ఐవోసీ లాభం రూ.13,750 కోట్లు

ఇంధన విక్రయంలో అగ్రగామి సంస్థయైన ఇండియన్‌ ఆయిల్‌ కార్పొరేషన్‌(ఐవోసీ) రికార్డు స్థాయి లాభాలను గడించింది. జూన్‌తో ముగిసిన మూడు నెలల కాలానికిగాను సంస్థ రూ.13,750 కోట్ల నికర లాభాన్ని ఆర్జించింది. గత పదేండ్లలో ఒక త్రైమాసికంలో ఇంతటి స్థాయి లాభాలను ఆర్జించడం ఇదే తొలిసారి. అంతర్జాతీయ మార్కెట్లో ఇంధన ధరలు తగ్గుముఖం పట్టడంతో పెట్రోల్‌, డీజిల్‌పై మార్జిన్లు అధికమవడం వల్లనే లాభాల్లో భారీ వృద్ధి నమోదైందని తెలిపింది.

న్యూఢిల్లీ, జూలై 28: ఇంధన విక్రయంలో అగ్రగామి సంస్థయైన ఇండియన్‌ ఆయిల్‌ కార్పొరేషన్‌(ఐవోసీ) రికార్డు స్థాయి లాభాలను గడించింది. జూన్‌తో ముగిసిన మూడు నెలల కాలానికిగాను సంస్థ రూ.13,750 కోట్ల నికర లాభాన్ని ఆర్జించింది. గత పదేండ్లలో ఒక త్రైమాసికంలో ఇంతటి స్థాయి లాభాలను ఆర్జించడం ఇదే తొలిసారి. అంతర్జాతీయ మార్కెట్లో ఇంధన ధరలు తగ్గుముఖం పట్టడంతో పెట్రోల్‌, డీజిల్‌పై మార్జిన్లు అధికమవడం వల్లనే లాభాల్లో భారీ వృద్ధి నమోదైందని తెలిపింది.

ఏడాది క్రితం ఇదే త్రైమాసికంలో సంస్థ రూ.1,992.53 కోట్ల నష్టాన్ని నమోదు చేసుకున్నది. మార్చి త్రైమాసికంలో నమోదైన రూ.10,058.69 కోట్ల లాభం కంటే ఇది 37 శాతం అధికం. కంపెనీ చరిత్రలో జనవరి-మార్చి 2013లో రికార్డు స్థాయి 14,513 కోట్ల లాభాన్ని ఆర్జించింది. సమీక్షకాలంలో కంపెనీ ఆదాయం ఏడాది ప్రాతిపదికన 2.36 శాతం తగ్గి రూ.2.21 లక్షల కోట్లకు తగ్గింది.

• గత త్రైమాసికంలో ఎబిటా 44.5 శాతం పెరిగి రూ.22,163 కోట్లకు చేరుకున్నది.
• బ్యారెల్‌ క్రూడాయిల్‌ను శుద్ది చేయడంతో సంస్థకు 8.34 డాలర్ల ఆదాయం సమకూరింది. ఏడాది క్రితం వచ్చిన 31.81 డాలర్లతో పోలిస్తే భారీగా తగ్గింది.
• గత త్రైమాసికంలో సంస్థ 21.8 మిలియన్‌ టన్నుల ఇంధనాన్ని విక్రయించింది. అలాగే 18.26 మిలియన్‌ టన్నుల క్రూడాయిల్‌ను శుద్ది చేసింది.
• అంతర్జాతీయ మార్కెట్లో బ్యారెల్‌ క్రూడాయిల్‌ మార్చి 2022లో 139 డాలర్లకు చేరుకోగా..గత త్రైమాసికంలో 75 డాలర్లుగా ఉన్నది.
• గరిష్ఠ స్థాయికి చేరుకున్నప్పుడు లీటర్‌ పెట్రోల్‌కు రూ.17.4, డీజిల్‌కు రూ.27.7 నష్టపోయాయి.
• చమురు ధరలు తగ్గుముఖం పట్టడంతో అక్టోబర్‌-డిసెంబర్‌ మధ్యకాలానికి పెట్రోల్‌పై రూ.10, డీజిల్‌పై రూ.6.5 మార్జిన్లు వచ్చాయి.