2BHK గుబులు.. డబుల్‌ బెడ్రూం ఇండ్ల పంపిణీలో తీవ్ర జాప్యం

పేద, మధ్య తరగతి కుటుంబాల సొంతింటి కల సాకారం చేయాలన్న తపనతో కేసీఆర్‌ మదిలో పురుడుపోసుకొన్న పథకమే డబుల్‌ బెడ్రూం ఇండ్ల పథకం. కేసీఆర్‌ సర్కారు ప్రతిష్ఠాత్మకంగా తీసుకొని పదేండ్ల పాలనలో లక్షలాది మందికి ఇండ్లు పంపిణీ చేసింది. ఈ క్రమంలో ఇప్పటికే కొందరికి అందగా.. మరికొన్ని చోట్ల నిర్మాణాలు పూర్తి చేసుకొని పంపిణీకి సిద్ధంగా ఉన్నాయి.

• ఏండ్లు గడుస్తున్నా పట్టించుకోని కాంగ్రెస్‌ సర్కారు
• నిర్వహణ లేక పాడైపోతున్న రెండు పడకల ఇండ్లు
• పలుచోట్ల పూర్తయిన లబ్ధిదారుల ఎంపిక
• ఎప్పుడిస్తారని ఎదురు చూస్తున్న లబ్ధిదారులు
• సర్కారు తీరుపై వెల్లువెత్తుతున్న విమర్శలు

పేద, మధ్య తరగతి కుటుంబాల సొంతింటి కల సాకారం చేయాలన్న తపనతో కేసీఆర్‌ మదిలో పురుడుపోసుకొన్న పథకమే డబుల్‌ బెడ్రూం ఇండ్ల పథకం. కేసీఆర్‌ సర్కారు ప్రతిష్ఠాత్మకంగా తీసుకొని పదేండ్ల పాలనలో లక్షలాది మందికి ఇండ్లు పంపిణీ చేసింది. ఈ క్రమంలో ఇప్పటికే కొందరికి అందగా.. మరికొన్ని చోట్ల నిర్మాణాలు పూర్తి చేసుకొని పంపిణీకి సిద్ధంగా ఉన్నాయి. పలుచోట్ల లబ్ధిదారుల ఎంపిక పూర్తయింది. ఇక పట్టాలు ఇవ్వడమే తరువాయి అనుకున్న తరుణంలో కాంగ్రెస్‌ సర్కారు అధికారంలోకి వచ్చింది. కేసీఆర్‌ ఆనవాళ్లు లేకుండా చేస్తానంటూ రేవంత్‌రెడ్డి చేసిన ప్రకటనకు తగ్గట్టుగానే రెండున్న రేండ్లుగా 2 బీహెచ్‌కే ఇండ్లను పంపిణీ చేయకుండా పక్కనపెట్టింది. నిర్మాణం పూర్తయి, నిర్వహణ లేక పాడైపోతున్నా చోద్యం చూస్తూ, ఎంపికైన లబ్ధిదారుల ఆశలు అడియాసలు చేసింది.

మంచిర్యాల, ఏప్రిల్‌ 29(నమస్తే తెలంగాణ ప్రతినిధి) : ఉమ్మడి ఆదిలాబాద్‌ జిల్లావ్యాప్తంగా కేసీఆర్‌ ప్రభుత్వం 10,650 ఇండ్లను మంజూరు చేసింది. వేలాది ఇండ్లను ఇప్పటికే లబ్ధిదారులకు అప్పగించినా, మరికొన్ని నిర్మాణాలు పూర్తి చేసుకొని పంపిణీకి సిద్ధంగా ఉన్నాయి. వాటిని కాంగ్రెస్‌ సర్కారు పంపిణీ చేయకుండా, కేసీఆర్‌కు పేరు రావొద్దన్న దురుద్దేశంతో 2 బీహెచ్‌కేలను నిర్వీర్యం చేసే కుట్రలు చేస్తున్నది. ఫలితంగా కొన్న శిథిలావస్థకు చేరుకోగా.. మరికొన్ని అసాంఘిక కార్యకలాపాలకు అడ్డాగా మారాయి. పోనీ ఇందిరమ్మ ఇండ్ల పథకాన్నైనా అమలు చేస్తుందా? అంటే అదీ లేదు. హడావుడిగా పథకాన్ని ప్రవేశపెట్టి రోజుకో నిబంధన మారుస్తూ లబ్ధిదారులను ఇబ్బందులు పెడుతున్నది. 2014 మార్చి 24న మొదలైన ఇందిరమ్మ ఇండ్ల పథకం కింద, గతేడాది జూన్‌ 2వ తేదీన ఇందిరమ్మ తొలి విడుత ఇండ్లు పంపిణీ చేస్తామని సర్కారు చెప్పింది. పథకం ప్రారంభించి రెండేళ్లు పూర్తయినా తొలి విడుతలో చేపట్టిన ఇండ్ల నిర్మాణ పనులే పూర్తి కాలేదు. బిల్లులు రావాలంటే కొర్రీలు పెట్టడం, సమయానికి పనులు కాకపోవడం, సాంకేతిక సమస్యలతో జనం అవస్థలు పడాల్సి వస్తున్నది. రాజకీయాలు పక్కన పెట్టి కోట్ల రూపాయల ప్రభుత్వ నిధులతో నిర్మించిన డబుల్‌ బెడ్రూం ఇండ్లను వెంటనే పంపిణీ చేయాలని పలువురు డిమాండ్‌ చేస్తున్నారు.

• ఆదిలాబాద్‌ జిల్లాకు 2271 డబుల్‌ బెడ్రూం ఇండ్లను కేసీఆర్‌ సర్కారు పంపిణీ చేసింది. వీటిలో 606 ఇండ్ల నిర్మాణం పూర్తి కాగా, 1023 ఇండ్లు 90 శాతం పూర్తయ్యాయి. మిగిలిన ఇండ్ల నిర్మాణం వివిధ దశల్లో ఉన్నాయి. తాంసి మండలంలో 100 మందికి, ఆదిలాబాద్‌లో 200 మందికి పంపిణీ చేశారు. ఆదిలాబాద్‌ టౌన్‌లో కేఆర్‌కే కాలనీలో 200, జైనథ్‌లో 100 ఇండ్ల నిర్మాణం పూర్తి చేసుకొని పంపిణీకి సిద్ధంగా ఉన్నాయి. కానీ.. కాంగ్రెస్‌ ప్రభుత్వం ఇప్పటివరకు ఇండ్ల పంపిణీ చేపట్టకపోవడంతో పాడైపోతున్నాయి.
• కుమ్రం భీం ఆసిఫాబాద్‌ జిల్లాలో 1223 ఇండ్లను కేసీఆర్‌ సర్కారు మంజూరు చేసింది. జోడేఘాట్‌, జైనూర్‌ మండలాల్లో 26 ఇండ్ల నిర్మాణం పూర్తి చేసి, వాటిని లబ్ధిదారులకు అప్పగించారు. కాగజ్‌నగర్‌ నియోజకవర్గంలో 288 ఇండ్ల నిర్మాణం 90 శాతం పూర్తయ్యాయి. లబ్ధిదారులను ఎంపిక చేయగా.. అనంతరం ఎన్నికలు వచ్చాయి. దీంతో ఎంపికైన లబ్ధిదారులకు పట్టాలిచ్చి వదిలేశారు.
• నిర్మల్‌ జిల్లాకు 4540 ఇండ్లు మంజూరు కాగా.. 2511 ఇండ్ల నిర్మాణం కేసీఆర్‌ సర్కారు పూర్తి చేసింది. మరో 2029 ఇండ్ల నిర్మాణ పనులు వివిధ దశల్లో కొనసాగుతున్నాయి. నిర్మల్‌లో 1460, ఖానాపూర్‌లో 400, భైంసాలో 200, తిమ్మాపూర్‌లో 16, కడ్తాల్‌లో 50, గంజాల్‌లో 40, పాక్‌పట్లలో 50, ఎల్లపెల్లి గ్రామంలో 69, చిట్యాలలో 71, రత్నాపూర్‌ కాండ్లీలో 50, లక్ష్మణచాంద మండలంలోని కూచన్‌పెల్లిలో 30, బోరిగాంలో 25, సారంగాపూర్‌ మండలంలోని డ్యాంగాపూర్‌లో 50 ఇండ్ల నిర్మాణాలు పూర్తయ్యాయి. వీటినే చాలా వరకు లబ్ధిదారులకు అందజేశారు. కానీ.. కాంగ్రెస్‌ మాత్రం 2 బీహెచ్‌కేల నిర్మాణాలు పూర్తి చేసి లబ్ధిదారులకు అందించలేదు.
• మంచిర్యాల జిల్లాలో 2616 ఇండ్లు మంజూరయ్యాయి. మంచిర్యాల నియోజకవర్గానికి 650 కేటాయించారు. వీటిలో 360 నిర్మాణం పూర్తయింది. రెండు విడుతలుగా లబ్ధిదారులను లక్కీ డ్రా తీసి, కలెక్టర్‌ సమక్షంలో అత్యంత పారదర్శకంగా ఎంపిక చేశారు. చెన్నూర్‌ నియోజకవర్గానికి 1146 ఇండ్లు మంజూరయ్యాయి. మందమర్రిలో 560, క్యాతన్‌పల్లి మున్సిపాలిటీలో 286, చెన్నూర్‌లో 300 ఇండ్లను కేటాయించారు. వీటిలో 194 ఇండ్లు మినహా మిగిలిన ఇండ్ల నిర్మాణం పూర్తయ్యింది. ఇక బెల్లంపల్లి నియోజకవర్గానికి 425 డబుల్‌ ఇండ్లకు మంజూరు ఇచ్చారు. కేసీఆర్‌ హయాంలో 160 ఇండ్ల పనులు చేపట్టి కన్నాల శివారులో 108 ఇండ్ల నిర్మాణాన్ని పూర్తి చేశారు. కానీ లబ్ధిదారులకు అందలేదు. గత ప్రభుత్వం ఎంపిక చేసినా.. ఇవ్వకుండా కాలపాయన చేస్తున్నది. మీ ఎంపిక చెల్లదని, కొత్తవారిని ఎంపిక చేస్తామంటూ అధికారులే లబ్ధిదారులుగా ఎంపికైన వారికి భయబ్రాంతులకు గురి చేస్తున్నారు. కొన్ని చోట్ల 2 బీహెచ్‌కేలు ఇస్తామని డబ్బులు వసూలు చేస్తున్నారన్న ఆరోపణలున్నాయి.