3 నిమిషాల్లోనే కొత్త ఐటీ చట్టం.. చర్చ లేకుండానే కీలక సవరణలు పాస్‌

63 ఏండ్ల కిందటి పాత ఆదాయ పన్ను (ఐటీ) చట్టం స్థానంలో తెచ్చిన కొత్త ఐటీ చట్టం కేవలం 3 నిమిషాల్లోనే లోక్‌సభ ఆమోదం పొందింది. సోమవారం కేంద్ర ఆర్థిక శాఖ మంత్రి నిర్మలా సీతారామన్‌.. వ్యక్తులు, సంస్థల ఆదాయ పన్ను నిర్మాణానికి సంబంధించి ప్రవేశపెట్టిన ఈ కీలక చట్ట సవరణలు ఎటువంటి చర్చ లేకుండానే పాసైపోవడం గమనార్హం.

• లోక్‌సభలో ఆదాయ పన్ను బిల్లు-2025కు ఆమోదం

న్యూఢిల్లీ, ఆగస్టు 11 : 63 ఏండ్ల కిందటి పాత ఆదాయ పన్ను (ఐటీ) చట్టం స్థానంలో తెచ్చిన కొత్త ఐటీ చట్టం కేవలం 3 నిమిషాల్లోనే లోక్‌సభ ఆమోదం పొందింది. సోమవారం కేంద్ర ఆర్థిక శాఖ మంత్రి నిర్మలా సీతారామన్‌.. వ్యక్తులు, సంస్థల ఆదాయ పన్ను నిర్మాణానికి సంబంధించి ప్రవేశపెట్టిన ఈ కీలక చట్ట సవరణలు ఎటువంటి చర్చ లేకుండానే పాసైపోవడం గమనార్హం.

ఇదీ సంగతి..

ఆదాయ పన్ను చట్టం-1961 స్థానంలో బడ్జెట్‌ సమావేశాల సందర్భంగా ఈ ఏడాది ఫిబ్రవరి 13న ఐటీ బిల్లు (నెం.2) 2025ను లోక్‌సభకు ఆర్థిక మంత్రి నిర్మలా సీతారామన్‌ పరిచయం చేసిన విషయం తెలిసిందే. ఆ తర్వాత ఈ బిల్లును సెలెక్ట్‌ కమిటీ పరిశీలనకు పంపారు. బైజయంత్‌ పాండా నేతృత్వంలోని 31 మంది సభ్యులుగల కమిటీ.. ఇందులో మార్పులు చేస్తూ పలు సిఫార్సులను సూచించింది. ఈ క్రమంలోనే సదరు సిఫార్సులను బిల్లులో పొందుపర్చడానికి ఈ నెల 8న లోక్‌సభ నుంచి దాన్ని సీతారామన్‌ ఉపసంహరించిన సంగతి విదితమే. సోమవారం సభకు తీసుకొస్తామని అప్పుడే (గత శుక్రవారం) చెప్పగా, అందుకు తగ్గట్టే వచ్చిన బిల్లు.. కేవలం 3 నిమిషాల్లోనే ఆమోదం పొందడం గమనార్హం. ఓవైపు బీహార్‌ ఓటర్ల జాబితాకు సంబంధించిన స్పెషల్‌ ఇంటెన్సివ్‌ రివిజిన్‌ (ఎస్‌ఐఆర్‌)లో అక్రమాల ఆరోపణలపై ప్రతిపక్షాలన్నీ పెద్ద ఎత్తున నిరసన తెలుపుతుంటే.. మరోవైపు ఐటీ చట్టం సవరణల బిల్లును ప్రవేశపెట్టి, వాయిస్‌ ఓట్‌ ద్వారా మోదీ సర్కారు ఆమోద ముద్ర వేయించింది. దీంతో ఇక ఈ బిల్లు రాజ్యసభకు వెళ్లనున్నది. అక్కడ ఆమోదం పొందిన తర్వాత రాష్ట్రపతి సమ్మతికి పోనున్నది. గ్రీన్‌ సిగ్నల్‌ వస్తే చట్టంగా అమల్లోకి రానున్నది. కాగా, ఆదాయ పన్ను (నెం.2) బిల్లుతోపాటు పన్ను చట్టాల (సవరణ) బిల్లుకూ ఒకేసారి ఆమోదం లభించింది. యూనిఫైడ్‌ పెన్షన్‌ స్కీం సబ్‌స్ర్కైబర్స్‌కు పన్ను మినహాయింపులను కల్పించేదే ఈ బిల్లు.

వ్యత్యాసాలు ఏమిటి?

• పాత, కొత్త ఆదాయ పన్ను చట్టాల్లో తేడా ల విషయానికొస్తే.. పాత చట్టాన్ని సుమారు ఆరున్నర దశాబ్దాల కిందట తెచ్చారు. ఇందులోని భాష, నిర్మాణం సాధారణ పౌరులను గందరగోళానికి గురిచేస్తున్నాయన్నది కేంద్ర ప్రభుత్వం వాదన. అందుకే సాదాసీదా పదాలతో, సులభంగా చదివి అర్థం చేసుకునేలా సరళతరం చేసి కొత్త ఆదాయ పన్ను చట్టాన్ని తెస్తున్నట్టు మోదీ సర్కారు చెప్తున్నది. దీనిలో 536 సెక్షన్లు, 16 షెడ్యూల్స్‌ ఉన్నాయి.
• పాత ఆదాయ పన్ను చట్టంతో పోల్చితే కొత్త చట్టం పరిమాణం తక్కువ.
• సంక్లిష్టత నివారణకు సెక్షన్లు, చాప్టర్ల సంఖ్యను భారీగా తగ్గించేశారు. పదాల సంఖ్యనూ దాదాపు సగానికి కుదించేశారు. ఇంకొన్నింటిని మార్చేశారు.
• అసెస్‌మెంట్‌ ఇయర్‌, ప్రీవియస్‌ ఇయర్‌ అనేవి అయోమయంగా ఉన్నాయని, ఆ స్థానంలో ట్యాక్స్‌ ఇయర్‌ను పెట్టారు.
• వివాదాలను తగ్గించేలా అనవసరపు, విరుద్ధమైన నిబంధనలను తొలగించారు.
• విద్యావసరాల కోసం ఆర్థిక సంస్థల నుంచి తీసుకున్న రుణాలకు వర్తించే లిబరలైజ్డ్‌ రెమిటెన్స్‌ స్కీం (ఎల్‌ఆర్‌ఎస్‌) రెమిటెన్సులపై నిల్‌ టీసీఎస్‌ (ట్యాక్స్‌ కలెక్టెడ్‌ ఎట్‌ సోర్స్‌)కు కొత్త బిల్లు అనుమతిస్తుంది.
• చట్టం నిబంధనలపై కేంద్ర ప్రత్యక్ష పన్నుల బోర్డు (సీబీడీటీ)కు మరిన్ని అధికారాలు.

సెలెక్ట్‌ కమిటీ ఏం చెప్పింది?

• ట్యాక్స్‌ రిఫండ్‌లో ఫ్లెక్సిబులిటీ
• గడువు దాటిన తర్వాత ఐటీ రిటర్ను (ఐటీఆర్‌)లను దాఖలు చేసినా టీడీఎస్‌ (ట్యాక్స్‌ డిడక్టెడ్‌ ఎట్‌ సోర్స్‌) రిఫండ్‌కు వ్యక్తిగత ఆదాయ పన్ను చెల్లింపుదారులు క్లెయిం చేసుకోవచ్చు.
• డివిడెండ్లపై ఊరట
• ఇంటర్‌-కార్పొరేట్‌ డివిడెండ్స్‌పై మళ్లీ సెక్షన్‌ 80ఎం మినహాయింపులు.
• ట్రస్టుల విరాళాలపై..
• పూర్తిగా మతపరమైన ట్రస్టులు అందుకు నే గుర్తుతెలియని విరాళాలకూ పన్ను మినహాయింపు. అయితే సదరు ట్రస్టులకు దవాఖానలు, విద్యా సంస్థలుంటే చట్ట ప్రకారం పన్ను పడుతుంది. నాన్‌-ప్రాఫిట్‌ ఆర్గనైజేష న్స్‌ లేదా ట్రస్టులకు పన్ను మినహాయింపు.
• నిల్‌-టీడీఎస్‌ ఆప్షన్‌
• ఆదాయ పన్ను చట్టం పరిధిలోకి రానివారికీ అడ్వాన్స్‌ నిల్‌-టీడీఎస్‌ సర్టిఫికెట్‌.
• ఖాళీ ఇంటిపై పన్ను ఊరట
• ట్యాక్స్‌పేయర్స్‌కు ఎన్ని నివాసాలున్నాయన్న దానితో సంబంధం లేకుండా ఖాళీగా ఉన్న అద్దె ఇండ్లకు నోషనల్‌ రెంట్‌ తొలగింపు.
• స్థూల అద్దె ఆదాయంపై..
• ఇంటి రిపేర్లు, మెయింటేనెన్స్‌ కోసం స్థూల అద్దె ఆదాయంలో 30 శాతం స్టాండర్డ్‌ డిడక్షన్‌కు అనుమతి. రెంటెడ్‌ ప్రాపర్టీపై మున్సిపల్‌ ట్యాక్స్‌, వడ్డీ కోతల తర్వాత కూడా వర్తింపు.
• సరళతర నిబంధనలు
• పీఎఫ్‌ విత్‌డ్రాయల్స్‌, అడ్వాన్స్‌ రూలింగ్‌ ఫీజులు, పెనాల్టీలపై టీడీఎస్‌కు సంబంధించి మరింత స్పష్టత.
• ఎంఎస్‌ఎంఈ నిర్వచనం
• ఎంఎస్‌ఎంఈ చట్టానికి అనుగుణంగా ఎంఎస్‌ఎంఈ నిర్వచనం.
• ఆస్తుల వర్గీకరణపై..
• నివాస, వాణిజ్య వినియోగాలను వేరుచేసి ఆస్తి పన్నుల మదింపు, వసూలును ప్రభావితం చేసే ‘ఆక్యుపైడ్‌ ప్రాపర్టీ’ నిర్వచనంపై స్పష్టత.
• పెన్షన్‌ ప్రయోజనాలపై..
• ఉద్యోగేతరులకూ కమ్యూటెడ్‌ పెన్షన్‌ మినహాయింపులు.