దుమ్మురేపిన మారుతి సుజుకీ

కార్ల తయారీలో అగ్రగామి సంస్థ మారుతి సుజుకీ రికార్డు స్థాయి లాభాలను ఆర్జించింది. ప్రస్తుత ఆర్థిక సంవత్సరం రెండో త్రైమాసికానికిగాను రూ.2,112.5 కోట్ల కన్సాలిడేటెడ్‌ నికర లాభాన్ని గడించింది.

• రికార్డు స్థాయి లాభాలను ఆర్జించిన సంస్థ
• జూలై-సెప్టెంబర్‌లో రూ.2,112 కోట్లుగా నమోదు

న్యూఢిల్లీ, అక్టోబర్‌ 28: కార్ల తయారీలో అగ్రగామి సంస్థ మారుతి సుజుకీ రికార్డు స్థాయి లాభాలను ఆర్జించింది. ప్రస్తుత ఆర్థిక సంవత్సరం రెండో త్రైమాసికానికిగాను రూ.2,112.5 కోట్ల కన్సాలిడేటెడ్‌ నికర లాభాన్ని గడించింది. అంతక్రితం ఏడాది ఇదే త్రైమాసికంలో నమోదైన రూ.486.9 కోట్ల లాభంతో పోలిస్తే నాలుగు రెట్లు పెరిగినట్లు తెలిపింది. అమ్మకాలు టాప్‌గేర్‌లో దూసుకుపోవడం వల్లనే రికార్డు స్థాయి లాభాలను ఆర్జించినట్లు కంపెనీ వర్గాలు వెల్లడించాయి. ఏడాది క్రితం రెండో త్రైమాసికంలో రూ.20,550. 9 కోట్లుగా ఉన్న సంస్థ ఆదాయం గత త్రైమాసికానికిగాను రూ.29,942.5 కోట్లకు ఎగబాకినట్లు తెలిపింది.

• గత త్రైమాసికంలో సంస్థ 5,17,395 యూనిట్ల వాహనాలను విక్రయించింది. ఒక త్రైమాసికంలో ఇంతటి స్థాయిలో వాహనాలను విక్రయించడం ఇదే తొలిసారి.
• వీటిలో దేశీయంగా 4,54,200 యూనిట్లు కాగా, 63,195 యూనిట్లను ఇతర దేశాలకు ఎగుమతి చేసింది.
• చిప్‌ల కొరతతో మరో 35 వేల యూనిట్ల వాహనాలను ఉత్పత్తి చేయలేకపోయింది.
• 2021-22 ఆర్థిక సంవత్సరం రెండో త్రైమాసికంలో 3,79,541 యూనిట్లను విక్రయించింది. దీంట్లో దేశీయంగా 3,20,133 యూనిట్లు కాగా, 59,408 వాహనాలను ఇతర దేశాలకు ఎగుమతి చేసింది.
• ప్రస్తుతం కంపెనీ చేతిలో 4.12 లక్షల వాహనాలు బుకింగ్‌లు ఉన్నాయి. వీటిలో ఇటీవల విడుదలైన వాహనాలకు సంబంధించి 1.30 లక్షల యూనిట్లు ఉన్నాయి.