నా గదిలో ఐశ్వర్య పోస్టర్‌!

ఇండియాతో తనది జన్మజన్మల అనుబంధమని అంటున్నది నటి ఎలీ అవ్రామ్‌. స్వీడన్‌లో పుట్టిపెరిగిన ఎలీ ఏనాటికైనా బాలీవుడ్‌ నటికావాలనుకుంది. ఏ ముహూర్తాన నిర్ణయించుకుందో తెలియదు కానీ, స్వీడిష్‌-గ్రీక్‌ మూలాలున్న ఈ ముద్దుగుమ్మ 2013లో బాలీవుడ్‌ సినిమాతో నటిగా పరిచయమైంది.

ఇండియాతో తనది జన్మజన్మల అనుబంధమని అంటున్నది నటి ఎలీ అవ్రామ్‌. స్వీడన్‌లో పుట్టిపెరిగిన ఎలీ ఏనాటికైనా బాలీవుడ్‌ నటికావాలనుకుంది. ఏ ముహూర్తాన నిర్ణయించుకుందో తెలియదు కానీ, స్వీడిష్‌-గ్రీక్‌ మూలాలున్న ఈ ముద్దుగుమ్మ 2013లో బాలీవుడ్‌ సినిమాతో నటిగా పరిచయమైంది. తాజాగా అమితాబ్‌తో ‘గుడ్‌ బై’లో నటించింది. ధనుష్‌ హీరోగా తెరకెక్కిన తమిళ సినిమా ‘నాను వరువెన్‌’లో కీలక పాత్ర పోషించింది. దేశం కాని దేశానికి వచ్చి నటిగా నిలదొక్కుకుంటున్న ఎలీ జర్నీ
చదివేయండి..

• మా నాన్న సంగీత విద్వాంసుడు. అమ్మకు నాటకరంగ అనుభవం ఉంది. చిన్నప్పుడు వినసొంపైన సంగీతంతో నిద్రలేచేదాన్ని. రోజంతా కళాత్మకంగా సాగిపోయేది. పెరిగే కొద్దీ కళలే నా నేస్తాలయ్యాయి. మా అమ్మ ఒడిలోనే నటనలో ఓనమాలు దిద్దుకున్నా. మా ఆంటీ ఎంతగానో సపోర్ట్‌ చేసేది. చిన్నప్పుడే నాటకాలు వేసేదాన్ని. నాకు తెలియకుండానే నా మనసులో నటనా బీజం బలంగా నాటుకుంది. అయితే, ఏదైనా పాత్ర పోషిస్తే అందులోనే ఉండిపోయేదాన్ని. ‘నాటకం ముగియడంతోనే ఆ పాత్ర ముగిసినట్టు. తర్వాత నువ్వు నువ్వే!’ అని నాన్న ఎప్పుడూ చెబుతుండేవారు.
• నా ఆధ్యాత్మిక ఆలోచనలే నన్ను భారతదేశానికి చేరువ చేశాయేమో. ఈ దేశంతో గతజన్మ రుణబంధమేదో ఉండే ఉంటుంది. నా చిన్నప్పుడు స్వీడిష్‌ టెలివిజన్‌లో బాలీవుడ్‌ సినిమాలు ప్రసారమయ్యేవి. వాటిని ఆసక్తిగా చూసేదాన్ని. ఇండియన్‌ కల్చర్‌తో అలా పరిచయం ఏర్పడింది. స్టాక్‌హోమ్‌ సిటీలో బాలీవుడ్‌ సినిమాల డీవీడీలు దొరికే స్టోర్‌ ఉందని తెలిసింది. అంతే ఆ దుకాణానికి నేను రెగ్యులర్‌ కస్టమర్‌ అయిపోయా. నా గదిలో ఐశ్వర్యరాయ్‌ వాల్‌ పోస్టర్‌ అతికించుకున్నా. హిందీ సినిమాల ద్వారా ఇండియాతో బలమైన అనుబంధం ఏర్పడింది. ఇప్పుడు ఇక్కడే ఉంటున్నా. మొన్న దీపావళికి లక్ష్మీపూజలో కూడా పాల్గొన్నా.
• నమ్ముతారో లేదో కానీ, స్వీడన్‌లో పుట్టిన నేను ఎప్పటికైనా బాలీవుడ్‌ హీరోయిన్‌ కావాలని కలలు కనేదాన్ని. అయితే, ఈ ప్రయాణంలో చాలామంది ‘నీవల్ల కాదు’ అని నిరుత్సాహపరిచారు. ఆ మాటల్ని నేను పట్టించుకోలేదు. మనం అనుకున్న దాన్ని బలంగా విశ్వసిస్తే అది తప్పక నెరవేరుతుందని నమ్ముతాను. నా విషయంలోనూ అదే జరిగిందనుకుంటా. ముంబయికి వచ్చాక ఒకసారి ధనుష్‌ నటించిన ‘రాన్‌ఝణా’ చిత్రం చూశా. అప్పుడే అతనితో ఎలాగైనా నటించాలని అనుకున్నా. ‘నానె వరువెన్‌’ సినిమాతో ఆ కల కూడా తీరింది. మన మీద మనకు నమ్మకం ఉంటే.. సృష్టిలోని సర్వశక్తులూ ఏకమై మన కలను నిజం చేస్తాయి. ‘గుడ్‌ బై’ సినిమాలో లెజెండరీ యాక్టర్‌ అమితాబ్‌తో కలిసి పనిచేయడం నిజంగా నా అదృష్టం. ఎన్నో విలువైన విషయాలు ఆయన ద్వారా నేర్చుకున్నా. ఇక ధనుష్‌ మంచి వ్యక్తి. చాలా ప్రొఫెషనల్‌. సహనటుల కంఫర్ట్‌ గురించి ఆలోచిస్తాడు.
• నటులకు భాషాభేదాలు ఉండవు. అయితే భాష మీద అవగాహన ఉంటే మంచిదే! ప్రస్తుతం భారతీయ భాషలు నేర్చుకుంటున్నా. తమిళం కష్టంగా ఉంది. కానీ, పట్టుదలతో సాధన చేస్తున్నా. తమిళంలో మాస్టర్స్‌ చేయాలని గోల్‌ పెట్టుకున్నా. చెన్నైకి వెళ్తే.. స్థానికులతో వచ్చీరాని భాషలో మాట్లాడుతుంటాను. వాళ్లు అనర్గళంగా మాట్లాడుతుంటే థ్రిల్లింగ్‌గా ఉంటుంది.