కనిపించిన నెలవంక

ముస్లింలు అత్యంత పవిత్రంగా భావించే రంజాన్‌ మాసం ప్రారంభమైంది. సోమవారం నెలవంక కనిపించగా, మంగళవారం నుంచి ఉపవాసాలు ప్రారంభంకానున్నాయి.

• నేటి నుంచి రంజాన్‌ మాసం ప్రారంభం
• ఉపవాసాలు షురూ
• ముస్తాబైన మసీదులు

దండేపల్లి/చెన్నూర్‌ టౌన్‌/వాంకిడి, మార్చి 11: ముస్లింలు అత్యంత పవిత్రంగా భావించే రంజాన్‌ మాసం ప్రారంభమైంది. సోమవారం నెలవంక కనిపించగా, మంగళవారం నుంచి ఉపవాసాలు ప్రారంభంకానున్నాయి. ఏప్రిల్‌11న శవ్వాల్‌ నెలవంక కనిపిస్తే రంజాన్‌ పండుగ జరుపుకుంటారు. ఈ మాసంలోనే దివ్య ఖురాన్‌ అవతరించిందని ముస్లింల విశ్వాసం. ఖురాన్‌లోని 30 అధ్యయాలు ఈ మాసంలోనే పూర్తి చేస్తారు. దీనినే తరావి నమాజ్‌ అంటారు.

ఉపవాసం ఒక సామాజిక అంశం

ముస్లింలు 30 రోజులు ఉపవాస దీక్షలు పాటిస్తారు. దైని క పనులు చేస్తూ కఠోర దీక్ష(ఉపవాసం-రోజా)చేస్తూ అల్లాహ్‌ను స్మరిస్తారు. పేదలు పడే ఆకలి బాధ ఎలా ఉం టుందో ఉపవాసాల మూలంగా అనుభవంలో కి వస్తుం ది. రోజా అంటే కేవలం నీరు, ఆహారం తీసుకోవడమే కాదు. అన్ని రకాల చెడు కార్యాలు, అన్యాయం, అధర్మం, కామ కోరికలు మనసులోకి రానివ్వకుండా పాప క్రియల నుంచి దూరంగా ఉంటూ అల్లాహ్‌ స్మరణ చేస్తూ తనకు తాను అంతర్గతంగా ఆత్మ ప్రక్షాళన చేసుకోవడం.

రంజాన్‌ దీక్ష ప్రాముఖ్యత-విశేషాలు

రంజాన్‌ ఉపవాస దీక్షలో సహర్‌-ఇఫ్తార్‌ ముఖ్యమైనవి. రంజాన్‌ నెలలో 30 రోజులు ఉపవాస దీక్షలు పాటించాలి. సూర్యోదయం కంటే ముందే నిర్దేశిత సమయంలో అన్నపానీయాలు తీసుకోవాలి. దీనినే సహర్‌ అంటారు. ప్రతి రోజూ కొన్ని నిమిషాల తేడాతో సూర్యాస్తమయంలో ఉపవాసదీక్ష విరమించడమే ఇఫ్తార్‌. దీక్షా సమయంలో ఎలాంటి ఆహార పానీయాలు తీసుకోరాదు. మందులు, ఇంజక్షన్లు, చివరికి నోటిలో ఊరే లాలాజలం కూడా మింగరాదు. ఇఫ్తార్‌ను ఖర్జూరా, ఇతరత్రా ఫలాలతో విరమిస్తారు.

ఇస్లాం అంటే..

ఇస్లాం అంటే సకల చరాచర సృష్టికర్త, సర్వేశ్వరుడైన అల్లాహ్‌కు లోబడి ఉండడం అని అర్థం. ఇస్లాం పరిపూర్ణంగా అమలు చేసేందుకు ముస్లింలు 5 ముఖ్య అంశాలను పాటించాల్సి ఉంటుంది.1-ఈమాన్‌, 2-నమాజ్‌, 3-రోజా(ఉపవాస దీక్ష),4-జకాత్‌(ధాన ధర్మాలు)5-హజ్‌యాత్ర.

ఉపవాసాలు ఇలా..

రంజాన్‌ మాసాన్ని మూడు భాగాలుగా వర్గీకరిస్తారు. మొదటి 10 రోజులు దైవ కారుణ్యానికి ప్రతీక. తర్వాత పది రోజులు క్షమాభిక్షకు ప్రతీక. చివరి పది రోజులు నరకం నుంచి విముక్తికి ఉపకరిస్తాయని మహ్మద్‌ ప్రవక్త అభివర్ణించారు.

హలీం రుచులు సిద్ధం

రంజాన్‌ మాసంలో లభించే ప్రత్యేక వంటకం హలీం. కొన్నేళ్ల క్రితం హైదరాబాద్‌కే పరిమితమైన హలీం దశాబ్ద కాలంగా జిల్లాలోని ముఖ్య పట్టణాలకు విస్తరించింది. యేటా మంచిర్యాల జిల్లా కేంద్రంతో పాటు చెన్నూర్‌, లక్షెట్టిపేట, బెల్లంపెల్లి, మందమర్రి పట్టణాల్లో స్టాళ్లను ఏర్పాట్లు చేస్తున్నారు. డ్రై ఫ్రూట్స్‌, ఫ్రూట్స్‌ సైతం విక్రయిస్తున్నారు. తరావి నమాజ్‌ కోసం మసీదుల్లో ప్రత్యేక ఏర్పాటు చేశారు. మసీదులను ప్రత్యేక విద్యుత్‌ దీపాలతో అలంకరించారు.