బంగారం కొనుగోలుదారుల‌కు ఊర‌ట‌.. ఎందుకంటే?!

బంగారం కొనుగోలుదారుల‌కు ఊర‌ట‌.. ఎందుకంటే?! బంగారం కొనుగోలు దారుల‌కు కేంద్ర ప్ర‌భుత్వం ఊర‌ట క‌లిగించింది. వ‌చ్చేనెల ఒక‌టో తేదీ నుంచి కొనుగోలు చేసే బంగారు ..

May 25, 2021 / 11:02 PM IST

న్యూఢిల్లీ: బంగారం కొనుగోలు దారుల‌కు కేంద్ర ప్ర‌భుత్వం ఊర‌ట క‌లిగించింది. వ‌చ్చేనెల ఒక‌టో తేదీ నుంచి కొనుగోలు చేసే బంగారు ఆభ‌ర‌ణాల‌పై హాల్‌మార్క్ త‌ప్ప‌నిస‌ర‌ని ఇంత‌కుముందు పేర్కొన్న కేంద్రం.. తాజాగా ఆ గ‌డువును పొడిగించింది. క‌రోనా మ‌హ‌మ్మారి దేశ‌వ్యాప్తంగా విశ్వ‌రూపం ప్ర‌ద‌ర్శిస్తున్న త‌రుణంలో ఈ నిర్ణ‌యం తీసుకున్న‌ది.

కేంద్ర వినియోగ‌దారుల వ్య‌వ‌హారాల శాఖ మంత్రి పీయూష్ గోయ‌ల్ అధ్య‌క్ష‌త‌న జ‌రిగిన స‌మావేశంలో ఈ మేర‌కు నిర్ణ‌యం తీసుకున్నారు. క‌రోనా నేప‌థ్యంలో ఆభ‌ర‌ణాల త‌యారీ దారుల‌కు మ‌రింత స‌మ‌యం ఇవ్వాల‌ని వివిధ వ‌ర్గాల‌ విజ్ఞ‌ప్తి మేర‌కు ఈ నిర్ణ‌యం తీసుకున్న‌ట్లు కేంద్రం ఓ ప్ర‌క‌ట‌న‌లో తెలిపింది.

దీని ప్ర‌కారం వ‌చ్చేనెల ఒక‌టో తేదీ నుంచి 15వ తేదీ వ‌ర‌కు హాల్‌మార్కింగ్ గ‌డువు పొడిగిస్తున్న‌ట్లు వెల్ల‌డించింది. అయితే, బంగారం ఆభ‌ర‌ణాల వ్యాపారులు కేవ‌లం 14, 18, 22 క్యారెట్ల బంగారం ఆభ‌ర‌ణాల‌ను విక్ర‌యించేందుకు అనుమ‌తినిస్తారు.

బంగారం కొనుగోలు దారుల‌ను ఆభ‌ర‌ణాల వ్యాపారులు మోస‌గించ‌కుండా హాల్ మార్కింగ్ త‌ప్ప‌నిస‌రి చేస్తున్న‌ట్లు కేంద్రం తెలిపింది. ఇందుకు అనుగుణంగా బ్యూరో ఆఫ్ ఇండియ‌న్ స్టాండ‌ర్డ్ (బీఐఎస్‌)లో ఆభ‌ర‌ణాల వ్యాపారులు త‌మ సంస్థ‌ల పేర్లు రిజిస్ట‌ర్ చేసుకోవాలి.