కార్లపై డిస్కౌంట్లే.. డిస్కౌంట్లు.. రూ 2 లక్షల వరకు ఇస్తున్న ఆటోమొబైల్‌ సంస్థలు

వాహన కొనుగోలుదారులను ఆకట్టుకోవడానికి ఆటోమొబైల్‌ సంస్థలు డిస్కౌంట్లను తెరపైకి తీసుకొచ్చాయి. రూపాయి చారిత్రక కనిష్ఠ స్థాయికి పడిపోతుండటంతో ఒకవైపు ధరలు పెంచుతున్న సంస్థలు..మరోవైపు పలు మాడళ్లపై భారీగా రాయితీలు ఇస్తున్నట్టు ప్రకటించాయి.

న్యూఢిల్లీ, డిసెంబర్‌ 13: వాహన కొనుగోలుదారులను ఆకట్టుకోవడానికి ఆటోమొబైల్‌ సంస్థలు డిస్కౌంట్లను తెరపైకి తీసుకొచ్చాయి. రూపాయి చారిత్రక కనిష్ఠ స్థాయికి పడిపోతుండటంతో ఒకవైపు ధరలు పెంచుతున్న సంస్థలు..మరోవైపు పలు మాడళ్లపై భారీగా రాయితీలు ఇస్తున్నట్టు ప్రకటించాయి. ప్రతియేడాది డిసెంబర్‌ నెలలో రాయితీలు ప్రకటించే సంస్థలు, డీలర్లు ఈసారి కూడా భారీ స్థాయిలో అందుబాటులోకి తీసుకొచ్చాయి. తమ వద్ద ఉన్న స్టాక్‌ను క్లియర్‌ చేసుకోవడానికి డిస్కౌంట్ల రూపంలో అందిస్తున్నాయి. నూతన సంవత్సరంలో నూతన కార్లను మాత్రమే కొనుగోలుదారులకు అందించాలనే ఉద్దేశంతో కొందరు డీలర్లు పాత కారును మాకు ఇచ్చివేయండి..కొత్త కారుతో కొత్త సంవత్సరానికి స్వాగతం పలుకండని ప్రకటనలు కూడా విడుదల చేశాయి.

దేశీయ, అంతర్జాతీయ ఆటోమొబైల్‌ దిగ్గజాలు ఈసారి ఒక అడుగుముందుకేసి తమ వాహనాలపై రూ.2.4 లక్షల వరకు ఆర్థిక ప్రయోజనాలు కల్పించనున్నట్టు ప్రకటించాయి. వీటిలో కార్ల తయారీలో అగ్రగామి సంస్థలైన మారుతి సుజుకీ, టాటా మోటర్స్‌, హోండా, హ్యుందాయ్‌లు పలు మాడళ్లపై డిస్కౌంట్‌ ఇస్తున్నాయి. ఆర్థిక ప్రయోజనాలలో క్యాష్‌ డిస్కౌంట్‌, ఎక్సేంజ్‌ బోనస్‌, కార్పొరేట్‌ ఆఫర్లు, బీమా, విడిభాగాలతోపాటు ప్రభుత్వ ఉద్యోగులకు ప్రత్యేక రాయితీలు కల్పిస్తున్నాయి. అత్యధికంగా రూ.10 లక్షల నుంచి రూ.20 లక్షల లోపు ధర కలిగిన మాడళ్లపై అధికంగా డిస్కౌంట్లు ఇస్తున్నాయి కంపెనీలు.

టాటా మోటర్స్‌ ఈవీ కార్లపై డిస్కౌంట్లు

• కర్వీ ఈవీపై రూ.1.71 లక్షల వరకు
• నెక్సాన్‌ ఈవీపై రూ.1.41 లక్షలు
• టియాగో ఈవీపై రూ.1.30 లక్షల రాయితీ
• పంచ్‌ ఈవీపై రూ.1.20 లక్షల డిస్కౌంట్‌ టయోటా కార్లపై రాయితీ
• ప్రీమియం హ్యాచ్‌బ్యాక్‌ గ్లాంజాపై రూ.80 వేలకు రాయితీ, అదనంగా ఐదేండ్ల వ్యారెంటీ కూడా
• టైజర్‌పై రూ.42,500 రాయితీని, రుమియన్‌పై రూ.30 వేల డిస్కౌంట్‌
• హైరైడర్‌ ఈ మాడల్‌పై రూ.40 వేల డిస్కౌంట్‌ ఇస్తున్నది.

హ్యూందాయ్‌ ఆఫర్లలివే..

• ఎక్స్‌టర్‌పై రూ.1.74 లక్షల వరకు
• ఐ20పై రూ.1.68 లక్షలు
• గ్రాండ్‌ఐ10 నియోస్‌పై రూ.1.43 లక్షలు
• వెర్నాపై రూ.1.35 లక్షల వరకు
• అల్కజార్‌ మాడల్‌పై 1.15 లక్షల బెనిఫిట్స్‌
• ఔరాపై రూ.1.11 లక్షల రాయితీ

హోండా కార్స్‌ ఆఫర్లు ఇవే:

• ఎలివేట్‌ మాడల్‌పై రూ.1.76 లక్షల వరకు ఆర్థిక ప్రయోజనాలు
• సిటీ మాడల్‌పై రూ.1,57,700 వరకు రాయితీ, ఏడేండ్ల వ్యారెంటీ
• అమేజ్‌ సెకండ్‌ జనరేషన్‌పై రూ.98 వేల వరకు ప్రయోజనాలు

మారుతి కార్లపై రాయితీ

• వ్యాగన్‌ ఆర్‌పై రూ.58,100 వరకు ప్రయోజనాలు(నగదు+ఎక్సేంజ్‌+అదనపు బెనిఫిట్స్‌)
• స్విఫ్ట్‌ మాడల్‌పై రూ.55 వేల డిస్కౌంట్‌
• ఆల్టో కారుపై రూ.52,500 రాయితీ
• ఎస్‌-ప్రెస్సో, సెలేరియో, ఎకో మాడళ్లపై రూ.52,500 డిస్కౌంట్‌
• బ్రెజ్జాపై రూ.40 వేల వరకు రాయితీ
• డిజైర్‌పై రూ.12,500, ఎర్టిగాపై రూ.10 వేల వరకు రాయితీ
• గ్రాండ్‌ విటారాపై రూ.2.4 లక్షల వరకు బెనిఫిట్స్‌ కల్పిస్తున్నది.
• ప్రీమియం మల్టీపర్పస్‌ వాహనమైన ఇన్విక్టోపై రూ.2.15 లక్షల డిస్కౌంట్‌