Adani | మరోసారి బద్దలైన మహా మాయగాడి అక్రమాల పుట్ట.. అదానీ గ్రూప్‌ అంటేనే అంతులేని అనుమానాలు, అవకతవకలు

మహా మాయగాడి అక్రమాల పుట్ట మరోసారి బద్దలైంది.కనీసం హైస్కూల్‌ చదువు కూడా పూర్తిచేయని స్కూల్‌ డ్రాపౌట్‌.. కుబేరుడిగా మారిన వైనం.. కండ్లకు కట్టినట్టు ఆవిష్కృతమైంది. ప్రధాని మోదీ ఆప్తమిత్రుడు, అదానీ గ్రూప్‌ సంస్థల చైర్మన్‌ గౌతమ్‌ అదానీ ఆర్థిక అవకతవకలపై ఆర్గనైజ్డ్‌ క్రైమ్‌ అండ్‌ కరప్షన్‌ రిపోర్టింగ్‌ ప్రాజెక్ట్‌ (ఓసీసీఆర్పీ) సంచలన ఆరోపణలు చేసింది. అదానీ గ్రూప్‌ కంపెనీల్లో అక్రమాలు నిజమేనని సాక్ష్యాధారాలతోసహా బయటపెట్టింది.

• గ్రూప్‌ కంపెనీల్లోకి అక్రమంగా పెట్టుబడులు
• మారిషస్‌ నుంచి అపారంగా నిధుల వరద ..
• గ్రూప్‌ షేర్ల ముఖవిలువ కృత్రిమంగా పెంపు
• ప్రమోటర్లకు బాగా దగ్గరివాళ్లే సూత్రధారులు..
• యథేచ్ఛగా భారత రెగ్యులేటరీ చట్టాల ఉల్లంఘన
• అవకతవకలు జరిగాయనడానికి ఇదే రుజువు..
• ఓసీసీఆర్పీ నివేదికలో సంచలన ఆరోపణలు
• మ్యానిప్యులేషన్‌ జరిగిందనడానికి ఇదే రుజువు

Adani | అదానీ గ్రూప్‌ అంటేనే అంతులేని అనుమానాలు, అవకతవకల ఆరోపణలు. అందుకే అలా ఒక్కరాయి విసరగానే అదానీ కంపెనీల్లో కలకలం రేగుతున్నది. షేర్ల కోటలు కూలి కోట్లు కొట్టుకుపోతున్నాయి. హిండెన్‌బర్గ్‌ దెబ్బకు అతలాకుతలమైన గౌతమ్‌ అదానీపై మరో పిడుగుపడింది. ప్రమోటర్‌ గ్రూపుతో సంబంధం ఉన్న పలువురు వందల మిలియన్ల డాలర్లు అదానీ గ్రూపు స్టాక్‌ల్లో పెట్టుబడులు పెట్టారని, మారిషస్‌ నుంచి అక్రమంగా పెట్టుబడుల వరద పారిందని అంతర్జాతీయ సంస్థ ఆర్గనైజెడ్‌ క్రైమ్‌ అండ్‌ కరప్షన్‌ రిపోర్టింగ్‌ ప్రాజెక్టు (ఓసీసీఆర్పీ) బాంబు పేల్చింది. సంచలన ఆరోపణలతో ఓసీసీఆర్పీ విడుదల చేసిన నివేదిక ప్రకంపనలు సృష్టిస్తున్నాయి.

మహా మాయగాడి అక్రమాల పుట్ట మరోసారి బద్దలైంది.కనీసం హైస్కూల్‌ చదువు కూడా పూర్తిచేయని స్కూల్‌ డ్రాపౌట్‌.. కుబేరుడిగా మారిన వైనం.. కండ్లకు కట్టినట్టు ఆవిష్కృతమైంది.
ప్రధాని మోదీ ఆప్తమిత్రుడు, అదానీ గ్రూప్‌ సంస్థల చైర్మన్‌ గౌతమ్‌ అదానీ ఆర్థిక అవకతవకలపై ఆర్గనైజ్డ్‌ క్రైమ్‌ అండ్‌ కరప్షన్‌ రిపోర్టింగ్‌ ప్రాజెక్ట్‌ (ఓసీసీఆర్పీ) సంచలన ఆరోపణలు చేసింది.
అదానీ గ్రూప్‌ కంపెనీల్లో అక్రమాలు నిజమేనని సాక్ష్యాధారాలతోసహా బయటపెట్టింది.

(స్పెషల్‌ టాస్క్‌ బ్యూరో)హైదరాబాద్‌, ఆగస్టు 31 (నమస్తే తెలంగాణ): ‘అదానీ గ్రూప్‌ కంపెనీల్లో ఆర్థిక అవకతవకలు జరిగాయి. ప్రమోటర్ల కుటుంబానికి బాగా దగ్గరి వ్యక్తులు అదానీ గ్రూప్‌ స్టాక్స్‌లో వందల మిలియన్ల డాలర్లను పెట్టుబడులుగా పెట్టి భారీగా లబ్ధి పొందారు. ఇందుకోసం మారిషస్‌ వంటి పలు దేశాల్లోని అనుమానాస్పద ఫండ్‌లను మాధ్యమంగా ఉపయోగించుకొన్నారు’ అని ఇన్వెస్టిగేటివ్‌ జర్నలిస్ట్స్‌ నెట్‌వర్క్‌ ఆర్గనైజ్డ్‌ క్రైమ్‌ అండ్‌ కరప్షన్‌ రిపోర్టింగ్‌ ప్రాజెక్ట్‌ (ఓసీసీఆర్పీ) సంచలన ఆరోపణలు చేసింది. హిండెన్‌బర్గ్‌ రిపోర్టుతో ఇప్పటికే చావుతప్పి కన్ను లొట్టబోయినట్టు తయారైన అదానీ గ్రూప్‌నకు ఓసీసీఆర్పీ నివేదిక మరో భారీ ఎదురుదెబ్బ. అదానీ గ్రూప్‌ కంపెనీల్లో ఆర్థిక అవకతవకలు జరిగినట్టు పలు ఆధారాలు బయటపెట్టిన ఓసీసీఆర్పీ పరిశోధనాత్మక జర్నలిస్టుల నెట్‌వర్క్‌. వ్యవస్థీకృత నేరాలు, అవినీతి, ఆర్థిక అవకతవకలకు సంబంధించి లోతైన విశ్లేషణలు చేయడానికి ప్రపంచ వ్యాప్తంగా జర్నలిస్టులతో కూడిన బలమైన ఇన్వెస్టిగేటింగ్‌ నెట్‌వర్క్‌ అది. రష్యాను కుదిపేసిన పన్ను కుంభకోణం మ్యాగ్నిట్‌స్కై, ప్రపంచాన్ని దిగ్భ్రాంతికి గురిచేసిన పనామా పేపర్స్‌, భారత్‌తో సహా 30 దేశాల ఎన్నికలను ప్రభావితం చేసిన టీమ్‌ జార్జ్‌ తదితర హైప్రొఫైల్‌ కేసుల్లో ఓసీసీఆర్పీ అంచనాలే నిజమయ్యాయి. ఇప్పుడు అదానీ గ్రూప్‌ అవకతవకలపై ఓసీసీఆర్పీ పలు ఆధారాలు బయటపెట్టడం గమనార్హం.

కుప్పకూలిన షేర్లు.. 35 వేల కోట్లు ఆవిరి
ఓసీసీఆర్‌పీ పేల్చిన బాంబుతో మార్కెట్లో అదానీ గ్రూప్‌ షేర్లు అతలాకుతలమయ్యాయి. పది షేర్లలో తొమ్మిది 4శాతం వరకు నష్టపోయాయి. ఫలితంగా రూ.35 వేల కోట్లకు పైగా మార్కెట్‌ విలువ ఒక్కరోజులోనే హారతి కర్పూరంలా కరిగిపోయింది.

అదానీ గ్రూప్‌ కంపెనీల్లో ఆర్థిక అవకతవకలు జరిగాయి. ప్రమోటర్ల కుటుంబానికి బాగా దగ్గరి వ్యక్తులు అదానీ గ్రూప్‌ స్టాక్స్‌లో వందల మిలియన్ల డాలర్లను పెట్టుబడులుగా పెట్టి భారీగా లబ్ధి పొందారు. ఇందుకోసం మారిషస్‌ వంటి పలు దేశాల్లోని అనుమానాస్పద ఫండ్లను మాధ్యమంగా ఉపయోగించుకొన్నారు. ఈ మేరకు అదానీ గ్రూప్‌ కంపెనీలపై ఇన్వెస్టిగేటివ్‌ జర్నలిస్ట్స్‌ నెట్‌వర్క్‌ ఆర్గనైజ్డ్‌ క్రైమ్‌ అండ్‌ కరప్షన్‌ రిపోర్టింగ్‌ ప్రాజెక్ట్‌ (ఓసీసీఆర్పీ) సంచలన ఆరోపణలు చేసింది.

ఓసీసీఆర్పీ నివేదికలోని ప్రధానాంశాలు

• 2013లో అదానీ గ్రూప్‌ కంపెనీల మార్కెట్‌ క్యాపిటలైజేషన్‌ 8 బిలియన్‌ డాలర్లుగా ఉంటే, కిందటేడాది ఇది 260 బిలియన్‌ డాలర్లకు చేరింది. నరేంద్ర మోదీ ప్రధానిగా 2014లో బాధ్యతలు చేపట్టినప్పటి నుంచే అదానీ గ్రూప్‌ మార్కెట్‌ విలువ అనూహ్యంగా పెరిగిపోయింది.
• బొగ్గు, చమురు, విమానాశ్రయాలు, నౌకాశ్రయాలు, విద్యుత్తు, సహజ వాయువు, లాజిస్టిక్స్‌, రోడ్లు, రవాణా, డాటా సెంటర్స్‌, రియల్‌ ఎస్టేట్‌, మీడియా ఇలా.. దేశంలోని అన్ని ప్రధాన రంగాల్లోకి అదానీ గ్రూప్‌ వేళ్లూనుకొన్నది.
• ప్రధాని నరేంద్ర మోదీతో సాన్నిహిత్యం కారణంగానే 50 ఏండ్లపాటు కొనసాగే కాంట్రాక్టులు, టెండర్లు అదానీ గ్రూప్‌నకు దక్కాయి. ప్రతిపక్ష పార్టీలు కూడా దాదాపుగా ఇవే ఆరోపణలు చేస్తున్నాయి.
• అదానీ గ్రూప్‌ కంపెనీల్లో ఆర్థిక అవకతవకలు జరిగినట్టు గత జనవరిలో అమెరికాకు చెందిన షార్ట్‌సెల్లింగ్‌ సంస్థ హిండెన్‌బర్గ్‌ ఓ నివేదికలో ఆరోపించింది. దీంతో కేవలం కొద్దిరోజుల వ్యవధిలోనే గౌతమ్‌ అదానీ 60 బిలియన్‌ డాలర్ల సంపదను కోల్పోయారు. శ్రీమంతుల జాబితాలోనూ మూడు నుంచి 24వ స్థానానికి పడిపోయారు.
• హిండెన్‌బర్గ్‌ చేసిన ఆరోపణలపై అదానీ గ్రూప్‌ కూడా స్పందించింది. భారత్‌పై ఇదో వ్యూహాత్మక దాడిగా అభివర్ణిస్తూ జాతీయవాదాన్ని తెరపైకి తీసుకొచ్చింది.
• అదానీ వివాదంపై సుప్రీం కోర్టు నియమించిన కమిటీ, సెబీ వేర్వేరుగా దర్యాప్తును ప్రారంభించాయి. మేము (ఓసీసీఆర్పీ) సైతం దర్యాప్తు చేపట్టాం.
• పన్ను మినహాయింపులకు స్వర్గధామంగా చెప్పుకొనే మారిషస్‌ నుంచి అదానీ గ్రూప్‌ కంపెనీల్లో పెద్దయెత్తున పెట్టుబడుల వరద పారినట్టు గమనించాం.
• మొత్తం 13 విదేశీ కంపెనీల్లో రెండు కేసులను లోతుగా విశ్లేషించాం. ఎమర్జింగ్‌ ఇండియా ఫోకస్‌ ఫండ్‌ (ఈఐఎఫ్‌ఎఫ్‌), ఈఎం రీసర్జెంట్‌ ఫండ్‌ (ఈఎంఆర్‌ఎఫ్‌) అనే విదేశీ ఫండ్ల నుంచి అదానీ గ్రూప్‌లోకి భారీగా పెట్టుబడులు వచ్చినట్టు గుర్తించాం. ఈ లావాదేవీల్లో యూఏఈ, మారిషస్‌, బ్రిటిష్‌ వర్జిన్‌ ఐల్యాండ్స్‌లోని నాలుగు కంపెనీలు కూడా పాల్గొన్నట్టు కనిపెట్టాం.
• ఈఐఎఫ్‌ఎఫ్‌, ఈఎంఆర్‌ఎఫ్‌ సంస్థలు అదానీ స్టాక్స్‌ను తక్కువ ధరకు కొనుగోలు చేసి, ఎక్కువ మొత్తానికి విక్రయించి భారీగా లబ్ధి పొందినట్టు గుర్తించాం.
• ఇక్కడ అసలు విషయమేంటంటే, ఈఐఎఫ్‌ఎఫ్‌, ఈఎంఆర్‌ఎఫ్‌ సంస్థల్లో మెజారిటీ వాటా చైనాకు చెందిన చంగ్‌ చుంగ్‌-లింగ్‌, యూఏఈకి చెందిన నాజర్‌ అలీ షాబాన్‌ అహ్లీది కావడం.
• అదానీ కుటుంబంతో లింగ్‌, అహ్లీ దీర్ఘకాలంగా వ్యాపార సంబంధాలు కొనసాగిస్తున్నారు. అంతేకాదు గ్రూప్‌ ప్రమోటర్లకు వీరిద్దరు అత్యంత సన్నిహితులు.
• గౌతవ్‌ు అదానీ సోదరుడు వినోద్‌ అదానీకి చెందిన పలు కంపెనీల్లో లింగ్‌, అహ్లీ డైరెక్టర్లుగా, వాటాదారులుగా కూడా వ్యవహరించారు.
• ఇప్పుడు వీళ్లే.. అనుమానాస్పద విదేశీ ఫండ్ల ద్వారా అదానీ గ్రూప్‌ స్టాక్స్‌ను పెద్దయెత్తున కొనుగోలు చేశారు. షేర్ల ముఖవిలువను కృత్రిమంగా పెంచి ఎక్కువ ధరకు అమ్మేశారు. ఫలితంగా గణనీయంగా లాభాలను ఆర్జించారు.
• లింగ్‌, అహ్లీ అదానీ గ్రూప్‌ ప్రమోటర్ల తరఫునే ఇదంతా చేసినట్టు భావించాలా? ఒకవేళ అదే నిజమైతే.. కంపెనీలో ఇన్‌సైడర్లే 75 శాతానికిపైగా వాటాను సొంతం చేసుకున్నట్టు అవుతుంది కదా! ఇది భారత్‌ లిస్టింగ్‌ నిబంధనలకు విరుద్ధం కూడా.
• అదానీ స్టాక్స్‌లో కుటుంబ సభ్యుల సమన్వయంతోనే ట్రేడింగ్‌ జరిగినట్టు మా పరిశోధనలో కనుగొన్నాం.
• ఈఐఎఫ్‌ఎఫ్‌, ఈఎంఆర్‌ఎఫ్‌ ద్వారా అదానీ గ్రూప్‌నకు చెందిన 4 కంపెనీల్లో లింగ్‌, అహ్లీ వరుసగా 13.5 శాతం, 8 శాతం ఫ్రీ ఫ్లోటింగ్‌ షేర్లను కలిగి ఉన్నట్టు తెలుసుకొన్నాం. ఇవి గ్రూప్‌ ప్రమోటర్ల తరఫునే అని భావిస్తే.. భారత చట్టాలను ఉల్లంఘిస్తూ 75 శాతం పరిమితిని దాటడమే. అంటే స్టాక్‌ మ్యానిప్యులేషన్‌ జరిగినట్టే.

గౌతమ్‌ అదానీ ఆస్తి ఎప్పుడెలా?

2013: రూ.17,000 కోట్లు (నరేంద్ర మోదీ గుజరాత్‌కుసీఎంగా ఉన్నప్పుడు)

2020: రూ.1.6 లక్షల కోట్లు (మోదీ ప్రధాన మంత్రిగా దేశాన్ని పాలిస్తున్నప్పుడు)

2023, జనవరి 23: రూ.9.8 లక్షల కోట్లు (హిండెన్‌బర్గ్‌ నివేదికకు ముందురోజు)

2023, మార్చి 31: రూ.3.8 లక్షల కోట్లు(హిండెన్‌బర్గ్‌ వివాదం కొనసాగుతున్నప్పుడు)

2023, ఆగస్టు 30: రూ.4.5 లక్షల కోట్లు (ఓసీసీఆర్పీ నివేదికకు ముందురోజు)