రెడ్డీస్‌ లాభం 1,247 కోట్లు

రాష్ర్టానికి చెందిన ఔషధ దిగ్గజాల్లో ఒకటైన డాక్టర్‌ రెడ్డీస్‌ ఆశాజనక ఆర్థిక ఫలితాలు ప్రకటించింది.

• క్యూ3లో 77% పెరిగిన ప్రాఫిట్‌

హైదరాబాద్‌, జనవరి 25 (బిజినెస్‌ బ్యూరో): రాష్ర్టానికి చెందిన ఔషధ దిగ్గజాల్లో ఒకటైన డాక్టర్‌ రెడ్డీస్‌ ఆశాజనక ఆర్థిక ఫలితాలు ప్రకటించింది. డాలర్‌ విలువ పెరగడం, నూతన ఔషధాల దన్నుతో గడిచిన త్రైమాసికానికిగాను రూ.1,247.10 కోట్ల కన్సాలిడేటెడ్‌ నికర లాభాన్ని గడించింది. అంతక్రితం ఏడాది ఇదే త్రైమాసికంలో నమోదైన రూ.706.5 కోట్ల లాభంతో పోలిస్తే 77 శాతం అధికమని పేర్కొంది. ఈ సందర్భంగా కంపెనీ చీఫ్‌ ఫైనాన్షియల్‌ అధికారి పరాగ్‌ అగర్వాల్‌ మాట్లాడుతూ…గత త్రైమాసికానికిగాను ఏడాది ప్రాతిపదికన ఆదాయం 27 శాతం ఎగబాకి రూ.6,770 కోట్లకు చేరుకున్నట్లు తెలిపారు.

ఉత్తర అమెరికా నుంచి సంస్థకు రూ.3,060 కోట్ల ఆదాయం సమకూరింది. కొత్తగా ఐదు ఔషధాలను విడుదల చేయడం ఆదాయం పెరగడానికి దోహదపడింది. ఈ ఏడాది మొత్తంలో 25 ఔషధాలను విడుదలచేయాలనుకుంటున్నది.

• భారత్‌లో ఔషధాలను విక్రయించడంతో సంస్థకు రూ.1,130 కోట్ల ఆదాయం లభించింది. అమ్మకాలు పెరగడం, నూతన ఔషధాలు ఇందుకు కారణం.
• అభివృద్ధి చెందుతున్న దేశాల నుంచి రూ.1,310 కోట్ల ఆదాయం రాగా.. యూరఫ్‌ నుంచి రూ.430 కోట్లు లభించింది.
• అలాగే ఫార్మాస్యూటికల్స్‌ సేవల నుంచి రూ.780 కోట్లు సమకూరాయి.
• రీసర్చ్‌ అండ్‌ డెవలప్‌మెంట్‌ కోసం సంస్థ రూ.480 కోట్ల నిధులను ఖర్చు చేసింది.
• ప్రస్తుతం సంస్థ వద్ద రూ.2 వేల కోట్ల నగదు నిల్వలు ఉన్నాయి. భవిష్యత్తులో వ్యాపారాన్ని విస్తరించడానికి రూ.1,500 కోట్లు పెట్టుబడి పెట్టబోతున్నట్లు ప్రకటించింది.