రంగుల కేళీ.. హోలీ..

‘హోలీ..హోలీల రంగ హోలీ ..చెమ్మకేళిల హోలీ’ అంటూ ఏడాదికోసారి నిర్వహించుకునే రంగుల వేడుకకు ఉమ్మడి జిల్లా ప్రజానీకం సిద్ధమైంది. చిన్నా,పెద్ద ఆనందడోలికల్లో మునిగి తేలనుండగా, మోములన్నీ వర్ణ శోభితం కానున్నాయి.

• నేడు జిల్లాలో వసంతోత్సవం..
• కులమతాలకతీతంగా వేడుక..
• సహజ రంగులే వాడాలని నిపుణుల పిలుపు

చెన్నూర్‌ టౌన్‌, మార్చి 24 : ‘హోలీ..హోలీల రంగ హోలీ ..చెమ్మకేళిల హోలీ’ అంటూ ఏడాదికోసారి నిర్వహించుకునే రంగుల వేడుకకు ఉమ్మడి జిల్లా ప్రజానీకం సిద్ధమైంది. చిన్నా,పెద్ద ఆనందడోలికల్లో మునిగి తేలనుండగా, మోములన్నీ వర్ణ శోభితం కానున్నాయి. స్నేహితులు, ఇంటిల్లిపాది, బంధువులతో ఊరువాడా సందడి నెలకొననుంది. ఫాల్గుణ శుద్ధ పౌర్ణమి నాడు నిర్వహించే ఈ వసంతకేళిలో సహజ రంగులు వాడాలని వైద్య సిబ్బంది సూచిస్తున్నారు.

ఉత్సాహంగా వసంతోత్సవం

వసంత కాలంలో వచ్చే పండుగ కాబట్టి దీన్ని ‘వసంతోత్సవం’ అని కూడా పిలుస్తారు. హో లీ అంటే అగ్ని కానీ, అగ్నితో పునీతమైనది అ ని చెబుతుంటారు. ఇది చెడుపై మంచి సాధించిన విజయాన్ని కూడా సూచిస్తుంది. ఇది హి రణ్యకశ్యపుడిపై నారసింహుడి విజయంగా కూడా పేర్కొంటారు. జిల్లాలో ఆదివారం కా ముని పున్నం నిర్వహించారు. హోలికా దహనంతో వేడుకలు ప్రారంభమయ్యాయి. సోమవారం హోలీ పండుగకు సిద్ధమయ్యారు. ఆకర్షణీయమైన వర్ణద్రవ్యాలు, సింథటిక్‌ రంగులతో నిర్వహించుకుంటే చర్మ సంబంధ సమస్యలు వస్తాయని, సహజ రంగులను వినియోగించాలని వైద్యులు సూచిస్తున్నారు.

నీటి వనరుల వద్ద జాగ్రత్త…

హోలీ వేడుకలు ముగిశాక స్నానం చేసేందుకు పిల్లలు చెరువులు, కుంటలు, బావుల వద్దకు వెళ్లేందుకు ఉత్సాహం చూపుతుంటారు. తల్లిదండ్రులు ఈ విషయంలో జాగ్రత్తలు తీసుకోవాలి. వీలైనంత వరకు చెరువులు, బావుల వద్దకు వెళ్లకుండా చూడాలి. ఇంట్లోనే స్నానం చేయడం మంచిది.