క్రెడిట్ స్కోర్ బాగుంటేనే అప్పు పుట్టేది
వ్యాపార రుణాలకిదే ఆధారం
కొత్తగా వస్తున్న అవకాశాలను అందిపుచ్చుకోవడంలో భాగంగా చిన్న, మధ్యతరహా పరిశ్రమలను ప్రారంభించడానికి చాలామంది ఔత్సాహిక పారిశ్రామికవేత్తలు ముందుకు వస్తున్నారు. అయితే ఇందుకు కావాల్సిన నిధుల కోసం ఎవరైనా చూసేది బ్యాంకుల వైపే. కానీ బ్యాంకులు రుణాలిచ్చే ముందు పరిశీలించేది మీ క్రెడిట్ స్కోర్.
గత మూడేండ్లలో మీరు తీసుకున్న అప్పులు, తీర్చేసిన పద్ధతులను బ్యాంకులు పరిశీలిస్తాయి. కాబట్టి క్రెడిట్ స్కోర్పై రుణ గ్రహీతలు అప్రమత్తంగా ఉండాల్సిందే.
రుణం కావాలంటే క్రెడిట్ స్కోర్ బాగుండాల్సిందే. స్కోర్ ఎంత ఎక్కువగా ఉంటే అన్ని లాభాలుంటాయి. వడ్డీరేట్లూ తగ్గుతాయి. అయితే మీరు చేసే తప్పులు.. ఈ స్కోర్ను దెబ్బతీస్తాయని మరువద్దు. ఒకవేళ ఎలాంటి రుణాన్ని తీసుకోకపోతే.. మీకు ఎలాంటి క్రెడిట్ స్కోర్ కూడా ఉండదు. దీనివల్ల కూడా నష్టమే. ఇక వ్యాపారుల విషయంలో భాగస్వామ్య సంస్థలు లేదా యాజమాన్య సంస్థల పర్సనల్ క్రెడిట్ స్కోర్ను సైతం బ్యాంకులు పరిగణనలోకి తీసుకుంటాయి. రుణాలను సకాలంలో చెల్లిస్తే మంచి క్రెడిట్ స్కోరే ఉంటుంది. లేకపోతే బ్యాంకు రుణాలు కష్టమే.
మంచి క్రెడిట్ స్కోర్ కోసం..
తక్కువ సమయంలో చాలా రుణాలు తీసుకుంటే క్రెడిట్ స్కోర్ దెబ్బతింటుంది. ఎక్కువ సంఖ్యలో రుణాలు ఉంటే, మీరు సక్రమంగా తీర్చేస్తున్నాసరే అప్పుల ఊబిలో ఉన్నట్టుగా బ్యాంకులు పరిగణిస్తాయి. అప్పులు అలవాటుగా మారినట్టుగా కూడా పరిగణిస్తాయి. అలాగే అన్సెక్యూర్డ్ రుణాలు ఎక్కువగా ఉంటే మరీ ఇబ్బంది.
గ్యారంటీలతో జాగ్రత్త
మరొకరు తీసుకున్న రుణాలకు మీరు గ్యారంటీగా ఉన్నాసరే ఇబ్బందే. ఒకవేళ రుణాన్ని ఎగవేస్తే లేదా డిఫాల్ట్ అయితే గ్యారంటీ ఇచ్చినందుకు మీ క్రెడిట్ స్కోర్ కూడా దెబ్బతింటుంది. మీరు నేరుగా తీసుకోకపోయినా ఆ రుణానికి మీరు కూడా పరోక్షంగా బాధ్యులే అన్న విషయాన్ని మరచిపోవద్దు. రుణగ్రహీత చెల్లించలేని పరిస్థితిలో ఆ రుణాన్ని మీ దగ్గరి నుంచే బ్యాంకులు వసూలు చేస్తాయి. అందుకే రుణాలకు గ్యారంటీ ఇచ్చే ముందు ఒకటికి రెండుసార్లు ఆలోచించండి. మీ క్రెడిట్ స్కోర్లో గ్యారంటీలు కూడా పరిగణనలో ఉంటాయి.
క్రెడిట్ రిపోర్ట్ అప్డేషన్
చాలామంది పట్టించుకోనిది క్రెడిట్ రిపోర్ట్ను అప్డేట్ చేయడం. కొన్ని సందర్భాలలో క్రెడిట్ బ్యూరోలు మీ ఆర్థిక లావాదేవీలను అప్డేట్ చేయకపోవచ్చు. మీరు రుణాలు తీర్చేసినాసరే వాటిని ఇంకా లిస్ట్లోనే ఉంచవచ్చు. అందుకే కనీసం మూడు నెలలకోసారైనా క్రెడిట్ రిపోర్టును పరిశీలించి తేడాలుంటే వెంటనే క్రెడిట్ బ్యూరోకు ఫిర్యాదు చేసి సవరించుకోవాల్సి ఉంటుంది.
రుణ దరఖాస్తులు
బిజినెస్ రుణాలను తీసుకోవడానికి అనేక బ్యాంకులను సంప్రదించడం శ్రేయస్కరం కాదు. మీరు గత కొన్నేండ్లుగా సంబంధాలను కలిగి ఉన్న బ్యాంకులోనే సాధ్యమైనంత వరకు రుణాలకు దరఖాస్తు చేయండి. లేదా కచ్చితంగా రుణం ఇస్తుందన్న నమ్మకం ఉన్న బ్యాంకుకే వెళ్లండి. గరిష్ఠంగా ఒకటి లేదా రెండు బ్యాంకులను మాత్రమే బిజినెస్ రుణాల కోసం సంప్రదించండి. రుణాల కోసం ఎక్కువగా ఎంక్వయిరీలు చేసినా క్రెడిట్ స్కోర్ దెబ్బతింటుంది.
రుణాల రీస్ట్రక్చర్ వద్దు
రుణాల రీస్ట్రక్చర్ అంటే.. తీసుకున్న రుణాలను చెల్లించలేని సమయంలో బ్యాంకులు రుణాలను పునర్వ్యస్థీకరిస్తాయి. కాలపరిమితిని పెంచడం, ఈఎంఐ మొత్తాన్ని తగ్గించడం లాంటివి ఈ కోవలోకి వస్తాయి. అలాగే వన్ టైం సెటిల్మెంట్ లాంటివి కూడా క్రెడిట్ స్కోర్ను దెబ్బతీస్తాయి. ఇలాంటి సంస్థలకు రుణాలు ఇవ్వడానికి బ్యాంకులు సంకోచిస్తాయి. రుణాలను రీస్ట్రక్చర్ చేయడం అంటేనే.. రుణాలను చెల్లించే స్థోమత లేనట్టు. రుణాలు తక్కువగా తీసుకోవడంతోపాటు వాటిని సక్రమంగా చెల్లిస్తేనే క్రెడిట్ స్కోర్ బెటర్గా ఉంటుంది. క్రెడిట్ అధికంగా ఉంటే బ్యాంకులే మీ ముందు క్యూ కడతాయి. ప్రీ అప్రూవ్డ్ రుణాలంటూ వెంటపడతాయి. క్రెడిట్ స్కోర్ ఎక్కువ ఉంటే వడ్డీ విషయంలోనూ బేరం ఆడవచ్చు. అందుకే కొత్త రుణాలు పాత రుణాల చెల్లింపులు ఎలా చేశామన్నదే మొదటి అర్హత.