IT Companies | రూటు మార్చిన ఐటీ.. వారికంటే జూనియర్లే బెటరంటున్న కంపెనీలు!

దేశీయ ఐటీ రంగ సంస్థలు రూటు మార్చాయి. ఇన్నాళ్లూ మధ్య, ఉన్నతస్థాయి ఉద్యోగుల నియామకాలపై దృష్టి సారించిన కంపెనీలు.. ఇప్పుడు జూనియర్లకు పెద్దపీట వేస్తున్నాయి. మిడ్‌, సీనియర్‌ ఎగ్జిక్యూటివ్‌ల స్థానంలో కొత్తవారిని తీసుకొస్తున్నాయి. అనుభవం ఉన్నవారిని ఎక్కువ జీతాలిచ్చి పెట్టుకోవడం కంటే..

• పొదుపు మంత్రం జపిస్తున్న కంపెనీలు
• వేతన భారం దించే దిశగా అడుగులు
• తగ్గుతున్న మధ్య, ఉన్నతస్థాయి ఉద్యోగులు
• జూనియర్లకు దక్కుతున్న పెద్దపీట

IT Companies | న్యూఢిల్లీ, అక్టోబర్‌ 23 : దేశీయ ఐటీ రంగ సంస్థలు రూటు మార్చాయి. ఇన్నాళ్లూ మధ్య, ఉన్నతస్థాయి ఉద్యోగుల నియామకాలపై దృష్టి సారించిన కంపెనీలు.. ఇప్పుడు జూనియర్లకు పెద్దపీట వేస్తున్నాయి. మిడ్‌, సీనియర్‌ ఎగ్జిక్యూటివ్‌ల స్థానంలో కొత్తవారిని తీసుకొస్తున్నాయి. అనుభవం ఉన్నవారిని ఎక్కువ జీతాలిచ్చి పెట్టుకోవడం కంటే.. ఫ్రెషర్లను తీసుకొని, వారిలో నైపుణ్యం పెంచేందుకు ఖర్చు పెట్టడమే లాభసాటి అని మెజారిటీ కంపెనీలు భావిస్తున్నాయి మరి. ఉద్యోగులపై పెట్టే వ్యయంలో నైపుణ్యాభివృద్ధికి చేసే ఖర్చు 5-7 శాతంగానే ఉంటున్నది. దీంతో తక్కువ జీతాల్లో జూనియర్ల నియామకాలే ఉత్తమం అన్న భావన యాజమాన్యాల్లో పెరిగిపోతున్నది.

ట్రెండ్‌కు భిన్నంగా..

గ్లోబల్‌ క్యాపబిలిటీ సెంటర్లు (జీసీసీ), దేశంలోని బహుళజాతి ఐటీ కంపెనీలు ఆకర్షణీయ వేతనాలతో ఉద్యోగ నియామకాలు చేపడుతున్నాయి. అయినప్పటికీ స్థానిక ఐటీ సంస్థలు మాత్రం పొదుపు మంత్రాన్నే జపిస్తుండటం ఇప్పుడు జాబ్‌ మార్కెట్‌లో మిక్కిలి ప్రాధాన్యాన్ని సంతరించుకుంటున్నది. కాగా, భారతీయ ఐటీ సేవల కంపెనీల ఆదాయాల్లో ఎక్కువ మొత్తం పోతున్నది ఉద్యోగుల జీతాలకే. ఈ క్రమంలోనే వేతన భారాన్ని తగ్గిస్తే సంస్థ లాభాలు పెరుగుతాయన్న ఆలోచనతో జూనియర్ల వైపు చూస్తున్నాయిప్పుడు చాలా కంపెనీలు. ప్రస్తుత ఆర్థిక సంవత్సరం రెండో త్రైమాసికానికి గాను ఇటీవల ప్రకటించిన ఆర్థిక ఫలితాలనుబట్టి ఉద్యోగుల జీతాల ఖర్చును ఇప్పటికే ప్రధాన సంస్థలు తగ్గించేసుకున్నాయి. టీసీఎస్‌, ఇన్ఫోసిస్‌, హెచ్‌సీఎల్‌ టెక్నాలజీస్‌ ఇందుకు నిదర్శనం.

మున్ముందు ఇబ్బందే..

కంపెనీల వైఖరి.. ప్రస్తుతం దేశీయ ఐటీ రంగంలో నెలకొన్న మందగమనాన్ని సూచిస్తున్నట్టు నిపుణులు విశ్లేషిస్తున్నారు. ఈ క్రమంలోనే మున్ముందూ ఐటీ రంగంలో పెద్దగా ఉద్యోగ నియామకాలు ఉండకపోవచ్చని, ఉన్నా.. అరకొర జీతాలకు ఫ్రెషర్లనే తీసుకుంటారని వారు చెప్తున్నారు. నిజానికి భారతీయ ఐటీ కంపెనీలకు అతిపెద్ద మార్కెట్‌ అమెరికానే. అగ్రరాజ్యంలో అంతా బాగుంటేనే కొత్త కొలువులకు వీలుంటుంది. అయితే అమెరికా ఎన్నికలు, పశ్చిమాసియాలో ఉద్రిక్తతలు, ఐరోపా దేశాల్లో క్రిస్మస్‌, న్యూఇయర్‌ హాలీడే వాతావరణంతోనూ మార్కెట్‌ స్తబ్ధత చోటుచేసుకున్నదన్న అభిప్రాయాలు వ్యక్తమవుతున్నాయి. ఈ పరిస్థితులు చక్కబడితే నియామకాల్లో జోరు పెరుగుతుందన్న అంచనాలూ ఉన్నాయి.

• ఈ ఏడాది ఏప్రిల్‌-జూన్‌తో పోల్చితే జూలై-సెప్టెంబర్‌లో హెచ్‌సీఎల్‌ రెవిన్యూలో 57.2 శాతానికి తగ్గిన వేజ్‌ బిల్లు. అంతకుముందు 58.5 శాతం.
• టీసీఎస్‌లోనూ 58.2 శాతం నుంచి 57 శాతానికి తగ్గుదల. ఇన్ఫోసిస్‌లో కూడా 52.6 శాతానికి దిగిన వైనం.
• విప్రోలో మాత్రం వేతన బిల్లు స్వల్పంగా పెరిగి రెవిన్యూలో 60.2 శాతం నుంచి 60.4 శాతానికి చేరింది.
• ఈ జూలై-సెప్టెంబర్‌లో టీసీఎస్‌లోకి 5,726 మంది, ఇన్ఫోసిస్‌లోకి 2,456 మంది . హెచ్‌సీఎల్‌లో 780 మంది, విప్రోలో 502 ఉద్యోగులు తగ్గుదల.
• ఐటీ సంస్థల్లో ఉద్యోగుల నిష్క్రమణకు సూచికగా ఉండే అట్రిషన్‌ రేటు ఈ జూలై-సెప్టెంబర్‌కుగాను హెచ్‌సీఎల్‌ టెక్నాలజీ, టీసీఎస్‌ల్లో 12.9 శాతంగా నమోదు. ఇన్ఫోసిస్‌లో 12.7 శాతం, విప్రోలో 14.5 శాతం.

10 ఏండ్ల అనుభవం ఉన్న సీనియర్‌ ఉద్యోగుల స్థానంలో 3-5 ఏండ్ల అనుభవం కలిగిన ఇద్దరు, ముగ్గురు జూనియర్‌ ఉద్యోగులను నియమించుకొనేందుకే ఇప్పుడు ఐటీ సంస్థలు ఆసక్తి కనబరుస్తున్నాయి. ఆ ఒక్కరికిచ్చే జీతం కంటే ఈ ఇద్దరు, ముగ్గురికిచ్చేదే తక్కువగా ఉంటున్నది. దీనివల్ల వేతన భారం కంపెనీలపై తగ్గుతున్నది. మొత్తంగా చూసినైట్టెతే నియామకాల ప్రక్రియ నెమ్మదించింది. దేశీయ ఐటీ రంగంపై అమెరికా ఎన్నికల ప్రభావం స్పష్టంగా కనిపిస్తున్నది.

-నీతీ శర్మ, టీమ్‌లీజ్‌ డిజిటల్‌ సీఈవో

రాబోయే త్రైమాసికాల్లోనూ దేశీయ ఐటీ రంగంలో నియామకాలు అంతంతమాత్రంగానే ఉండొచ్చు. జీతాల పెంపు, పదోన్నతులు, ప్రోత్సాహకాలు.. ఐటీ కంపెనీల ఆదాయానికి గండి కొడుతున్నాయి. ఇక అట్రిషన్‌ రేటు పెరగడం వెనుక జీసీసీల నుంచి ఐటీ ఉద్యోగులకు పెరుగుతున్న డిమాండ్‌, వెళ్లిపోతున్న ఉద్యోగులను ఆపేందుకు ఐటీ సంస్థలు పెద్దగా ప్రయత్నించకపోవడం కారణాలుగా నిలుస్తున్నాయి.

-గురుప్రసాద్‌ శ్రీనివాసన్‌ క్వెస్‌ కార్ప్‌ ఈడీ