మద్యం అలవాటు లేకున్నా

మద్యం తాగితే కాలేయంపై ప్రతికూల ప్రభావం పడుతుంది. అందుకే, మద్యానికి దూరంగా ఉండాలని చెబుతారు. అయితే, కొందరిలో మద్యం అలవాటు లేకున్నా.. లివర్‌ దెబ్బతింటున్నది. ఇందుకు అనేక కారణాలు ఉన్నాయని వైద్య నిపుణులు చెబుతున్నారు.

మద్యం తాగితే కాలేయంపై ప్రతికూల ప్రభావం పడుతుంది. అందుకే, మద్యానికి దూరంగా ఉండాలని చెబుతారు. అయితే, కొందరిలో మద్యం అలవాటు లేకున్నా.. లివర్‌ దెబ్బతింటున్నది. ఇందుకు అనేక కారణాలు ఉన్నాయని వైద్య నిపుణులు చెబుతున్నారు.

ఆల్కహాల్‌ను దూరం పెట్టినా.. కొందరు ఆహారంపై నియంత్రణ పాటించలేరు. అతిగా వేయించిన ఆహార పదార్థాలు, జంక్‌ఫుడ్‌ ఎక్కువగా తీసుకుంటారు. ఇలాంటివారిలో కాలేయం దెబ్బతినే అవకాశం ఎక్కువగా ఉంటుంది. శారీరక శ్రమ లేకపోయినా, అధిక బరువు ఉన్నా.. కాలేయంపై ఒత్తిడి పడుతుంది. దీర్ఘకాలంలో లివర్‌ డ్యామేజ్‌ అవుతుంది. ఇక కొందరు ఏ వైద్యులను సంప్రదించకుండానే దీర్ఘకాలిక మందులు తీసుకుంటారు. ఈ అలవాటు ఆరోగ్యానికి.. అందులోనూ కాలేయానికి ఏమాత్రం మంచిదికాదు. ఇవేకాకుండా, వైరల్‌ ఇన్ఫెక్షన్లు, కలుషిత నీటితో వ్యాపించే వ్యాధులు, మానసిక ఒత్తిడి, అపసవ్య జీవనశైలి, నిద్రలేమి లాంటి సమస్యలు.. కాలేయాన్ని తీవ్రంగా దెబ్బతీస్తాయి. కొందరిలో కుటుంబ చరిత్ర, ఇతర ఆరోగ్య సమస్యలు కూడా కాలేయ ఆరోగ్యంపై ప్రతికూల ప్రభావం చూపుతాయి.

అయితే, కాలేయం ఆరోగ్యంగా ఉండాలంటే.. ఆహార నియమాలు తప్పకుండా పాటించాలి. ఇంటి ఆహారానికే ప్రాధాన్యం ఇవ్వాలి. వేయించిన, అతిగా ప్రాసెస్‌ చేసిన ఆహారాన్ని పక్కన పెట్టాలి. నడక లాంటి తేలికపాటి వ్యాయామం చేయాలి. అన్నిటికన్నా ముఖ్యంగా, పుష్కలంగా నీరు తాగాలి. సమయానికి భోజనం చేయాలి. ఇలా మంచి ఆహారం, మంచి జీవనశైలితో.. కాలేయం ఆరోగ్యాన్ని కాపాడుకోవచ్చని నిపుణులు చెబుతున్నారు. అంతేకాకుండా, వైద్యుల ప్రిస్క్రిప్షన్‌ లేకుండా మందులు తీసుకోవడం మానుకోవాలి. ఒత్తిడిని తగ్గించడానికి యోగా, ధ్యానం అలవాటు చేసుకోవాలి.