గురక.. రాదిక!

ఇప్పుడు చాలామందిని ‘గురక’ వేధిస్తున్నది. ఈ సమస్య బాధితులతోపాటు పక్కవారికీ ఇబ్బంది కలిగిస్తుంది. అయితే, కొన్ని వ్యాయామాలు గురకను నివారిస్తాయని నిపుణులు చెబుతున్నారు. గొంతు కండరాలను బలోపేతం చేయడంలో ఇవి అద్భుతంగా పనిచేస్తాయి.

ఇప్పుడు చాలామందిని ‘గురక’ వేధిస్తున్నది. ఈ సమస్య బాధితులతోపాటు పక్కవారికీ ఇబ్బంది కలిగిస్తుంది. అయితే, కొన్ని వ్యాయామాలు గురకను నివారిస్తాయని నిపుణులు చెబుతున్నారు. గొంతు కండరాలను బలోపేతం చేయడంలో ఇవి అద్భుతంగా పనిచేస్తాయి. గాలి వెళ్లే మార్గాన్ని వెడల్పుగా ఉంచి, నిద్రలో శ్వాస సులభంగా ఆడేలా చేస్తాయని అంటున్నారు.

నాలుక వ్యాయామాలు

• నాలుక చివరను పై దంతాల వెనుక భాగంలో ఉంచాలి. మెల్లిమెల్లిగా నాలుకను వెనక్కి వంచుతూ.. గొంతు వైపు వీలైనంత వరకూ లాగాలి. ఇలా రోజుకు 20 సార్లు చేయాలి.
• నాలుక మొత్తాన్నీ నోరు పైభాగానికి గట్టిగా నొక్కిపట్టి ఉంచాలి. అలా ఓ ఐదు సెకన్ల పాటు ఉంచి, ఆపై వదిలేయాలి. ఇలా 10 నుంచి 15 సార్లు చేయాలి.
• నాలుక చివరను కింద వరుస పళ్లకు తగిలించి ఉంచాలి. నాలుక మధ్య భాగాన్ని నోటి కింది భాగానికి గట్టిగా నొక్కాలి. ఐదు సెకన్ల పాటు అలాగే ఉంచి వదిలేయాలి.

దవడ వ్యాయామాలు

• నోటిని కొద్దిగా తెరిచి, కింది దవడను కుడి వైపు జరిపి.. 30 సెకన్ల పాటు అలాగే ఉంచాలి. ఆ తర్వాత ఎడమ వైపు జరిపి.. మరో 30 సెకన్ల పాటు ఉంచాలి.
• పెదవులను లోపలికి ముడుచుకుని, నోటిని గట్టిగా మూసేయాలి. ఐదు సెకన్లపాటు అలాగే ఉంచి, ఆపై రిలాక్స్‌ అవ్వాలి. దీనిని 10 సార్లు పునరావృతం చేయాలి.

గొంతు వ్యాయామాలు

• ఏ, ఈ, ఐ, ఓ, యూ అనే ఆంగ్ల అచ్చులను గట్టిగా, స్పష్టంగా పలకాలి. ప్రతి అక్షరాన్ని పలికేటప్పుడు నోటి కండరాలపై ఒత్తిడి పడేలా చూసుకోవాలి. ఇలా రోజుకు మూడు నాలుగు సార్లు, ప్రతిసారీ రెండుమూడు నిమిషాల పాటు చేయాలి.
• నోటిని తెరిచి, గొంతు వెనుక భాగంలో ఉండే కండరాలను పైకి లేపడానికి ప్రయత్నించాలి. ఇలా చేయడం వల్ల గొంతు కండరాలు గట్టిపడతాయి.