ఏపీ ఆర్థిక ప‌రిస్థితిపై విచార‌ణ జ‌రిపించాలంటూ మోదీకి లేఖ రాసిన ర‌ఘురామ

ఏపీలోని కాగ్ లెక్క‌ల‌ను ప‌రిగ‌ణ‌న‌లోకి తీసుకోవాల‌ని న‌ర్సాపురం ఎంపీ ర‌ఘురామ‌కృష్ణ రాజు కేంద్ర ప్ర‌భుత్వాన్ని కోరారు. ఈ మేర‌కు ప్ర‌ధాన మంత్రి మోదీకి లేఖ రాశారు. ఏపీ ఆర్థిక ప‌రిస్థితిపై కాగ్ ఇచ్చిన నివేదిక‌ను ప‌రిగ‌ణ‌న‌లోకి తీసుకొని, సీబీఐ ఆర్థిక నేర విభాగంతో లేదా సీరియ‌స్ ఫ్రాడ్ ఇన్వెస్టిగేష‌న్‌తో విచార‌ణ జ‌రిపించాల‌ని ర‌ఘురామ ఆ లేఖ‌లో ప్ర‌ధానిని కోరారు. వివిధ అవ‌స‌రాల నిమిత్తం ఏపీ ప్ర‌భుత్వం అప్పులు తీసుకుంద‌ని, ఈ స‌మ‌యంలో రాజ్యాంగ ఉల్లంఘ‌న‌ల‌కు పాల్ప‌డింద‌ని ఆయ‌న ఆరోపించారు. బ్యాంకులు, వివిధ కార్పొరేష‌న్ల నుంచి జ‌గ‌న్ స‌ర్కార్ ఎలా సేక‌రించిందో అన్న విచార‌ణ కూడా జ‌ర‌పాల‌ని న‌ర్సాపురం ఎంపీ ర‌ఘురామ ఆ లేఖ‌లో ప్ర‌ధాని మోదీని కోరారు.

సంచ‌ల‌నం రేపుతున్న కాగ్ నివేదిక‌

ఏపీ ఆర్థిక ప‌రిస్థితిపై కంప్ట్రోల‌ర్ అండ్ ఆడిట‌ర్ జ‌న‌ర‌ల్ (కాగ్‌) ఓ నివేదిక ప్ర‌క‌టించింది. కోడ్‌కు విరుద్ధంగా ఏపీ ప్ర‌భుత్వం చెల్లింపులు చేసింద‌ని కాగ్ త‌న నివేదిక‌లో పేర్కొంది. అంతేకాకుండా 48 వేల కోట్ల‌కు సంబంధించిన రికార్డులు కూడా స‌రిగ్గా లేవ‌ని ప్ర‌భుత్వాన్ని త‌ప్పుబ‌ట్టింది. అంతేకాకుండా 2020-2021 ఆర్థిక సంవ‌త్స‌రానికి గాను ల‌క్ష కోట్ల రూపాయ‌ల‌కు పైగా అసెంబ్లీకి చెప్ప‌కుండానే ఖ‌ర్చు చేశార‌ని కూడా పేర్కొంది. చ‌ట్ట స‌భ‌ల‌కు చెప్ప‌కుండా ఇంత పెద్ద మొత్తంలో ఖ‌ర్చు చేయ‌డ‌మంటే రాజ్యాంగ ఉల్లంఘ‌నే అవుతుంద‌ని కాగ్ మండిప‌డింది.