ఖాళీ భూములు లాక్కోవడానికే ఏపీ ప్రభుత్వ సర్వే : సీపీఎం విమర్శ

సీపీఎం నాయకుల బృందం రామకృష్ణాపురం బుడమేరు ప్రాంతంలోని సాగునీటి భూములను సందర్శించింది. నగరంలో అధికార పార్టీ నేతలు కబ్జాలకు పాల్పడుతున్నారని మీడియాతో మాట్లాడుతూ ఆరోపించారు. ఖాళీగా ఉన్న భూములను గుర్తించి లాక్కునేందుకు ఏపీ సర్కార్‌ భూ సర్వే...

ఎన్టీఆర్ జిల్లా : ఖాళీగా ఉన్న భూములను గుర్తించి లాక్కునేందుకు ఏపీ సర్కార్‌ భూ సర్వే చేపడుతున్నదని భారత కమ్యూనిస్టు పార్టీ (మార్క్సిస్టు) తీవ్రంగా విమర్శించింది. సీపీఎం రాష్ట్ర కార్యవర్గ సభ్యుడు సీహెచ్‌ బాబూరావు నేతృత్వంలో దోనేపూడి కాశీనాథ్‌, బీ రమణారావు, సీహెచ్‌ శ్రీనివాస్‌, నిజాముద్దీన్‌,  వెంకటేశ్వరరావు, సుందరరామరాజు, కోటేశ్వరరావు తదితరులతో కూడిన సీపీఎం నాయకుల బృందం రామకృష్ణాపురం బుడమేరు ప్రాంతంలోని సాగునీటి భూములను సందర్శించింది. నగరంలో అధికార పార్టీ నేతలు కబ్జాలకు పాల్పడుతున్నారని మీడియాతో మాట్లాడుతూ ఆరోపించారు. భూములను కాపాడాల్సిన అధికార పార్టీ నేతలు భూములు లాక్కోవడం ‘కంచెనే చేను మేసిన’ చందంగా ఉన్నదని విమర్శించారు. కోట్లాది రూపాయల విలువైన ఇరిగేషన్‌ భూములను ప్రజాప్రతినిధులు లాక్కుంటూ ఉంటే ప్రభుత్వం మౌనం వహించడం గర్హనీయమన్నారు.

ఈ విషయంపై తీవ్ర ఆగ్రహం వ్యక్తం చేయడంతో అధికారులు కబ్జాకు గురైన స్థలంలో ‘ఈ భూమి నీటిపారుదల శాఖకు చెందినది’ అని బోర్డును ఏర్పాటు చేసినా భూకబ్జాకు పాల్పడ్డారని, అలాంటి వారిపై ఎలాంటి చర్యలు తీసుకోలేదని వారు విచారం వ్యక్తం చేశారు. అధికారులు కబ్జా చేసిన వ్యక్తుల పేర్లు ప్రస్తావించకుండానే ఎఫ్‌ఐఆర్‌ నమోదు చేశారని పేర్కొన్నారు. విజయవాడ సెంట్రల్‌ ఎమ్మెల్యే వెంటనే స్పందించి భూములు లాక్కోవడానికి ప్రయత్నించిన వ్యక్తులపై క్రిమినల్ కేసులు పెట్టాలని, ఆ భూములను ప్రజా ప్రయోజనాల నిమిత్తం వినియోగించాలని సీపీఎం నాయకులు డిమాండ్ చేశారు.

రాష్ట్ర ప్రభుత్వం పట్టణాలు, నగరాలు, గ్రామాల్లో భూ సర్వే చేపట్టిందని, అయితే అధికార పార్టీ నేతలు తమ జేబులు నింపుకునేందుకు ఖాళీ స్థలాలను గుర్తిస్తున్నారని సీపీఎం రాష్ట్ర కార్యవర్గ సభ్యుడు సీహెచ్‌ బాబూరావు తెలిపారు. పట్టపగలు జేసీబీలతో భూకబ్జాదారులు భూమిని చదును చేస్తున్నా అధికారులు ఎలాంటి చర్యలు తీసుకోవడం లేదన్నారు. ప్రజల నుంచి తమకు ఎలాంటి సమాచారం అందడం లేదని అధికారులు పేర్కొనడం చాలా అసంబద్ధం అని విమర్శించారు.