బీమా కొనుగోలులో నిజాలే రక్ష
అబద్దాలతో క్లెయిమ్ తిరస్కరణకు అవకాశం
విపత్తు సందర్భాల్లో మీకు, మీ కుటుంబ సభ్యులకు బీమాతోనే ఆర్థిక భరోసా. ఈ కరోనా కాలంలో ఎప్పుడు ఎవరికి ఎలాంటి ఆపద వస్తుందో తెలియని దుస్థితి మరి. అయితే బీమా పాలసీ తీసుకునేటప్పుడు దరఖాస్తులో పేర్కొన్న అంశాలను ఎత్తిచూపుతూ ఇన్సూరెన్స్ కంపెనీ మీ క్లెయిమ్ను తిరస్కరిస్తే గురయ్యే మానసిక ఆందోళన భరించలేనిది. అందుకే ఇన్సూరెన్స్ పాలసీ తీసుకునే ముందు దాని గురించి తెలుసుకోవాలి. లేదంటే క్లెయిమ్ సమయంలో చిక్కులు తప్పవు.
బీమా పాలసీని ఎందుకు తీసుకుంటున్నామో మొదట స్పష్టత అవసరం. ఇంటి పెద్ద చనిపోతే ఆ కుటుంబ సభ్యులకు ఆర్థికంగా భద్రత కల్పించడం కోసం జీవిత బీమా పాలసీని కొనుగోలు చేయాలి. అనారోగ్య సమస్యలతో దవాఖానపాలైతే, ఆ ఖర్చుల భారం నుంచి తప్పించుకోవడానికి ఆరోగ్య బీమా పాలసీని తీసుకోవాలి. కొనుగోలు చేస్తున్న పాలసీలో ఎలాంటి రిస్క్లు కవర్ అవుతున్నాయో తెలుసుకోవడం తప్పనిసరి. లేకుంటే ఇబ్బందే. బీమా రంగ ప్రైవేటీకరణ జరిగిన తర్వాత అనేక ఆప్షన్లతో పాలసీలు వస్తున్నాయి. ప్రతీ పాలసీని ఏదో ఒక వినూత్నమైన అంశంతో, పరిమితులతో రూపొందిస్తున్నారు. ఆ పరిమితులు, ప్రయోజనాలను తెలుసుకోవడం మన బాధ్యత.
డిక్లరేషన్ తప్పనిసరి
ఇన్సూరెన్స్ పాలసీ తీసుకునే ముందు దరఖాస్తులో ప్రతీ అంశాన్ని పూర్తి వివరాలతో నింపాలి. ముఖ్యంగా అప్పటికే ఉన్న జబ్బులు, అలవాట్లు.. గతంలో ఏవైనా ఇన్సూరెన్స్ క్లెయిమ్లు చేశారా? తదితర వివరాలను పాలసీలో తప్పనిసరిగా పేర్కొనాల్సిందే. ఒకవేళ వీటి గురించి సరైన సమాచారాన్ని మీరు దరఖాస్తులో పేర్కొనకపోతే మీ క్లెయిమ్ సమయంలో ఇబ్బందులను ఎదుర్కోవాల్సి రావచ్చు. కాబట్టి పాలసీ దరఖాస్తును జాగ్రత్తగా చదవాలి. ఇక చాలా సందర్భాల్లో బీమా ఏజెంట్ను నమ్మి దరఖాస్తు మీద సంతకం చేస్తుంటారు. ఇది ప్రమాదకరం. దేనికైనా సంబంధించి సందేహం కలిగితే దాన్ని నివృత్తి చేసుకోవడానికి ప్రయత్నించండి. సరైన పాలసీ అనుకుంటేనే తీసుకోండి.
చూడాల్సిన అంశాలు
ఏ పాలసీలోనైనా ముఖ్యమైనది కవరేజీనే. ఆరోగ్య బీమా విషయంలో కవరేజీకే అత్యంత ప్రాధాన్యత. ఏయే వ్యాధులకు ఎంతవరకు బీమా వర్తిస్తుంది.. ఎటువంటి ఖర్చుల భారం తప్పుతుంది.. అన్నవి తప్పకుండా పరిశీలించాలి. అలాగే ప్రీ, పోస్ట్ హాస్పిటలైజేషన్ వ్యయాలూ కవర్ అవుతాయా?.. లేదా?.. చూడాలి. ఈ ప్రీ, పోస్ట్ హాస్పిటలైజేషన్ కవరేజీ ఒక్కో పాలసీకి ఒక్కో రకంగా ఉంటుంది. ఇక చాలావరకు జీవిత బీమా పాలసీల్లో క్లెయిమ్ను నిరాకరించడానికి అవసరమైన నిబంధనలే ఉంటాయి. ఉదాహరణకు స్కూబా డైవింగ్, పారాైగ్లెడింగ్ వంటి స్పోర్ట్స్లో మరణం పాలైతే, రిస్క్ అధికంగా ఉన్న దేశాలలో పర్యటిస్తున్నప్పుడు మరణిస్తే క్లెయిమ్ను నిరాకరించే వీలున్నది. అందుకని ఏ సంస్థ ఎలాంటి పరిస్థితుల్లో క్లెయిమ్ను నిరాకరిస్తుందో తెలుసుకోవడం ఉత్తమం. అలాగే కొన్ని ఇన్సూరెన్స్ కంపెనీలు మీకు ఇప్పటికే ఉన్న పాలసీల వివరాలను, ముఖ్యంగా లైఫ్ కవరేజి పాలసీల సమాచారాన్ని కోరవచ్చు. వీటికి మీరు సరైన సమాచారాన్నే ఇవ్వాలి. క్లుప్తంగా చెప్పాలంటే ఏ ఇన్సూరెన్స్ పాలసీని కొనాలన్నా.. ఆ పాలసీ బ్రోచర్, దరఖాస్తును తప్పనిసరిగా పూర్తిగా చదివి అర్థం చేసుకోండి. దరఖాస్తులో ఖాళీలను వదలవద్దు. దరఖాస్తును పూర్తి చేసిన తర్వాత దాని జీరాక్స్ కాపీని తీసి దగ్గర పెట్టుకోండి. ఒకవేళ మీరు కోరుకున్నట్టుగా పాలసీ లేకపోతే ఫ్రీ లుక్ పీరియడ్ ఆప్షన్ ద్వారా 15 రోజుల్లో ఆ పాలసీ నుంచి బయటపడవచ్చు.