చిన్నారుల రక్షణకు చైల్డ్లైన్ ‘1098’
కేంద్ర, రాష్ట్ర ప్రభుత్వాల ఆధ్వర్యంలో అమలు
కరీంనగర్ జిల్లాలో సత్ఫలితాలు
వందలాది చిన్నారులకు జీవితం
హెల్ప్లైన్పై మరింత అవగాహనకు యంత్రాంగం కార్యాచరణ
ఫిర్యాదుదారుల వివరాలు గోప్యంగా ఉంచుతాం: అధికారులు
తిమ్మాపూర్ రూరల్, మార్చి17: ముసి ముసి బోసి నవ్వుల అందమైన చిన్నారి.. అమ్మ పొత్తిల్లలో హాయిగా పడుకోవాల్సిన చిట్టి తల్లి.. ముళ్ల పొదల్లో బిక్కు బిక్కు మంటూ ఏడుస్తూ నరకం అనుభవిస్తున్నది. కన్నవారి లాగా చూసుకోవాల్సిన అయిన వారు కామాంధులై కన్నేస్తున్నారు. లేలేత పసి హృదయాలను చిదిమేస్తున్నారు. పలక, బలపం పట్టాల్సిన బుజ్జి లేత చేతులతో పారలు పట్టిస్తున్నారు. గోరు ముద్దలు తినాల్సిన వయస్సులో.. ఎవరో తిన్న ప్లేట్లు తోమిస్తున్నారు. ఇలా చిన్నారులను చిరువయస్సులోనే భవిష్యత్తును బుగ్గిపాలు చేస్తున్నారు. బాలలకు రాజ్యాంగం కల్పించిన జీవించే హక్కు, రక్షణ పొందే హక్కు, అభివృద్ధి చెందే హక్కులకు భంగం కలుగుతుంది. పిల్లలపై క్రూరత్వం రోజురోజుకూ పెరిగిపోవడంతో కేంద్ర, రాష్ట్ర ప్రభుత్వాలు చిన్నారుల సంరక్షణ నిమిత్తం 1098 టోల్ఫ్రీ నంబర్తో ప్రాజెక్టును ప్రారంభించింది.
కొన్ని కేసులు..
పోయినేడాది కరోనా విజృంభిస్తోంది. పాఠశాలలు, హాస్టళ్లు మూతబడ్డాయి. తల్లిదండ్రులు లేని ఓ చిన్నోడు ప్రభుత్వ హాస్టల్లో ఉండేవాడు. కరోనా వల్ల హాస్టళ్లు మూతపడడంతో వారి పెద్దనాన్న ఇంటికి వెళ్లాడు. ఏమైందో ఏమో తెలియదు కానీ ఓ బస్సెక్కి సీట్ల కింద దాక్కుంటూ ప్రయాణం చేస్తుండగా, గన్నేరువరం వద్ద గమనించిన కండక్టర్ అక్కడి పోలీసులకు అప్పగించారు. దీంతో పోలీసులు 1098 టోల్ ఫ్రీ నంబర్కు కాల్ చేసి వివరాలు అందజేయగా, వెంటనే స్పందించిన చైల్డ్లైన్ సిబ్బంది స్టేషన్కు వెళ్లి బాబుకు, వారి కుటుంబసభ్యులకు కౌన్సెలింగ్ ఇచ్చి బాలల సంక్షేమ సమితి ముందు హాజరు పరిచి కరీంనగర్లోని చిల్డ్రన్స్ హోమ్లో చేర్పించారు. ప్రస్తుతం అబ్బాయి హాస్టల్లో చదువుతున్నాడు. చైల్డ్లైన్వారు ప్రతినెల అబ్బాయి ఆరోగ్య పరిస్థితి, ఇబ్బందులు తెలుసుకుంటున్నాడు. తల్లిదండ్రులు ఎల్లవేళ్లలా గొడవపడుతుండడంతో విసిగివేసారిన ఓ బాలుడు ఇంటి నుండి పారిపోయి కరీంనగర్ బస్టాండ్లో అర్థరాత్రి ఒంటరిగా తిరుగుతున్నారు. గమనించిన ఆర్టీసీ ఉద్యోగులు చైల్డ్లైన్కు కాల్ చేశారు. పోలీసుల సాయంతో రంగంలోకి దిగిన చైల్డ్లైన్ సిబ్బంది బాబును తీసుకుని అతను చదువుతున్న స్కూల్ ఆధారంగా తల్లిదండ్రుల జాడ తెలుసుకుని వారి ఇష్టంతో బాలల హాస్టల్లో సంరక్షణ కేంద్రంలో చేర్పించగా ప్రస్తుతం ఆ అబ్బాయి విద్యనభ్యసిస్తున్నాడు. గత ఏడాది అక్టోబర్లో జిల్లా ఆసుపత్రి ఏరియాలో ఐదు సంవత్సరాల చిన్నారి తప్పిపోయిందని సమాచారం అందుకున్న 1098 టీం వెంటనే రంగంలోకి దిగి రెస్క్యూ చేసి పట్టుకున్నారు. బాలల సంక్షేమ సమితి ముందు హాజరు పరిచి పాప యొక్క తల్లిదండ్రుల వివరాలు సేకరించి పోలీసువారి ఆధ్వర్యంలో పాపను వారి తల్లిదండ్రులకు అప్పజెప్పారు.
జిల్లాలో తప్పిపోయిన బాలులు, వెట్టిచాకిరిలో ఉన్న బాధిత చిన్నారులను తిరిగి వారి తల్లిదండ్రులకు చేరవేయడం, లేకపోతే సంరక్షణ చర్యలు తీసుకుంటున్నారు. బడీడు పిల్లలను పనిలో పెట్టుకున్నవారిపై, బిక్షాటన చేయిస్తున్న వారిపై ప్రత్యేక దృష్టిసారించి వందలాది మందికి కొత్త జీవితాన్ని అందిస్తున్నారు. బాలల అక్రమ రవాణా, బాల్యవివాహాల నిర్మూలనపై ప్రత్యేకశ్రద్ధ తీసుకుంటున్నారు. పిల్లల హక్కులకు ఎక్కడ భంగం కలిగినా.. ఆపదలో ఉన్నవారిని రక్షించేందుకు నిత్యం టోల్ఫ్రీ నంబర్కు మంచి స్పందన వస్తున్నది. టోల్ఫ్రీకి కాల్ చేసిన వెంటనే సంబంధిత అధికారులు స్పందిస్తున్నారు. బాధిత పిల్లలను చేరదీయండం.. వారికి అలసరమైన ప్రథమ చికిత్స, కౌన్సెలింగ్ చేస్తున్నారు. తప్పిపోయిన వారి పిల్లలను తల్లిదండ్రులకు అప్పగిస్తున్నారు. తల్లిదండ్రులెవరూ లేకపోతే ఆశ్రమాల్లో చేర్పించి వారికి మంచి జీవితాన్ని అందిస్తున్నారు.
ఎవరైనా 18సంవత్సరాల లోపు చిన్నారులు హింసకు గురవుతున్నా, అనాదరణకు గురవుతున్నా 1098నంబర్కు కాల్ చేస్తే చైల్డ్లైన్ కేంద్రం నిర్వహకులు ఆయా జిల్లాల కో ఆర్డినేటర్లకు సమాచారం అందిస్తారు. వారి నుంచి వివరాలు తీసుకుని జిల్లా టీం సంఘటనా స్థలికి పోలీసుల సహాయంతో వెళ్లి చిన్నారులను రక్షిస్తున్నారు.
జిల్లాలో..
చైల్డ్ హెల్ప్ లైన్ 1098 సేవలు ప్రారంభం అయిన 2013 సంవత్సరం నుంచి 2020సంవత్సరం వరకు వేల కేసులను ఛేదించి, ఎంతో మంది బాలలకు మంచి జీవితాన్ని ఇప్పించారు. ఇప్పటి వరకు జిల్లాలో 1006మంది బాలకార్మికులను వెట్టిచాకిరి నుంచి విముక్తి కల్పించారు. బిక్షాటన చేస్తున్న 270మందిని చిల్డ్రన్స్ హోంలో చేర్పించి విద్యనందిస్తున్నారు. 103మంది మైనర్లకు జరుగుతున్న బాల్యవివాహాలను ఆపించారు. తప్పిపోయిన 51మంది విద్యార్థులను వారి తల్లిదండ్రుల చెంతకు చేర్చారు. అలాగే లైంగి క వేదింపులు, శారీరక మానసిక వేదింపులు, వెట్టి చాకిరీ, వదిలివేసిన పిల్లలు, ఇంటి నుండి పారిపోయిన పిల్లలు, అనాథలు, అంగవైకల్యం ఉన్నవారు, వివిధ రకాల వేధింపులకు గురైన 2270 మంది పిల్లలకు విముక్తి కల్పించారు.
సమాచారం గోప్యంగా ఉంచుతాం..
వేధింపులకు గురవుతూ ఎవరికీ చేప్పుకోవాలో తెలియక సతమతమౌతున్న చిన్నారులకు 1098 టోల్ఫ్రీ నంబర్ ఆపన్నహస్తం అందిస్తుంది. వేదన అనుభవిస్తున్న వారే చేయాలనేమీ లేదు. ఎవరైనా చిన్నారులు వివక్షకు గురైతే మా నంబర్కు ఫోన్ చేసి చెప్తే వెంటనే రంగంలోకి దిగి విచారణ చేసి చిన్నారులకు మంచి భవిష్యత్తును అందజేస్తాం. ఎవరి గురించైనా చెప్తే తమ వివరాలు బయటకు వస్తాయనే భయం అవసరమే లేదు. ప్రాజెక్టు ప్రారంభం అయినప్పటి నుంచి ఎన్నో కేసులను ఛేదించాం. సమాచారం అందజేసిన వారి వివరాలు గోప్యంగా ఉంచుతాం. ఎక్కడ చిన్నారులు వివక్షకు గురైనా కాల్ చేయవచ్చు. ఇది 24గంటలూ పని చేస్తుంది.
-ఆవుల సంపత్, జిల్లా కోఆర్డినేటర్