పార్శోత్తాసనం కాన్పు తేలిక

తన కడుపు పండిందని తెలియగానే ఆడకూతురుకు కలిగే ఆనందం అంతా ఇంతా కాదు. ఆ క్షణం నుంచి తన గురించి, కడుపులోని బిడ్డ గురించి తహతహలాడుతుంటుంది. కానీ, కాన్పు గండం ఎలా గడుస్తుందని చాలామంది ఆందోళన చెందుతూ ఉంటారు. కాన్పు తేలికయ్యే మార్గాలను అన్వేషిస్తూ ఉంటారు. ఇందుకోసం యోగాసనాలు ప్రయత్నించొచ్చు. పార్శోత్తాసనం వేయడం వల్ల వెన్నునొప్పి దూరమవ్వడంతో పాటు కాన్పుకూడా తేలికవుతుందని చెబుతున్నారు నిపుణులు. అయితే, వైద్యుల సలహా తీసుకున్న తర్వాతే ఈ ఆసనం ప్రయత్నించాలి.

షరతులు వర్తిస్తాయి

• కండ్లు తిరుగుతున్నట్టుగా ఉన్నప్పుడు ఈ ఆసనం వేయకూడదు. పొట్టలో అసౌకర్యంగా ఉన్నా, వ్జైనా నుంచి రక్తస్రావం అవుతున్నా ఈ ఆసనం ప్రయత్నించకపోవడం మంచిది.
• నిటారుగా తాడాసన స్థితిలో నిల్చోవాలి.
• రెండు చేతులను వీపు వెనుకకు తీసుకొని అరచేతులు ఒక దానిని ఒకటి కలిపి ప్రెస్‌ చేస్తూ ఉంచాలి. చేతివేళ్లు పైకి చూస్తున్నట్టుగా పెట్టాలి.
• నాలుగు అడుగుల దూరం ఉండేలా రెండుకాళ్లను చాపాలి. రెండు పాదాలూ కుడివైపునకు తిప్పాలి. నడుం పైభాగాన్ని నెమ్మదిగా కుడివైపునకు తిప్పాలి.
• రెండు అరచేతులను ప్రెస్‌ చేస్తూ మోచేతులు వెనక్కి బెండ్‌ అయ్యేలా జాగ్రత్త పడాలి. ఈ సమయంలో ఛాతీ భాగం పట్టేసినట్టుగా ఉంచకుండా నిదానంగా శ్వాస తీసుకుంటూ ఎక్స్‌పాండ్‌ చేయాలి.
• నడుం పైభాగాన్ని కుడివైపునకు నిదానంగా వంచాలి. తల, ఛాతీ, కడుపు భూమికి సమాంతరంగా వంచడం వల్ల పొట్టపై ఎలాంటి ఒత్తిడీ ఉండదు. వెన్నెముకనుంచి మెడవరకు సరైన పొజిషన్‌లో ఉండేలా జాగ్రత్త పడాలి.
• ఇదే భంగిమలో 20 నుంచి 30 సెకన్లుండాలి. ఈ సమయంలో శ్వాస నిదానంగా తీసుకోవాలి.
• మళ్లీ యథాతథ స్థితికి వచ్చి ఎడమవైపు ఇదే ఆసనం కొనసాగించాలి.
• పార్శోత్తాసనం వేయడం ద్వారా వెన్నునొప్పి దూరం అవుతుంది. ఒంట్లో పెడసరతనం (బిర్రుతనం) తగ్గుతుంది. కాన్పు తేలికగా
• అవుతుంది.