హెచ్‌డీఎఫ్‌సీ బ్యాంక్‌ అదుర్స్‌

• క్యూ4లో 10వేల కోట్ల లాభం

న్యూఢిల్లీ, ఏప్రిల్‌ 16: దేశంలో అతిపెద్ద ప్రైవేట్‌ రంగ ఆర్థిక సేవల సంస్థ హెచ్‌డీఎఫ్‌సీ బ్యాంక్‌ విశ్లేషకుల అంచనాలకుమించి ఆర్థిక ఫలితాలను ప్రకటించింది. గడిచిన ఆర్థిక సంవత్సరం చివరి త్రైమాసికానికిగాను రూ.10,055.20 కోట్ల స్టాండ్‌లోన్‌ నికర లాభాన్ని ఆర్జించింది. రుణాలకు డిమాండ్‌ నెలకొనడం, మొండి బకాయిల కోసం నిధుల కేటాయింపులు తగ్గుముఖం పట్టడంతో ఒక త్రైమాసికంలో 10 వేల కోట్ల కంటే అధిక లాభాన్ని ఆర్జించడం ఇదే తొలిసారి. అంతక్రితం ఏడాది ఇదే త్రైమాసికంలో బ్యాంక్‌ రూ.8,186.51 కోట్ల లాభాన్ని గడించింది. గత త్రైమాసికంలో పన్నుల కోసం రూ.2,989.50 కోట్ల నిధులను వెచ్చించినప్పటికీ రూ.10 వేల కోట్ల కంటే అధికంగా లాభాన్ని ఆర్జించినట్లు బ్యాంక్‌ బీఎస్‌ఈకి సమాచారం అందించింది. సమీక్షకాలంలో బ్యాంక్‌ ఆదాయం ఏడాది ప్రాతిపదికన 8 శాతం అధికమై రూ.41,085.78 కోట్లకు చేరుకున్నది. అంతక్రితం ఇది రూ.38,017.50 కోట్లుగా ఉన్నది.

ఆర్థిక ఫలితాల్లో ముఖ్యాంశాలు..

• బ్యాంక్‌ అడ్వాన్స్‌లు 20.8 శాతం పెరిగి రూ.1,368,821 కోట్లకు చేరుకున్నాయి
• రిటైల్‌ రుణాలు 15.2 శాతం, కమర్షియల్‌, గ్రామీణ బ్యాంకింగ్‌ రుణాలు 30.4 శాతం, కార్పొరేట్‌ రుణాలు 17.4 శాతం పెరిగాయి.
• నికర వడ్డీ ఆదాయం 10.2 శాతం పెరిగి రూ.18,872.70 కోట్లకు చేరుకున్నది.
• వడ్డీయేతర ఆదాయం 29 శాతం అధికమై రూ.7,637.10 కోట్లు వసూలైంది.
• కొత్తగా 563 శాఖలు రాగా, 7,167 మంది సిబ్బందిని బ్యాంక్‌ రిక్రూట్‌ చేసుకున్నది. 2021-22 మొత్తానికి 734 శాఖలు ఏర్పాటు కాగా, 21,486 మంది కొత్త సిబ్బంది వచ్చారు.
• బ్యాంక్‌ స్థూల ఎన్‌పీఏ విలువ 1.26 శాతం నుంచి 1.17 శాతానికి తగ్గింది. నికర ఎన్‌పీఏ 0.32 శాతంగా ఉన్నది.
• మొండి బకాయిల కోసం బ్యాంక్‌ రూ.3,312. 40 కోట్ల నిధులను కేటాయించింది.
• 2021-22 ఆర్థిక సంవత్సరానికిగాను రూ. 1,57,263 కోట్ల ఆదాయంపై రూ. 36,961. 30 కోట్ల నికర లాభాన్ని గడించింది.
• డిపాజిట్లు రూ.1,55,92,17 కోట్లకు చేరుకున్నాయి. అంతక్రితం ఏడాదితో పోలిస్తే 16.8 శాతం పెరిగాయి.