నా వయసు పందొమ్మిది. ఇంజినీరింగ్ చదువుతున్నా. మా పిన్ని కొడుకు వయసు పదిహేడు. పిన్ని అంటే అమ్మ చెల్లె కాదు. దూరపు చుట్టం. ఆమె కొడుకు, నేను చాలా ఫ్రెండ్లీగా ఉంటాం. మా ఇద్దర్నీ చూసి చాలామంది కుళ్లుకుంటారు. ఎందుకో, నాకే తెలియకుండా తన పట్ల ఆకర్షణ ఏర్పడింది. ఏవేవో ఆలోచనలు ఉక్కిరిబిక్కిరి చేస్తున్నాయి. ఎంత ప్రయత్నించినా వాటిని వదిలించుకోలేక పోతున్నా. నాపై నాకే అసహ్యం వేస్తున్నది. అపరాధ భావం వెంటాడుతున్నది. – ఓ సోదరి
దూరపు బంధువు అయినా, దగ్గరి చుట్టమైనా.. అతను తమ్ముడి వరస అవుతాడు. వయసులోనూ మీకంటే చిన్నవాడే. తనను సోదరుడిలా ఆదరించండి. స్నేహితుడిగా మీ మనసులో స్థానం ఇవ్వండి. అంతకు మించిన ఆలోచనలు వద్దు. మీ మనసులోని అపరాధ భావననూ తొలగించుకోండి. మీలోని విజ్ఞత మీ మాటల్లో వ్యక్తం అవుతున్నది. మీది ఆకర్షణే. ప్రేమ కాదు. పెద్దగా స్నేహితులు లేకపోవడం కూడా ఇందుకు కారణం కావచ్చు. మీ ఆలోచనలను కెరీర్ వైపు మళ్లించండి. ఇంజినీరింగ్ తర్వాత ఏం చదవాలనే దానిపై ఫోకస్ చేయండి. చదువులకు ఇబ్బంది లేకుండా.. కొత్త పరిచయాలను, స్నేహాలను పెంచుకోండి. అర్థంలేని ఆలోచనలను వడపోసే శక్తి ధ్యానానికి ఉందని చెబుతారు నిపుణులు. మీరూ ప్రయత్నించి చూడండి. జీవితం సుదీర్ఘమైంది. ఏదో ఓ మజిలీ దగ్గర మనం ఆగిపోకూడదు.