FD Rates | ఎఫ్‌డీ రేట్లు పెరిగాయ్‌.. ఎక్కడ ఏది అత్యుత్తమమో తెలుసా?

ఫిక్స్‌డ్‌ డిపాజిట్‌ (ఎఫ్‌డీ) అనేది ఓ సురక్షిత పెట్టుబడి సాధనం. అంతేగాక హామీపూర్వక రాబడి పథకం కూడా. నిర్ధిష్ట రీతిలో చేసే ఏకకాల నగదు మొత్తాలపై నిర్ణీత కాలవ్యవధులకుగాను స్పష్టమైన వడ్డీరేట్లను ఇందులో చెల్లిస్తారు.

FD Rates | ఫిక్స్‌డ్‌ డిపాజిట్‌ (ఎఫ్‌డీ) అనేది ఓ సురక్షిత పెట్టుబడి సాధనం. అంతేగాక హామీపూర్వక రాబడి పథకం కూడా. నిర్ధిష్ట రీతిలో చేసే ఏకకాల నగదు మొత్తాలపై నిర్ణీత కాలవ్యవధులకుగాను స్పష్టమైన వడ్డీరేట్లను ఇందులో చెల్లిస్తారు. పోస్టాఫీస్‌, ప్రభుత్వ-ప్రైవేట్‌ రంగ బ్యాంకులు, స్మాల్‌ ఫైనాన్స్‌ బ్యాంకులు, బ్యాంకింగేతర ఆర్థిక సంస్థ (ఎన్‌బీఎఫ్‌సీ)ల్లో ఎఫ్‌డీ స్కీములు అందుబాటులో ఉంటున్నాయి.

మార్కెట్‌ రిస్కులకు దూరంగా ఉండాలనుకునే మదుపరులకు ఈ ఎఫ్‌డీలు చక్కని పెట్టుబడి సాధనాలని చెప్పవచ్చు. అలాగే తమ పెట్టుబడుల్లో వైవిధ్యాన్ని చూపుతూ మార్కెట్‌, నాన్‌-మార్కెట్‌ లింక్డ్‌ ఆప్షన్లను ఎంచుకోవాలనుకునేవారికీ ఎఫ్‌డీలు సరైనవే. అయితే సాధారణ డిపాజిటర్లకు, సీనియర్‌ సిటిజన్స్‌కు వడ్డీరేట్లలో తేడాలూ ఉంటాయి. సీనియర్‌ సిటిజన్స్‌కు కొంత ఎక్కువ మొత్తంలో ఆయా బ్యాంకులు, ఎన్‌బీఎఫ్‌సీలు వడ్డీరేటునిస్తున్నాయి.

కాగా, బ్యాంకులు రుణాలను ఎక్కువగా ఇస్తున్నాయని, డిపాజిట్లు మాత్రం తగ్గిపోతున్నాయని, రెండింటి మధ్య బ్యాలెన్స్‌ లేకపోతే చిక్కులు తప్పవని అటు రిజర్వ్‌ బ్యాంక్‌ ఆఫ్‌ ఇండియా (ఆర్బీఐ), ఇటు కేంద్ర ఆర్థిక మంత్రిత్వ శాఖ హెచ్చరించిన నేపథ్యంలో బ్యాంకింగ్‌ రంగం ఎఫ్‌డీల వృద్ధిపై దృష్టి సారించింది. ఇందులో భాగంగానే డిపాజిటర్లను ఆకర్షించేందుకు వివిధ కాలపరిమితి ఎఫ్‌డీలపై ఇటీవల వడ్డీరేట్లను పెంచాయి. ప్రస్తుతం జనరల్‌, సీనియర్‌ సిటిజన్స్‌కు అత్యుత్తమ వడ్డీరేట్లు ఏ సంస్థల్లో, మరే టెన్యూర్స్‌పై ఉన్నాయో ఒక్కసారి చూద్దాం.

• 500 రోజుల ఎఫ్‌డీపై ఆర్బీఎల్‌ బ్యాంక్‌ సాధారణ కస్టమర్లకు అత్యధికంగా 8.10 శాతం వడ్డీ ఇస్తున్నది. సీనియర్‌ సిటిజన్లకైతే 8.60 శాతం ప్రకటించింది.
• 4 ఏండ్ల 7 నెలల (55 నెలలు) ఎఫ్‌డీపై హెచ్‌డీఎఫ్‌సీ బ్యాంక్‌ 7.40 శాతం వడ్డీరేటును అందిస్తున్నది.
• 666 రోజుల ఎఫ్‌డీపై బ్యాంక్‌ ఆఫ్‌ ఇండియా వడ్డీరేటు 7.30 శాతం.
• 444 రోజుల ఎఫ్‌డీపై ఇండియన్‌ ఓవర్‌సీస్‌ బ్యాంక్‌ 7.30 శాతం వడ్డీరేటును ఇస్తున్నది.
• 444 రోజుల ఎఫ్‌డీలపై ఎస్బీఐ, కెనరా బ్యాంకులు 7.25 శాతం వడ్డీరేటునిస్తున్నాయి. సీనియర్‌ సిటిజన్లకైతే 7.75 శాతం వడ్డీనిస్తున్నది ఎస్బీఐ.
• 15 నెలలు-రెండేండ్ల కాలవ్యవధి ఎఫ్‌డీలకుగాను ఐసీఐసీఐ బ్యాంక్‌ 7.25 శాతం వడ్డీరేటును ప్రకటించింది.
• 399 రోజుల ఎఫ్‌డీపై బ్యాంక్‌ ఆఫ్‌ బరోడాలో 7.25 శాతం వడ్డీరేటు నడుస్తున్నది. సీనియర్‌ సిటిజన్లకు 7.75 శాతం వడ్డీ వస్తుంది. 333 రోజుల ఎఫ్‌డీ కూడా ఉన్నది. దీనిపై సాధారణ డిపాజిటర్లకు 7.15 శాతం, సీనియర్‌ సిటిజన్లకు 7.65 శాతం వడ్డీ అందుతుంది.
• 400 రోజుల ఎఫ్‌డీపై పంజాబ్‌ నేషనల్‌ బ్యాంక్‌ 7.25 శాతం వడ్డీరేటును చెల్లిస్తున్నది.
• 400 రోజుల ఎఫ్‌డీపై సాధారణ డిపాజిటర్లకు 7.25 శాతం, సీనియర్‌ సిటిజన్లకు 7.75 శాతం వడ్డీ ఇండియన్‌ బ్యాంక్‌ ఇస్తున్నది. 300 రోజుల ఎఫ్‌డీకి వడ్డీరేట్లు వరుసగా 7.05 శాతం, 7.55 శాతంగా ఉన్నాయి.
• 17 నెలల ఎఫ్‌డీకి యాక్సిస్‌ బ్యాంక్‌ 7.20 శాతం వడ్డీరేటును ఆఫర్‌ చేస్తున్నది.
• 375 రోజుల ఎఫ్‌డీపై ఐడీబీఐ బ్యాంక్‌ వడ్డీరేటు 7.25 శాతం. సీనియర్‌ సిటిజన్లకు 7.75 శాతం. 444 రోజుల ఎఫ్‌డీపై సాధారణంగా 7.35 శాతం వడ్డీ వస్తున్నది. సీనియర్‌ సిటిజన్లకు 7.85 శాతం లభిస్తుంది.

ఎఫ్‌డీల్లో ఏయే రకాలు?

• ఫిక్స్‌డ్‌ డిపాజిట్లలో అనేక రకాలున్నాయి. కాబట్టి పెట్టుబడులు పెట్టేముందు వాటి గురించి తెలుసుకోవడం ఉత్తమం. అప్పుడే మీ అవసరాలకు తగిన విధంగా డిపాజిట్లు చేయగలరు.
• కార్పోరేట్‌ ఎఫ్‌డీలుఈ ఎఫ్‌డీలను కంపెనీలు (బ్యాంకులు మినహా) చేస్తాయి.
• స్టాండర్డ్‌ ఎఫ్‌డీలు ఇవి బేసిక్‌ ఇన్వెస్ట్‌మెంట్‌ స్కీములు. నిర్ధిష్ట కాలవ్యవధి పూర్తయిన తర్వాత డిపాజిట్లను తీసుకోవచ్చు.
• సీనియర్‌ సిటిజన్‌ ఎఫ్‌డీలు60 ఏండ్ల వయసు దాటినవారు మాత్రమే వీటికి అర్హులు. చాలా సంస్థలు వీరికి ప్రత్యేకంగా వడ్డీరేటును అధికంగా చెల్లిస్తాయి.
• ట్యాక్స్‌-సేవింగ్‌ ఎఫ్‌డీలువీటికి పన్ను మినహాయింపులుంటాయి. అయితే గరిష్ఠంగా ఏటా రూ.1.5 లక్షల వరకే డిపాజిట్‌ చేసుకోవచ్చు. ఎఫ్‌డీ కాలవ్యవధి కూడా ఐదేండ్లుంటుంది.
• క్యుములేటివ్‌ ఎఫ్‌డీలుత్రైమాసిక, అర్ధవార్షిక, వార్షిక ప్రాతిపదికన వడ్డీల జమ ఉంటుంది. కాలపరిమితి తీరితేనే వడ్డీ చెల్లింపు.
• నాన్‌-క్యుములేటివ్‌ ఎఫ్‌డీలు నెల, త్రైమాసిక, అర్ధవార్షిక లెక్కన వడ్డీ మొత్తాలను తీసుకోవచ్చు. రెగ్యులర్‌ ఇన్‌కమ్‌ కోరుకునేవారికి అనువైనవి. పెన్షనర్లకు లాభం.
• ఫ్లెక్సీ ఎఫ్‌డీ ప్లాన్లువీటిలో డిపాజిటర్లు తమ సేవింగ్స్‌ అకౌంట్‌తో ఎఫ్‌డీ అకౌంట్‌ను అనుసంధానం చేసుకోవచ్చు. అధిక వడ్డీరేట్లను పొందే వీలున్నది.
• ఎన్‌ఆర్‌వో ఎఫ్‌డీ అకౌంట్‌ఎన్నారైలు భారత్‌ నుంచి పొందే ఆదాయాన్ని ఈ నాన్‌-రెసిడెంట్‌ ఆర్డినరీ (ఎన్‌ఆర్‌వో) ఖాతాల్లో డిపాజిట్‌ చేసుకోవచ్చు. దీనిపై వచ్చే వడ్డీని పూర్తిగా తీసుకోవచ్చు. కానీ పన్నులు వర్తిస్తాయి. అలాగే చేసిన డిపాజిట్‌లో మాత్రం నిర్దేశిత పరిమితి మేరకే ఉపసంహరించుకోవడానికి వీలుంటుంది.
• ఎన్‌ఆర్‌ఈ ఎఫ్‌డీ అకౌంట్‌ప్రవాస భారతీయులు ఈ నాన్‌-రెసిడెంట్‌ ఎక్స్‌టర్నల్‌ (ఎన్‌ఆర్‌ఈ) ఖాతాను భారత్‌లో నిర్వహించవచ్చు. విదేశాల్లో సంపాదించిన సొమ్మును ఇందులో డిపాజిట్‌ చేసుకోవచ్చు. అలాగే ఈ డిపాజిట్లను, వాటిపై పొందే వడ్డీ మొత్తాలను పూర్తిగా వెనక్కి తీసుకోవచ్చు. పైగా వడ్డీలకు పన్నులుండవు.