85 వేల దిగువకు సెన్సెక్స్‌

దేశీయ స్టాక్‌ మార్కెట్లు వరుసగా మూడోరోజూ నష్టపోయాయి. విదేశీ నిధులు వెనక్కి పోతుండటం, దేశీయంగా నెలకొన్న పలు పరిస్థితుల కారణంగా మదుపరులు అమ్మకాలకు మొగ్గుచూపారు.

• భారీ నష్టాల్లో సూచీలు

ముంబై, డిసెంబర్‌ 26: దేశీయ స్టాక్‌ మార్కెట్లు వరుసగా మూడోరోజూ నష్టపోయాయి. విదేశీ నిధులు వెనక్కి పోతుండటం, దేశీయంగా నెలకొన్న పలు పరిస్థితుల కారణంగా మదుపరులు అమ్మకాలకు మొగ్గుచూపారు. ఫలితంగా వారాంతపు ట్రేడింగ్‌లోనూ సూచీలు భారీగా పతనం చెందాయి. 30 షేర్ల ఇండెక్స్‌ సూచీ సెన్సెక్స్‌ ఇంట్రాడేలో 85 వేల పాయింట్ల దిగువకు పడిపోయింది. చివరికి మార్కెట్‌ ముగిసే సమయానికి సెన్సెక్స్‌ 367.25 పాయింట్లు కోల్పోయి 85,041.45 వద్ద ముగిసింది. మరో సూచీ నిఫ్టీ 99.80 పాయింట్లు నష్టపోయి 26,042.30 వద్ద స్థిరపడింది. నిఫ్టీ వరుసగా రెండోరోజు పతనమైంది. దేశీయ ఈక్విటీ మార్కెట్లు తీవ్ర ఒత్తిడికి గురవుతున్నాయి.. అంతర్జాతీయ మార్కెట్ల నుంచి వచ్చిన ప్రతికూల సంకేతాలు, విదేశీ సంస్థాగత పెట్టుబడిదారులు భారీగా నిధులను తరలించుకుపోవడం పతనంపై ఆజ్యంపోసినట్టు అయిందని ఎన్‌రిచ్‌ మనీ సీఈవో పోన్మది ఆర్‌ తెలిపారు. ఐటీ, రియల్‌ ఎస్టేట్‌, ఎనర్జీ రంగ షేర్లతోపాటు పలు బ్యాంకింగ్‌ షేర్లలో అమ్మకాలు పోటెత్తాయి.

• బజాజ్‌ ఫైనాన్స్‌, ఏషియన్‌ పెయింట్స్‌, టీసీఎస్‌, ఎటర్నల్‌, టెక్‌ మహీంద్రా, సన్‌ఫార్మా షేర్లు ఒక్క శాతానికి పైగా నష్టపోయాయి.
• వీటితోపాటు పవర్‌గ్రిడ్‌, భారతీ ఎయిర్‌టెల్‌, బజాజ్‌ఫిన్‌సర్వ్‌, హెచ్‌సీఎల్‌ టెక్నాలజీ, మారుతి, ఐసీఐసీఐ బ్యాంక్‌, ఐటీసీ, అదానీ పోర్ట్స్‌, టాటాస్టీల్‌, హెచ్‌డీఎఫ్‌సీ బ్యాంక్‌, మహీంద్రా అండ్‌ మహీంద్రా, బీఈఎల్‌, ఇన్ఫోసిస్‌, ఎస్బీఐ, ఎల్‌అండ్‌టీ, టాటా మోటర్స్‌ ప్యాసింజర్‌ వెహికల్‌, ట్రెంట్‌, కొటక్‌ బ్యాంక్‌ షేర్లు పతనం చెందాయి.