50 కోట్లకు 5జీ కస్టమర్లు!
దేశంలో 5జీ వినియోగదారులు 2027 ఆఖరుకల్లా 50 కోట్లకు చేరవచ్చని స్వీడన్‌ టెలికం దిగ్గజం ఎరిక్సన్‌ అంచనా వేసింది.
- 2027 నాటికి చేరుకోవచ్చంటున్న ఎరిక్సన్‌
న్యూఢిల్లీ, జూన్‌ 21: దేశంలో 5జీ వినియోగదారులు 2027 ఆఖరుకల్లా 50 కోట్లకు చేరవచ్చని స్వీడన్‌ టెలికం దిగ్గజం ఎరిక్సన్‌ అంచనా వేసింది. త్వరలో దేశీయంగా 5జీ టెలికం సేవలు అందుబాటులోకి రాబోతున్న విషయం తెలిసిందే. రిలయన్స్‌ జియో, భారతీ ఎయిర్‌టెల్‌, వొడాఫోన్‌ ఐడియా తదితర కంపెనీలు ఈ ఏడాది ద్వితీయార్ధం (జూలై-డిసెంబర్‌)లో 5జీ సేవలను ప్రారంభించాలనీ చూస్తున్నాయి. ఇటీవలే 5జీ వేలానికి కేంద్ర ప్రభుత్వం నుంచి గ్రీన్‌సిగ్నల్‌ కూడా వచ్చిన సంగతి విదితమే. ఈ నేపథ్యంలో ఎరిక్సన్‌ మొబిలిటీ రిపోర్టు విడుదలైంది.
ఎరిక్సన్‌ రిపోర్టు ముఖ్యాంశాలు
- 2027 చివరినాటికి దేశంలోని మొబైల్‌ వినియోగదారుల్లో 39 శాతం (50 కోట్లు) మంది 5జీ యూజర్లే
- ధరల కంటే సేవల్లో పెరిగే నాణ్యత కోసమే 5జీని ఎక్కువమంది కోరుకుంటున్నారు
- కంటెంట్‌ స్ట్రీమింగ్‌, హెచ్‌డీ వీడియోలు, స్వయంప్రతిపత్తి వాహనాలు, డ్రోన్లకు దోహదపడనున్న 5జీ సేవలు
- అంతర్జాతీయంగా స్మార్ట్‌ఫోన్‌ డాటా ట్రాఫిక్‌ సగటు విషయంలో రెండో స్థానంలో భారత్‌
- నిరుడు నెలకు 20 జీబీగా ఉంటే.. 2027 నాటికి 50 జీబీకి చేరుకునే అవకాశాలు
- రాబోయే 12 నెలల్లో 5జీ వినియోగాన్ని ప్రారంభించాలని చూస్తున్న 52 శాతం భారతీయ సంస్థలు
- 2024కల్లా 5జీ సేవల్ని అందిపుచ్చుకోవాలనుకుంటున్న 34 శాతం కంపెనీలు
- డిజిటలైజేషన్‌కు 5జీతో కొత్త ఉత్సాహం రాగలదని నమ్ముతున్న వ్యాపార, పారిశ్రామిక రంగాలు
- దేశీయ మొబైల్‌ వినియోగదారుల్లో 2027 నాటికి 55 శాతానికి పడిపోనున్న 4జీ కస్టమర్లు
- ప్రపంచవ్యాప్తంగా 2027 ఆఖరుకల్లా 440 కోట్లకు 5జీ కస్టమర్లు. 70 కోట్లకు పరిమితమయ్యే అవకాశం
- వచ్చే ఐదేండ్లలో ఉత్తర అమెరికాలో పెద్ద ఎత్తున పెరగనున్న 5జీ వినియోగదారులు
- ప్రపంచవ్యాప్తంగా కొత్తగా 5జీలోకి వచ్చే ప్రతీ 10 మందిలో 9 మంది ఉత్తర అమెరికావారే
- ఈ ఏడాది చివరినాటికి 100 కోట్ల మైలురాయిని దాటిపోనున్న ప్రపంచ 5జీ కస్టమర్లు
- ఈ జనవరి-మార్చిలోనే పెరిగిన 7 కోట్ల మంది 5జీ వినియోగదారులు
భారత్‌లో మొత్తం మొబైల్‌ డాటా ట్రాఫిక్‌ 2021-2027 మధ్య నాలుగు రెట్లు ఎగిసే వీలున్నది. భారీ ఎత్తున పెరిగే స్మార్ట్‌ఫోన్‌ వినియోగదారులు ఇందుకు కారణం. కస్టమర్లు పెరిగినకొద్దీ వారి సగటు డాటా వినియోగం కూడా ఎక్కువే అవుతుంది.’
-థీ సెంగ్‌, ఎరిక్సన్‌ ఇండియా ప్రతినిధి
Read Today's Latest Business News in Telugu and Telugu News
- Follow Us :
-
