శనివారం 28 నవంబర్ 2020
Badradri-kothagudem - Aug 05, 2020 , 23:54:23

భువన్‌లో భవన సమాచారం

భువన్‌లో భవన సమాచారం

తెలంగాణ రాష్ట్ర ప్రభుత్వం ఏర్పడ్డాక మున్సిపాలిటీ విభాగాల్లో విప్లవాత్మక మార్పులకు శ్రీకారం చుట్టింది. మున్సిపల్‌ వ్యవస్థను గాడిలో పెట్టేందుకు, ప్రజలకు మెరుగైన వసతుల కల్పనకు చేపట్టాల్సిన చర్యలపై ప్రభుత్వం ప్రత్యేక దృష్టి సారించింది. ఇందులో భాగంగానే  రాష్ట్రంలోని ప్రతి మున్సిపాలిటీలో ఎన్ని అసెస్‌మెంట్లు (ఇండ్లు) ఉన్నాయి..?, ఆ ఇంటిలో మున్సిపాలిటీతో పాటు ప్రభుత్వం నుంచి పొందుతున్న ఇతర పథకాలను తెలుసుకునేందుకు చర్యలు చేపట్టనుంది. ఈ వారంలోనే భువన్‌ యాప్‌ ద్వారా ప్రతీ ఇంటి వివరాలను ఆన్‌లైన్‌లో పొందుపరిచే ప్రక్రియను మున్సిపల్‌ అధికారులు ప్రారంభించనున్నారు. 

మున్సిపాలిటీలోని ప్రతి ఇంటి వివరాలను ఆన్‌లైన్‌లో నమోదు చేసేందుకు ‘భువన్‌' యాప్‌ను మున్సిపల్‌శాఖ అందుబాటులోకి తీసుకొచ్చింది. ఇంటిని 360 డిగ్రీల కోణంలో ఈ యాప్‌ సహాయంతో మోబైల్‌లో నిక్షిప్తం చేయనున్నారు. గతంలో సర్వే చేపట్టినప్పటికీ కేవలం ఇంటిని మాత్రమే ఆన్‌లైన్‌లో పొందుపరిచారు. కానీ ప్రస్తుతం మరిన్ని వివరాలను ఇందులో చేర్చనున్నారు. తద్వారా ఏ భవనానికి ఏ శ్లాబ్‌లో ఇంటి పన్ను విధించాలి, భవనాలపైన అడ్వైర్జెజ్‌మెంట్‌ బోర్డులు ఏర్పాటు చేసి ప్రచారం చేస్తున్నారా?,  సెల్‌ టవర్లు ఏర్పాటు చేసుకున్నారా?, అసలు సెల్‌ టవర్ల ఏర్పాటుకు ఆ భవనం అనుకూలమా? కాదా?,  వినియోగిస్తున్న విద్యుత్‌  గృహానికా? లేక వాణిజ్య అవసరాల కేటగిరీలో చేర్చడమా?   తదితర అంశాలను క్షుణ్ణంగా తెలుసుకోనున్నారు. యాప్‌ వినియోగంలో ఇంటి ఫొటో, విస్తీర్ణం, యజమాని, ఏ రకమైన ఇళ్లు(బిల్డింగ్‌,  రేకులు, పూరి గుడిసె),  సంబంధించిన పూర్తి సమాచారం ఇందులో పొందుపరుస్తున్నారు. ఇళ్లు మున్సిపల్‌ రికార్డుల్లో ఉందా, ఒక వేళ నమోదు కాకపోతే, అందుకు గల కారణాలు, ఎవరి పేరుపై ఉంది, అనే అంశాలు కూడా తెలుసుకునే అవకాశం ఉంది. 

మెప్మా రిసోర్స్‌ పర్సన్లకు శిక్షణ

భువన్‌ యాప్‌ వినియోగానికి, ఇంటి వివరాలను నమోదు చేసేందుకు పట్టణ పేదరిక నిర్మూలన సంస్థ(మెప్మా) రిసోర్స్‌ పర్సన్లకు బాధ్యతలు అప్పగించనున్నట్లు మున్సిపల్‌ అధికారులు తెలిపారు. జిల్లాలోని నాలుగు మున్సిపాలిటీల్లో రిసోర్స్‌ పర్సన్లకు రెండురోజుల్లో శిక్షణ ఇచ్చి అనంతరం క్షేత్రస్థాయిలో వివరాలు నమోదు చేసేందుకు మున్సిపల్‌శాఖ అధికారులు సమాయత్తం చేస్తున్నారు. జిల్లాలోని కొత్తగూడెంలో 17,111, పాల్వంచలో 19,761, ఇల్లెందు మున్సిపాలిటీలో 6,910, మణుగూరులో 7,099 అసెస్‌మెంట్లు (ఇండ్లు) ఉన్నట్లు ప్రస్తుతం మున్సిపల్‌ లెక్కల్లో ఉన్నాయి. ఇటీవల కొత్త ఇంటి నెంబర్లు ఇవ్వడంతో అసెస్‌మెంట్ల సంఖ్య కూడా పెరిగింది. దీంతో మున్సిపాలిటీలకు ఆదాయం సమకూరనుందని చెప్పవచ్చు. 

ప్రతి ఇంటి వివరాలు తెలుస్తాయి 

భువన్‌ యాప్‌ నమోదు ప్రక్రియ వల్ల ప్రతి ఇం టి వివరాలు క్షుణ్ణంగా తెలుసుకునే అవకాశం కలుగుతుంది. ఇంటి సమగ్ర సమాచారమం తా పొందుపరిచి ఉన్నతాధికారులకు నివేదిక అందజేస్తాం. రెండు రోజుల్లో మెప్మా రిసోర్స్‌ పర్సన్లకు యాప్‌ వినియోగంపై శిక్షణ ఇవ్వను న్నాం. అనంతరం ఇంటింటి సర్వే చేపడతాం. ప్రజలకు సేవలతో పాటు మున్సిపాలిటీకి అభివృద్ధ్దికి అవసరమైన ఆర్థిక వనరులను పన్నుల రూపంలో వసూలు చేసి తిరిగి వాటిని ప్రజల కోసం ఖర్చు చేస్తాం. -అరిగెల సంపత్‌కుమార్‌, 
కొత్తగూడెం మున్సిపల్‌ కమిషనర్‌

పురపాలికలకు పెరగనున్న ఆదాయం

భువన్‌ యాప్‌లో ప్రతి ఇంటి వివరాలను నిక్షిప్తం చేయడం ద్వారా మున్సిపల్‌ రికార్డులో నమోదవుతాయి. ఒక భవనంపై మరో ఇంటిని నిర్మించినప్పటికీ ఒక భవనానికి మాత్రమే పన్ను చెల్లించిన వారు మున్సిపాలిటీలో ఉన్నారు. ఫలితంగా మున్సిపాలిటీకి రావాల్సిన ఆదాయానికి భారీ గండి పడుతున్నది. గతంలో రికార్డులో గుడిసె, పెంకుటిల్లు, తర్వాత కాలంలో ఆ స్థానంలో భవనం నిర్మించినా పన్నుల చెల్లింపుల్లో తేడాలు ఉంటున్నాయి. ఈ యాప్‌ వినియోగంతో ఇటువంటి వాటికి చెక్‌ పడనుంది. ఫలితంగా మున్సిపాలిటీ ఖజానాకు ఆదాయం వచ్చి చేరనుంది.