పుత్తడి ధరల్లో తేడాలెందుకో..

బంగారం ధరలు ఏ రోజుకారోజు పెరుగుతూ పోతున్నాయి. కేవలం వారం రోజుల్లోనే తులం ధర దాదాపు రూ.3,000 మేర ఎగిసింది. మరోవైపు పెండ్లిడ్ల సీజన్‌ నడుస్తున్నది.

బంగారం ధరలు ఏ రోజుకారోజు పెరుగుతూ పోతున్నాయి. కేవలం వారం రోజుల్లోనే తులం ధర దాదాపు రూ.3,000 మేర ఎగిసింది. మరోవైపు పెండ్లిడ్ల సీజన్‌ నడుస్తున్నది. ధర ఎంతైనా అవసరాలకు ఆభరణాలు కొనడం తప్పనిసరే. కొనడానికి వెళితే ఒకో దుకాణంలో ఒకో ధర చెపుతుంటారు. ఆయా జ్యువెలర్‌ వెబ్‌సైట్‌ల్లోనూ ధరల్లో తేడాలుంటాయి. అలాగే ప్రచార సాధనాల్లో చూస్తున్న బంగారం ధరకు షాప్‌లో లేదా వెబ్‌సైట్‌లో చూసే ధరకు వ్యత్యాసం కన్పిస్తుంది. దీంతో ఎక్కడ కొనాలి? కొన్న బంగారం స్వచ్ఛత ఎంత? ఏ రేటుకు కొనాలి? తదితర సందేహాలన్నీ ముసిరేస్తాయి. ఆ సందేహాలు తొలగిపోవాలంటే నగల ధరల్ని ఏయే అంశాలు నిర్దేశిస్తాయో తెలుసుకోవాలి. అవి..

బంగారం స్వచ్ఛత

బంగారు నగల్ని వివిధ రకాల పుత్తడితో తయారు చేస్తారు. బంగారం స్వచ్ఛతను క్యారెట్‌తో కొలుస్తారు. పూర్తి స్వచ్ఛతతో (24 క్యారెట్‌) కూడిన బంగారం సున్నితంగా ఉంటుంది. అందుచేత నగగా మలచడానికి మరో లోహాన్ని అందులో కలుపుతారు. దీనితో ఆభరణాల బంగారంలో స్వచ్ఛత కొంత తగ్గుతుంది. సాధారణంగా 22 క్యారెట్‌ బంగారాన్ని నగల తయారీలో ఉపయోగిస్తారు. 22 క్యారెట్‌ అంటే ఆ నగల్లో 91.6 శాతం బంగారం ఉంటుందన్న మాట. 18 క్యారెట్‌, 14 క్యారెట్‌ బంగారు నగలు సైతం లభిస్తాయి. 22 క్యారెట్‌ బంగారానికంటే వీటిలో ఉండే బంగారం స్వచ్ఛత మరింత తక్కువ ఉంటుంది.

హాల్‌ మార్కింగ్‌

మనం కొన్న ఆభరణాల్లో ఉన్న బంగారం స్వచ్ఛతను ధృవీకరించేదే హాల్‌ మార్కింగ్‌. ఈ ప్రక్రియను బ్యూరో ఆఫ్‌ ఇండియన్‌ స్టాండర్డ్స్‌ (బీఐఎస్‌) నిర్వహించి, నగలో ఉన్న స్వచ్ఛతను సర్టిఫై చేస్తుంది. అరు అంకెలు కలిగిన అల్ఫాన్యూమరిక్‌ హెచ్‌యూఐడీ కోడ్‌ లేకుండా జువెల్లర్‌ బంగారం అమ్మడం నిషిద్ధం. ఈ నిబంధన 2023 ఏప్రిల్‌ 1 నుంచి అమలులోకి వచ్చింది.

మూడు ప్రధాన అంశాలు

ఆభరణ వ్యాపారులు ముఖ్యంగా మూడు అంశాల ఆధారంగా బంగారు నగల ధరను నిర్ణయిస్తారు.అవి:

1. ఆభరణాల బంగారం..అంటే 22 క్యారెట్‌, 18 క్యారెట్‌, 14 క్యారెట్‌
2.ఆభరణంలో వాడే బంగారంతో కలిపే లోహం..అంటే వెండి, రాగి, టైటానియం, ఐరెన్‌, జింక్‌. సాధారణంగా రాగిని వాడుతారు.
3. ఆయా నగ తయారీకి అయ్యే వ్యయం. డిజైన్‌ను బట్టి వ్యయం లో మార్పులుంటాయి. ఎందుకంటే ప్రతీ నగకూ కటింగ్‌, పాలిషింగ్‌కు వేరువేరు విధానాల్ని అవలంబిస్తారు. అంతకంటే ముఖ్యంగా ఆ డిజైన్‌ యంత్రం ద్వారా రూపొందించబడిందా? లేక హస్తకళా నైపుణ్యంతో రూపుదిద్దుకుందా అనే అంశాల ఆధారంగా తయారీ చార్జీలు ఉంటాయి.