Milk | ఏ పాలు తాగితే మంచిది? ఆవుపాలా? బర్రెపాలా?

December 22, 2021 / 07:04 AM IST

Milk | వయసుతో సంబంధం లేకుండా ప్రతి ఒక్కరూ రోజూ పాలు తాగాలని ఆరోగ్య నిపుణులు సూచిస్తున్నారు. పాలంటేనే పోషకాల గని. విటమిన్‌-డి, క్యాల్షియం వీటిలో పుష్కలం. ఈ నేపథ్యంలో.. ఆవుపాలు, బర్రెపాలలో ఏవి ఎక్కువ ఆరోగ్యకరమన్న చర్చ జరుగుతున్నది.

కొవ్వు శాతం

పాలలోని కొవ్వుపైనే చిక్కదనం ఆధారపడి ఉంటుంది. ఆవుపాలలో మూడు నుంచి నాలుగు శాతం కొవ్వు ఉంటుంది. అదే బర్రెపాలలో ఏడు నుంచి ఎనిమిది శాతం ఉంటుంది. అందుకే బర్రెపాలు చిక్కగా ఉంటాయి. అయితే, బర్రెపాలు తొందరగా జీర్ణం కావు. ఆవుపాల కంటే బర్రెపాలలో కొలెస్ట్రాల్‌ తక్కువగా ఉంటుంది. అందువల్ల ఊబకాయం, రక్తపోటు, కిడ్నీ సంబంధ వ్యాధులున్నవారు బర్రెపాలు తాగడం మంచిదని అంటారు.

ప్రొటీన్లు

ఆవుపాల కంటే బర్రెపాలలో 10 నుంచి 11 శాతం ప్రొటీన్లు ఎక్కువ. ఆవుపాలలో క్యాలరీలు తక్కువే. ఒక గ్లాసు ఆవుపాలలో 148 క్యాలరీలు ఉంటే, అంతే పరిమాణంలోని బర్రె పాలలో 237 క్యాలరీలు లభిస్తాయి. బర్రెపాలలోని పెరాక్సిడేస్‌ అనే ఎంజైమ్‌ వల్ల ఆవుపాలతో పోలిస్తే బర్రెపాలు ఎక్కువ కాలం నిల్వ ఉంటాయి.

రంగులో తేడా..

బర్రెపాలు తెల్లగా ఉంటాయి. ఆవుపాలు పసుపు, తెలుపు రంగులు కలగలసి ఉంటాయి. బర్రెపాలలోని బీటా కెరోటిన్‌ రంగులేని విటమిన్‌-ఎ గా మారుతుంది. అందుకే బర్రెపాలలో పసుపు రంగు పోతుంది. ఆవుపాలలో బీటా కెరోటిన్‌ ఉన్నా, మోతాదు తక్కువే.

ఎన్నో ఉపయోగాలు

నిద్ర బాగా పట్టాలంటే పడుకునే ముందు ఒక గ్లాసు బర్రెపాలు తాగడం మంచిది. కోవా, పెరుగు, నెయ్యి, పనీర్‌, పాయసాలకు బర్రెపాలు ఉత్తమం. పాల ద్వారా క్యాల్షియం, ఫాస్పరస్‌, విటమిన్‌-డి వంటి పోషకాలు అందుతాయి. పాలలోని క్యాల్షియం దీర్ఘకాలిక వ్యాధుల నుంచి కాపాడుతుంది. ఎముకల హీనత, క్యాన్సర్‌, తలనొప్పి, ఊబకాయం తదితర సమస్యలు అధిగమించడానికి నిత్యం పాలు తాగాల్సిందే. పాల వల్ల ఎసిడిటీ సమస్యలు కూడా తగ్గిపోతాయని చెబుతారు వైద్య నిపుణులు.

✍ మజ్జిగపు శ్రీనివాస్‌రెడ్డి

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి