో ఐటీ టవర్స్‌ అంటే టక్కున గుర్చుకొచ్చేది సైబర్‌ టవర్స్‌. ఆ తర్వాత గుర్తుకు వచ్చేది రహేజా మైండ్‌స్పేస్‌ ఐటీ సెజ్‌. సుమారు 108 ఎకరాల్లో విస్తరించివున్న ఈ సెజ్‌లో వందలాది ఐటీ కంపెనీలు తమ కార్యకలాపాలను కొనసాగిస్తున్నాయి. ఐటీ బూమ్‌ ప్రారంభమైన 1998లో ఈ సెజ్‌లో బహుళ స్థాయి భవంతుల నిర్మాణాలు చేపట్టింది. అప్పట్లో భవనాల ఎత్తు 10 అంతస్థులు కావడంతో ఈ లోపే నిర్మించారు. ఐటీ రంగం అంచనాలకుమించి దూసుకుపోతుండటంతో మాదాపూర్‌ నుంచి కోకాపేట దాకా విస్తరించింది.

ఐటీ కార్యాలయాలకు డిమాండ్‌ అధికంగా ఉండటంతో పాత భవనాలను కూల్చివేసి..వీటి స్థానంలో కొత్తగా అధునాత నిర్మాణ శైలితో అంతర్జాతీయ ప్రమాణాలతో కూడిన ఆఫీస్‌ స్పేస్‌ను అందుబాటులోకి తీసుకోస్తున్నాయి. ఇదే క్రమంలో రహేజా మైండ్‌స్పేస్‌ ఐటీ సెజ్‌లో ఏడు అంతస్థులు కలిగిన రెండు భవనాలను శనివారం ఉదయం 8.30 గంటల సమయంలో కూల్చివేశారు.

అత్యంత భద్రతా చర్యల మధ్య దక్షిణాఫ్రికాకు చెందిన జెట్‌ డిమాలిష్‌ సంస్థతో కలిసి ఏడీఎఫ్‌సీ ఇంజినీరింగ్‌ సంస్థలు కేవలం 6 నుంచి 8 సెకండ్లలోనే ఈ భవంతులను కూల్చివేశారు. వీటి స్థానంలోనే కొత్తగా 23 అంతస్థులతో కూడిన రెండు భారీ బహుళ అంతస్తుల భవనాలను నిర్మించి, ఐటీ కార్యాలయాల కోసం అద్దెకు ఇవ్వనున్నది. పాత వాటి స్థానంలో కొత్త భవంతుల నిర్మించడటం ఇటీవల కాలంలో ఓ ట్రెండ్‌గా మారింది.

ఆఫీస్‌ స్పేస్‌కు డిమాండ్‌..
హైదరాబాద్‌లో ఆఫీస్‌ స్పేస్‌కు ఎనలేని డిమాండ్‌ నెలకొన్నది. దేశీయ, అంతర్జాతీయ ఐటీ సంస్థలు ఇక్కడ తమ రెండో కార్యాలయాలను ప్రారంభిస్తుండటంతో ఆఫీస్‌ స్థలాన్ని ఎగరేసుకొని పోతున్నాయి. తెలంగాణ రాష్ట్రం ఏర్పాటైన తర్వాత ఐటీ రంగం టాప్‌గేర్‌లో దూసుకుపోతున్నది. తెలంగాణ రాకముందు రూ.57 వేల కోట్లుగా ఉన్న రాష్ట్ర ఐటీ ఎగుమతులు గడిచిన ఆర్థిక సంవత్సరంనాటికి రూ.2.41 లక్షల కోట్లకు చేరుకున్నాయి.
ఉద్యోగుల సంఖ్య రెట్టింపు కావడంతో దేశంలోని అన్ని మెట్రో నగరాలను వెనక్కి నెట్టి ఐటీ రంగంలో అభివృద్ధిలో దూసుకుపోతున్నది.

రహేజా మైండ్‌ స్పేస్‌ ప్రస్థానం..

• ఐటీ సెజ్‌ను అభివృద్ధి చేయాలనే ఉద్దేశంతో 1998లో అప్పటి ఉమ్మడి రాష్ట్ర ప్రభుత్వం రహేజా సంస్థకు 108 ఎకరాల స్థలాన్ని కేటాయించింది.
• ఈ సెజ్‌లోనే 18 ఏండ్ల క్రితం, 16 ఏండ్ల క్రితం నిర్మించిన భవనాలను శనివారం ఉదయం 8.30 గంటలకు కేవలం 6 నుంచి 8 సెకండ్లలో నేలమట్టం చేశారు.
• 4.5 ఎకరాల స్థలంలో ఏడు అంతస్థులతో ఈ రెండు భవనాలు నిర్మించింది. కొత్తగా నిర్మించే రెండు భవనాల్లో మొత్తం 16 చదరపు అడుగుల విస్తీర్ణంతో ఆఫీస్‌ స్పేస్‌ అందుబాటులోకి రానున్నది.
• వచ్చే మూడు నుంచి నాలుగేండ్లలో ఈ నూతన భవంతుల నిర్మించాలని రహేజా సంస్థ లక్ష్యంగా పెట్టుకున్నది.
• 2013-14లో రూ.57 వేల కోట్లుగా ఉన్న రాష్ట్ర ఐటీ ఎగుమతులు..గతేడాది రూ.2.41 లక్షల కోట్లు
• స్వరాష్ట్రంలో టెక్నాలజీ ఉద్యోగుల సంఖ్య 3 లక్షల నుంచి 10 లక్షలకు పెరిగారు.
• ఐటీ రంగంలో జాతీయ సగటు వృద్ధి 17.28 శాతంగా ఉండగా..తెలంగాణలో మాత్రం 26 శాతం వృద్ధిని నమోదు చేసుకుంటున్నది.
• మౌలిక వసతులు మెరుగ్గా ఉండటం, ప్రతిభ కలిగిన ఐటీ నిపుణులు లభిస్తుండటంతో మహా నగరానికి అంతర్జాతీయ ఐటీ సంస్థలు క్యూ కడుతున్నాయి. ప్రభుత్వ విధానాలూ కలిసొస్తున్నాయి.
• మైండ్‌ స్పేస్‌ ఐటీ సెజ్‌లో ఆఫీస్‌ స్థలానికి డిమాండ్‌ అధికంగా ఉండటంతో పాత భవనాల స్థానంలో నాలుగు రెట్లు ఎక్కువ విస్తీర్ణంతో కొత్త భవనాలను నిర్మించేందుకు రహేజా కంపెనీ శ్రీకారంచుట్టింది.
• మాదాపూర్‌, కొండాపూర్‌, రాయదుర్గం ఐటీ కారిడార్‌లు కిక్కిరిసిపోవడంతో కోకాపేట్‌, నానక్‌రాంగూడ, నార్సింగి, మంచిరేవుల ప్రాంతాల వైపు చూస్తున్నారు. ఈ ప్రాంతాల్లో 45 నుంచి 58 అంతస్తులతో కూడిన ఆకాశహర్మ్యాలు నిర్మిస్తున్నారు.