Water | ఆరోగ్యానికే కాదు.. అందాన్ని కాపాడటంలోనూ నీళ్లు కీలకమే!

ఆరోగ్యానికే కాదు.. అందాన్ని కాపాడటంలోనూ నీళ్లు కీలకంగా వ్యవహరిస్తాయి. శరీరంలో తగినంత నీరు ఉన్నప్పుడే.. చర్మం, జుట్టు ఆరోగ్యంగా ఉంటాయి. అయితే, వేసవిలో మాదిరిగా.. వర్షాకాలంలో ఎక్కువగా దాహం వేయదు.

Water | ఆరోగ్యానికే కాదు.. అందాన్ని కాపాడటంలోనూ నీళ్లు (Water) కీలకంగా వ్యవహరిస్తాయి. శరీరంలో తగినంత నీరు ఉన్నప్పుడే.. చర్మం, జుట్టు ఆరోగ్యంగా ఉంటాయి. అయితే, వేసవిలో మాదిరిగా.. వర్షాకాలంలో ఎక్కువగా దాహం వేయదు. కాబట్టి, నీళ్లు తక్కువగా తాగుతుంటారు. దాంతో శరీరం డీహైడ్రేషన్‌కు గురవుతుంది. ఇది చర్మం, జుట్టు ఆరోగ్యాన్ని దెబ్బతీస్తుంది. ఈ సమస్యకు పరిష్కారంగా.. నీటిశాతం ఎక్కువగా ఉండే పండ్లను తీసుకోవాలని నిపుణులు చెబుతున్నారు. ఇందుకోసం కొన్ని ఆహార నియమాలను పాటించాలని సూచిస్తున్నారు.

• వేపుళ్లు, ఎక్కువ కారంగా ఉండే ఆహారాన్ని పక్కన పెట్టేయాలి. రోజువారీ ఆహారంలో సూప్‌, లస్సీ, పెరుగు, తాజా పండ్లు, సలాడ్లతోపాటు మొలకలను చేర్చుకోవాలి.
• తాజా పండ్లు, సలాడ్లు శరీర నీటి అవసరాలను తీర్చడంలో సాయపడతాయి. పుచ్చకాయలు, దోసకాయలను ఎక్కువగా తీసుకోవాలి.
• ఈ కాలంలో డెజర్ట్స్‌ తినడానికి బదులుగా.. పెరుగులో కొద్దిగా తేనె కలుపుకొని తీసుకుంటే మంచిది. తాజా పండ్లను తేనెతో కలిపి తిన్నా.. రుచికి రుచి, ఆరోగ్యానికి ఆరోగ్యం!
• యాంటి ఆక్సిడెంట్లు అధికంగా ఉండే బొప్పాయి, బెర్రీలు, ఆపిల్‌, రేగు, దానిమ్మ పండ్లను ఆహారంలో భాగం చేసుకోవాలి. ముఖ్యంగా లిచీ, జామ వంటి విటమిన్‌ సి అధికంగా ఉండే పండ్లు.. చర్మంపై ముడతలకు కారణమయ్యే ఫ్రీరాడికల్స్‌ను ఎదుర్కోవడంలో సాయపడతాయి.
• పొట్లకాయ, కాకరకాయ, గుమ్మడికాయ వంటి కూరగాయలను ఎక్కువగా తీసుకోవాలి. వీటిలో యాంటి ఆక్సిడెంట్లు, శరీరానికి అవసరమైన పోషకాలు పుష్కలంగా ఉంటాయి. చర్మ వ్యాధులను నివారించడంలో, రోగనిరోధక శక్తిని పెంచడంలో ఇవి ముందుంటాయి.
• అవకాడో, బాదం, వాల్‌నట్స్‌, అవిసె గింజలు.. చర్మాన్ని మృదువుగా, ప్రకాశవంతంగా మారుస్తాయి.
• ఇక శరీరంలో తగినంత నీరు ఉంటే.. అందం మరింత మెరుగుపడుతుంది. చర్మం, జుట్టుకు రక్షణగా నిలుస్తుంది. మెరిసిపోయే చర్మం సొంతమవుతుంది. అంతేకాకుండా.. ఈ రకమైన పౌష్టికాహారం బరువును తగ్గించడంలోనూ సాయపడుతుంది.