అదానీకి అంబానీ డబుల్‌.. ముకేశ్‌ కుటుంబ సంపద రూ.28 లక్షల కోట్లు

రిలయన్స్‌ ఇండస్ట్రీస్‌ లిమిటెడ్‌ అధినేత ముకేశ్‌ అంబానీ కుటుంబ సంపద రూ.28 లక్షల కోట్లుగా ఉన్నట్టు ఓ తాజా నివేదిక తేల్చింది. గౌతమ్‌ అదానీ కుటుంబ సంపద కంటే ఇది రెట్టింపు కావడం గమనార్హం. అదానీ కుటుంబ ఆస్తులు రూ.14.01 లక్షల కోట్లుగా ఉన్నట్టు బార్క్‌లేస్‌తో కలిసి మంగళవారం హురున్‌ తెచ్చిన నివేదికలో వెల్లడైంది.

• గౌతమ్‌ అదానీది రూ.14 లక్షల కోట్లే
• బార్క్‌లేస్‌-హురున్‌ నివేదికలో వెల్లడి

ముంబై, ఆగస్టు 12: రిలయన్స్‌ ఇండస్ట్రీస్‌ లిమిటెడ్‌ అధినేత ముకేశ్‌ అంబానీ కుటుంబ సంపద రూ.28 లక్షల కోట్లుగా ఉన్నట్టు ఓ తాజా నివేదిక తేల్చింది. గౌతమ్‌ అదానీ కుటుంబ సంపద కంటే ఇది రెట్టింపు కావడం గమనార్హం. అదానీ కుటుంబ ఆస్తులు రూ.14.01 లక్షల కోట్లుగా ఉన్నట్టు బార్క్‌లేస్‌తో కలిసి మంగళవారం హురున్‌ తెచ్చిన నివేదికలో వెల్లడైంది. ఇక గత ఏడాది అంబానీ కుటుంబ సంపద 10 శాతం పెరిగింది. దీంతో భారతీయ అత్యంత సంపన్న వ్యాపార కుటుంబంగా తన స్థానాన్ని అంబానీ ఫ్యామిలీ నిలబెట్టుకున్నది.

అయితే తండ్రి ధీరూభాయ్‌ అంబానీ ద్వారా ముకేశ్‌ అంబానీ కుటుంబ సంపద వారసత్వంగా మొదలైన నేపథ్యంలో తొలి తరం ఆంత్రప్రెన్యూర్‌ సంపన్న కుటుంబాల్లో గౌతమ్‌ అదానీ ఫ్యామిలీయే అగ్రస్థానంలో ఉన్నది. ఇదిలావుంటే కుమార మంగళం బిర్లా కుటుంబ సంపద మునుపటితో పోల్చితే నిరుడు 20 శాతం పుంజుకొని రూ.6.47 లక్షల కోట్లుగా ఉన్నది. జిందాల్‌ కుటుంబ ఆస్తులూ 21 శాతం ఎగిసి రూ.5.70 లక్షల కోట్లుగా ఉన్నాయి. ఫలితంగా బహుళ తరాల సంపన్న కుటుంబాల జాబితాలో అటు బిర్లా, ఇటు జిందాల్‌ ఫ్యామిలీల ర్యాంకులు ఒక్కో స్థానం ఎగబాకాయి. అయితే బజాజ్‌ కుటుంబ సంపద 21 శాతం పడిపోయి రూ.5.64 లక్షల కోట్లకు పరిమితమైంది.

• భారతీయ సంపన్న కుటుంబాలలో అత్యంత విలువైన 300 కుటుంబాల ఆస్తుల మొత్తం విలువ రూ.140 లక్షల కోట్లు (1.6 ట్రిలియన్‌ డాలర్లపైనే).
• దేశ జీడీపీ విలువ కంటే టాప్‌-300 భారతీయ సంపన్న కుటుంబాల ఆస్తుల విలువ 40 శాతానికిపైగా అధికం.
• గత ఏడాది ఈ 300 కుటుంబాల సంపద రోజూ రూ.7,100 కోట్ల చొప్పున పెరిగింది.
• ముకేశ్‌ అంబానీ కుటుంబ సంపద దేశ జీడీపీలో 12 శాతానికి సమానం.
• దాదాపు రూ.8,800 కోట్లకుపైగా సంపద కలిగిన కుటుంబాలు దేశంలో 161 ఉన్నాయి. గతంతో చూస్తే నిరుడు 37 కుటుంబాలు పెరిగాయి.
• హురున్‌ జాబితాలోని 300 సంపన్న కుటుంబాలు నడిపిస్తున్న వ్యాపారాల్లో ఇప్పటికీ 25 శాతానికిపైగా వ్యాపార సంస్థలు దేశీయ స్టాక్‌ మార్కెట్లలో నమోదు కాలేదు.
• జాబితాలోని వ్యాపార కుటుంబాల్లో 11 శాతమే సేవా రంగానికి చెందినవి. మిగతావి భౌతిక ఉత్పత్తుల అమ్మకందారులే.
• సీఈవోలుగా బయటి వ్యక్తులున్న కుటుంబ వ్యాపారాల సంఖ్య 62గా ఉన్నది. గత ఏడాది 9 పెరిగాయి.
• దేశంలోని అత్యంత సంపన్న వ్యాపార కుటుంబాల్లో 91 ముంబైకి చెందినవారే. ఆ తర్వాత ఎన్‌సీఆర్‌ (62), కోల్‌కతా (25)లో ఉన్నారు.
• గత ఏడాది వివిధ కారణాలతో సంపన్న కుటుంబాలు ఇచ్చిన విరాళాలు రూ. 5,100 కోట్లు. అయితే ఈ కుటుంబాల మొత్తం ఆస్తుల విలువ కలిపితే రూ.134 లక్షల కోట్లుగా ఉండటం గమనార్హం.