Home loan Vs Plot loan| ఇంటిపై లోన్‌ తీసుకోవడం బెటరా.. ఇంటి స్థలంపైనా ? ఏది బెస్ట్‌ ?

Home or Plot| ఇల్లు, ఇండ్ల స్థ‌లం రెండూ ఆస్తి కొనుగోలు కింద‌కే వ‌స్తాయి. అయితే ఇల్లు, ఇండ్ల స్థ‌లం కొనుగోలు చేయ‌డానికి తీసుకునే రుణంలో తేడాలు....

August 11, 2021 / 01:11 AM IST

Home loan Vs Plot loan| ఇంటిపై లోన్‌ తీసుకోవడం బెటరా.. ఇంటి స్థలంపైనా ? ఏది బెస్ట్‌ ?

న్యూఢిల్లీ: కొత్త ఇల్లు కొనుక్కోవ‌డం ప్ర‌తి ఒక్క‌రి క‌ల‌.. కొంత మంది ఇండ్ల స్థ‌లం కొనుగోలు చేయ‌డానికి కూడా ప్రాధాన్యం ఇస్తారు. ఇల్లు లేదా ఇండ్ల స్థ‌లం కొనుగోలు చేయ‌డం భిన్నంగా క‌నిపించ‌క‌పోవ‌చ్చు. ఇల్లు, ఇండ్ల స్థ‌లం రెండూ ఆస్తి కొనుగోలు కింద‌కే వ‌స్తాయి. అయితే ఇల్లు, ఇండ్ల స్థ‌లం కొనుగోలు చేయ‌డానికి తీసుకునే ( Home loan Vs Plot loan ) రుణంలో తేడాలు ఉన్నాయి.

ఆస్తి, ఇల్లు కొనుగోళ్ల‌కు రుణాలు ల‌భ్యం

ఆస్తి కొనుగోలులో భాగంగా హోంలోన్లు ల‌భిస్తాయి. ఇప్ప‌టికే క‌ట్టి ఉన్న ఇండ్లు, నిర్మాణంలో ఉన్న ఇండ్లు, భ‌విష్య‌త్‌లో నిర్మించే ఇండ్ల‌పై బ్యాంకులు, ఆర్థిక సంస్థ‌లు ఇంటి రుణాలిస్తాయి. ఇంటి నిర్మాణం లేదా పెట్టుబ‌డుల కోసం ఆస్తి లేదా ఇండ్ల స్థ‌లం కొనుగోలుపైనా రుణాలు ల‌భిస్తాయి.

రుణంలో సారూప్య‌త‌లతోపాటు తేడాలు

ఇల్లు, ఇండ్ల స్థలం కొనుగోలు కోసం చేసే రెండు ర‌కాల రుణాల మ‌ధ్య కొన్ని సారూప్య‌త‌లు ఉన్నాయి. హోంలోన్ల మాదిరిగానే ల్యాండ్ లోన్‌ల‌కు కూడా నిబంధ‌న‌లు, వ‌డ్డీరేటు, ప్రాసెసింగ్ ఒకేలా ఉంటాయి. కానీ అంత‌ర్గ‌తంగా కొన్ని తేడాలు కూడా ఇమిడి ఉన్నాయి. అవేంటో చూద్దాం..

ఇండ్ల‌కు తేలిగ్గా రుణాలు.. కానీ

సిద్ధ‌మైన ఇండ్లు, నిర్మాణంలో ఉన్న ఇండ్లు, స్వంతంగా నిర్మించే ఇండ్ల‌కు హోం లోన్లు ల‌భిస్తాయి. నివాసం నిర్మాణ ప్రాతిప‌దిక‌న ఇండ్ల స్థ‌లం కొనుగోలు చేసేవారికి ల్యాండ్ లోన్లు తీసుకొవ‌చ్చు.

లొకేష‌న్‌, టైప్‌ను బ‌ట్టి ల్యాండ్ లోన్లు

సంబంధిత ఇండ్ల స్థ‌లం స్టేట‌స్‌, వాటి టైప్‌, లొకేష‌న్‌ను బ‌ట్టి ఇండ్ల స్థ‌లాల రుణాలు పొంద‌డానికి అర్హ‌త క‌లిగి ఉంటాయి. హోంలోన్లు మాత్రం ప‌లు బ్యాంకులు, ఆర్థిక సంస్థ‌లు ఆఫ‌ర్ చేస్తుంటాయ‌ని బేసిక్ హోంలోన్ సీఈవో కం స‌హ వ్య‌వ‌స్థాప‌కుడు అతుల్ మొంగా తెలిపారు.

ల్యాండ్ లోన్ల‌పై గ‌రిష్ఠ ప‌రిమితి ఇలా

మీరు తీసుకునే ఆస్తిని బ‌ట్టి లోన్ టూ వాల్యూ (ఎల్టీవీ) లేదా లిక్విడిటీ క‌వ‌రేజీ నిష్ప‌త్తి (ఎల్సీఆర్‌) ఆధారంగా ఇల్లు లేదా ల్యాండ్ లోన్ ల‌భిస్తుంది. ఇండ్ల రుణాలు తీసుకునేవారికి ఆ ఇంటి విలువ‌పై 75-90 శాతం వ‌ర‌కు లోన్ తీసుకోవ‌చ్చు. ఇండ్ల స్థ‌లంపై రుణాల‌ను మాత్రం గ‌రిష్ఠంగా ఎల్టీవీపై 75-80 శాతానికి ప‌రిమితి విధించారు.

ల్యాండ్ కొంటే 20% డౌన్ పేమెంట్ చేయాలి

మీరు వ్య‌క్తిగ‌త అవ‌స‌రాలు లేదా ఇన్వెస్ట్‌మెంట్ కోసం ఇండ్ల స్థ‌లం కొనుగోలు చేయాల‌ని భావిస్తున్నారా.. అయితే.. మొత్తం ప్లాట్ విలువ‌లో క‌నీసం 20 శాతం డౌన్ పేమెంట్ చేయాలి. ఇండ్ల స్థ‌లాల‌తో పోలిస్తే ఇండ్ల రుణాల‌కు రిస్క్ త‌క్కువ‌. ఇంటి రుణంపై వ‌డ్డీరేట్లు మిగ‌తా రుణాల కంటే త‌క్కువ‌. కానీ ల్యాండ్ లోన్‌పై వ‌డ్డీరేట్లు ఎక్కువే ఉంటాయి.

ఇంటి రుణాల‌కు రీపేమెంట్‌కు అధిక టెన్యూర్ అంటే దాదాపు 30 ఏండ్ల వ‌ర‌కు చెల్లించొచ్చు. కానీ ల్యాండ్ లోన్ రీపేమెంట్ గ‌డువు అంత ఉండ‌దు.

ఇంటి లోన్ మాదిరి నో టాక్స్ డిడ‌క్ష‌న్‌

ఇంటి రుణాలు తీసుకున్న‌వారి రీ పేమెంట్‌ను బ‌ట్టి ప‌న్ను మిన‌హాయింపులు ఉంటాయి. కానీ ల్యాండ్ లోన్ల‌కు ప‌న్ను మిన‌హాయింపులు వ‌ర్తించ‌వు. సొంతంగా నిర్మించుకున్న ఆస్తిపై తీసుకున్న రుణం వ‌డ్డీ మీద ఆదాయం ప‌న్ను చ‌ట్టంలోని 80సీ, 24బీ సెక్ష‌న్ల కింద మిన‌హాయింపులు ఉంటాయి. కానీ ల్యాండ్ కొనుగోలు చేసిన వారికి ఈ మిన‌హాయింపులు వ‌ర్తించ‌వు.