Congress Govt | ప్రైవేట్‌కు స్వాగతం.. ప్రభుత్వ సంస్థలకు వీడ్కోలు

ఎవరి స్థలంలో వాళ్లు ఇల్లు కట్టుకోవడం సహజం. అదే మన స్థలం మరెవరికో ఇచ్చి, మనం వెళ్లి పక్కవాళ్ల స్థలంలో ఇల్లు కట్టుకుంటే ఎలా ఉంటుంది? విద్యుత్తు ప్లాంట్ల నిర్మాణం విషయంలో రాష్ట్ర ప్రభుత్వ వైఖరి ఇలాగే ఉంది.

• పక్క రాష్ర్టాలకు ప్రభుత్వరంగం
• విద్యుత్తు ప్లాంట్ల నిర్మాణంలో ప్రభుత్వ విధానమిది
• ఇతర రాష్ర్టాల్లో జెన్‌కో, సింగరేణి పెట్టుబడులు..
• తెలంగాణలో ప్రైవేట్‌ సంస్థల పెట్టుబడులకు ఎంవోయూ
• విద్యుత్తు విషయంలో తిరోగమన దిశలో సర్కారు

Congress Govt | హైదరాబాద్‌, ఫిబ్రవరి 14 (నమస్తే తెలంగాణ): ఎవరి స్థలంలో వాళ్లు ఇల్లు కట్టుకోవడం సహజం. అదే మన స్థలం మరెవరికో ఇచ్చి, మనం వెళ్లి పక్కవాళ్ల స్థలంలో ఇల్లు కట్టుకుంటే ఎలా ఉంటుంది? విద్యుత్తు ప్లాంట్ల నిర్మాణం విషయంలో రాష్ట్ర ప్రభుత్వ వైఖరి ఇలాగే ఉంది. మన రాష్ట్రంలో కొత్త విద్యుత్తు ప్లాంట్లు ఏర్పాటు చేసే అవకాశాన్ని ప్రైవేట్‌కు కట్టబెడుతున్నది. మరోవైపు ప్రభుత్వరంగ సంస్థలైన జెన్‌కో, సింగరేణి ద్వారా ఇతర రాష్ర్టాల్లో ప్లాంట్లు ఏర్పాటుచేసేందుకు ప్రయత్నిస్తున్నది. మన దగ్గర ప్రైవేట్‌ ప్లాంట్లకు గేట్లు తెరిచి, మన విద్యుత్తు సంస్థల చేత రాజస్థాన్‌, హిమాచల్‌ప్రదేశ్‌ రాష్ర్టాల్లో విద్యుత్తు ప్లాంట్లను నిర్మిస్తున్నది. ప్రభుత్వ తీరును విద్యుత్తురంగ నిపుణులు తీవ్రంగా వ్యతిరేకిస్తున్నారు. ఇదేం పద్ధతి అంటూ ప్రశ్నిస్తున్నారు.

జెన్‌కో, సింగరేణితో ఇతర రాష్ర్టాల్లో పనులు

విద్యుత్తు ప్లాంట్ల నిర్మాణం, నిర్వహణ విషయంలో జెన్‌కో, సింగరేణి సంస్థలు ఆరితేరాయి. జెన్‌కో థర్మల్‌, హైడల్‌ విద్యుత్తు ప్లాంట్లు నిర్మించగా.. సింగరేణి థర్మల్‌, సోలార్‌ ప్లాంట్లను నిర్మించడంతోపాటు రామగుండంలో కొత్తగా పంప్‌స్టోరేజీ ప్లాంట్‌ నిర్మాణాన్ని చేపట్టింది. ఈ రెండు సంస్థలను కాదని ప్రభుత్వం కొత్త పవర్‌ ప్లాంట్ల నిర్మాణాన్ని ప్రైవేట్‌కు కట్టబెడుతున్నది. ఆ రెండు సంస్థల చేత రాజస్థాన్‌, హిమాచల్‌ప్రదేశ్‌ రాష్ర్టాల్లో కొత్త ప్లాంట్లు పెట్టిస్తున్నది. ప్రభుత్వ సంస్థలతో సొంత రాష్ర్టాన్ని వదిలి ఇతర రాష్ర్టాల్లో పెట్టుబడులు పెట్టించడం ఎందుకో.. దీని వెనుకున్న మతలబేమిటోనని నిపుణులు అనుమానం వ్యక్తం చేస్తున్నారు.

ఇతర రాష్ర్టాల్లో మనంపెట్టేవి..

• టీజీ జెన్‌కో హిమాచల్‌ప్రదేశ్‌లో బిల్డ్‌ ఆపరేషన్‌ అండ్‌ ట్రాన్స్‌పర్‌ (బీవోటీ) పద్ధతి లో జలవిద్యుత్తు కేంద్రం (హైడల్‌) నిర్మాణనికి సంప్రదింపులు జరుపుతున్నది.
• సింగరేణి సంస్థ రాజస్థాన్‌లో 3,100 మెగావాట్ల విద్యుత్తు పవర్‌ ప్లాంట్లను నెలకొల్పేందుకు ఎంవోయూలు కుదుర్చుకుంది. 1600 మోగావాట్ల థర్మల్‌, 1,500 మోగావాట్ల సోలార్‌ పవర్‌ ప్లాంట్లను నెలకొల్పనుంది.
• సింగరేణి సంస్థ ఒడిశాలోని నైనీలో 1, 600 మోగావాట్ల సామర్థ్యం గల థర్మల్‌ విద్యుత్తు ప్లాంట్‌ను నెలకొల్పనుంది.

మన రాష్ట్రంలోకి ప్రైవేట్‌ పెట్టుబడులు

• సన్‌ పెట్రోకెమికల్స్‌ సంస్థ రూ.45 వేల కోట్ల విలువైన పెట్టుబడులు పెట్టేందుకు ఎంఓయూ కుదుర్చుకున్నది. ఈ సంస్థ నాగర్‌కర్నూల్‌, మంచిర్యాల, ములుగు జిల్లాల్లో పంప్డ్‌ స్టోరేజీ పవర్‌ ప్లాంట్లను ఏర్పాటు చేయనుంది. ఈ సంస్థ 3,400 మెగావాట్ల సామర్థ్యం గల ప్లాంట్లను నెలకొల్పేందుకు రాష్ట్ర ప్రభుత్వంతో ఒప్పందాలు చేసుకుంది.
• మెగా ఇంజినీరింగ్‌ లిమిటెడ్‌ సంస్థ 11వేల కోట్ల పెట్టుబడులతో 2,160 మెగావాట్ల సామర్థ్యం గల పంప్డ్‌ స్టోరేజీ పవర్‌ప్లాంట్లను నెలకొల్పనుంది.
• మెగా ఇంజినీరింగ్‌ లిమిటెడ్‌ సంస్థ మరో 3వేల కోట్లను రాష్ట్రంలో పెట్టుబడి
  పెట్టి, వెయ్యి మెగావాట్ల బ్యాటరీ ఎనర్జీ స్టోరేజీ (బీఈఎస్‌ఎస్‌) ప్లాంట్‌ను
  నెలకొల్పనుంది.
• మైత్రా ఎనర్జీ సంస్థ 7వేల కోట్లు పెట్టేందు కు ముందుకొచ్చింది. ఈ సంస్థ 2,400 మోగావాట్ల సోలార్‌ సెల్‌, మరో 2,400మెగావాట్ల సోలార్‌ మాడ్యూల్‌ మాన్యుఫాక్చరింగ్‌ ప్లాంట్‌ను నెలకొల్పనుంది.

హడావిడిగా పాలసీ.. అందుకేనా

క్లీన్‌ ఎనర్జీని ప్రోత్సహించడంలో భాగంగా ప్రభుత్వం ఇటీవలే గ్రీన్‌ ఎనర్జీ పాలసీని రూపొందించింది. ఈ పాలసీకి క్యాబినెట్‌లో ఆమోదం లభించింది. అయితే దావోస్‌ పర్యటనలో భాగంగా రాష్ట్రప్రభుత్వం విద్యుత్తు రంగంలో 66 వేల కోట్ల పెట్టుబడులకు సంబంధించిన ఒప్పందాలు కుదుర్చుకున్నది. దావోస్‌ సదస్సుకు ముందే సర్కారు గ్రీన్‌ ఎనర్జీ పాలసీని తీసుకొచ్చింది. తాజాగా వచ్చిన పెట్టుబడులన్నీ గ్రీన్‌ ఎనర్జీ రంగానికి సంబంధించినవే. అంటే దావోస్‌ సదస్సుకు ముందే పాలసీ రూపొందించడం వెనుక ఈ రంగంలో ప్రైవేట్‌ పెట్టుబడులను ఆహ్వానించాలన్న ముందస్తు కుట్ర దాగి ఉందన్న అనుమానాలు బలపడుతున్నాయి. హడావిడిగా పాలసీ రూపకల్పన వెనుక ఇదే కోణం దాగి ఉందన్న వాదనలు వినిపిస్తున్నాయి.