Trade Deficit | వాణిజ్యలోటు కలవరం.. ఫిబ్రవరి నెలలో 18 బిలియన్‌ డాలర్ల లోటు

గత కొన్ని నెలలుగా నిరాశపనితీరు కనబరిచిన ఎగుమతులు మళ్లీ ఎగిశాయి. ఫిబ్రవరి నెలకుగాను ఎగుమతులు 11.9 శాతం పెరిగి 41.4 బిలియన్‌ డాలర్లకు చేరుకున్నాయి. ప్రస్తుత ఆర్థిక సంవత్సరంలో ఒకే నెలలో గరిష్ఠ స్థాయిలో నమోదవడం ఇదే తొలిసారి కావడం విశేషం.

Trade Deficit | న్యూఢిల్లీ, మార్చి 15: గత కొన్ని నెలలుగా నిరాశపనితీరు కనబరిచిన ఎగుమతులు మళ్లీ ఎగిశాయి. ఫిబ్రవరి నెలకుగాను ఎగుమతులు 11.9 శాతం పెరిగి 41.4 బిలియన్‌ డాలర్లకు చేరుకున్నాయి. ప్రస్తుత ఆర్థిక సంవత్సరంలో ఒకే నెలలో గరిష్ఠ స్థాయిలో నమోదవడం ఇదే తొలిసారి కావడం విశేషం. కేంద్ర వాణిజ్య మంత్రిత్వ శాఖ తాజాగా విడుదల చేసిన నివేదికలో ఈ విషయాన్ని వెల్లడించింది. ఇదే సమయంలో దిగుమతులు కూడా 12.16 శాతం అధికమై 60.1 బిలియన్‌ డాలర్లకు చేరుకున్నాయి. పసిడి దిగుమతులు అధికం కావడంతో వాణిజ్యలోటు 18.7 బిలియన్‌ డాలర్లకు ఎగబాకింది.

• గత నెలలో పసిడి దిగుమతులు ఏడాది ప్రాతిపదికన 133.82 శాతం ఎగబాకి 6.15 బిలియన్‌ డాలర్లకు చేరుకున్నాయి. గతేడాది ఇది 2.63 బిలియన్‌ డాలర్లుగా ఉన్నది.
• ఏప్రిల్‌ నుంచి ఫిబ్రవరి మధ్యకాలంలో పసిడి దిగుమతులు 38.76 శాతం ఎగబాకి 44 బిలియన్‌ డాలర్లకు చేరాయి.
• ఇంజినీరింగ్‌ గూడ్స్‌, ఎలక్ట్రానిక్‌ గూడ్స్‌, ఆర్గానిక్‌, ఇనార్గనిక్‌ కెమికల్స్‌, ఔషధాలు, ఫార్మాస్యూటికల్స్‌, పెట్రోలియం ఉత్పత్తులకు విదేశాల్లో డిమాండ్‌ నెలకొన్నది.
• ఫిబ్రవరిలో ఇంజినీరింగ్‌ గూడ్స్‌ ఎగుమతులు 15.9 శాతం అధికమై 8.58 బిలియన్‌ డాలర్ల నుంచి 9.93 బిలియన్‌ డాలర్లకు చేరాయి.
• ఏడాది క్రితం 1.94 బిలియన్‌ డాలర్ల విలువైన ఎలక్ట్రానిక్‌ గూడ్స్‌ ఎగుమతి కాగా, ఈ సారి 54.81 శాతం వృద్ధితో 3 బిలియన్‌ డాలర్లకు చేరుకున్నాయి.
• ఆర్గానిక్‌, ఇనార్గనిక్‌ కెమికల్స్‌ ఎగుమతులు 33 శాతం పెరిగి 2.95 బిలియన్‌ డాలర్లుగా నమోదయ్యాయి.
• ఔషధ, ఫార్మాస్యూటికల్స్‌ ఉత్పత్తుల ఎక్స్‌పోర్ట్స్‌ 22.24 శాతం చొప్పున అధికమయ్యాయి.
• పెట్రోలియం ఉత్పత్తుల ఎగుమతులు కూడా 5.08 శాతం అధికమై 8.24 బిలియన్‌ డాలర్లకు చేరాయి.
• మరోవైపు, ప్రస్తుత ఆర్థిక సంవత్సరం ఏప్రిల్‌ నుంచి ఫిబ్రవరి మధ్యకాలంలో ఎగుమతులు స్వల్పంగా పెరిగి 709.81 బిలియన్‌ డాలర్లకు చేరుకున్నాయి. ఇదే సమయంలో దిగుమతులు 4.64 శాతం అధికమై 782.05 బిలియన్‌ డాలర్లకు చేరాయి.
• వాణిజ్యలోటు 37.8 శాతం అధికమై 116.13 బిలియన్‌ డాలర్లుగా నమోదైంది. క్రితం ఏడాది ఇది 72.24 బిలియన్‌ డాలర్లుగా ఉన్నది.
• ఉత్పత్తుల వాణిజ్యలోటు 8.43 శాతం అధికమైన 245.94 బిలియన్‌ డాలర్లుగా ఉన్నది.